وزیراعظم نے سرمایہ کاروں کیلئے ویزا کے حصول کو آسان بنانے سے متعلق بیان میں کہا ہے کہ انھیں 24 گھنٹوں میں ویزا جاری کیا جائے گا۔
شہباز شریف نے کہا کہ حکومت نے بیرونی سرمایہ کاری اور کاروباری سرگرمیوں کیلئے اہم قدم اٹھایا ہے، 126 ممالک کے سرمایہ کاروں اور سیاحوں کو 24 گھنٹے میں ویزا جاری کیا جائے گا، ان 126 ممالک کے تاجروں اور سیاحوں کو ویزا فیس سے مستثنیٰ قرار دیا گیا ہے۔
وزیراعظم پاکستان شہباز شریف کا کہنا تھا کہ ویزا پالیسی میں نرمی سے پاکستان بیرون کاروبار اور سیاحت کیلئے پرکشش مقام بن جائیگا، مذہبی سیاحت میں بہتری کیلئے خصوصی اقدامات کیے گئے ہیں۔
انھوں نے بتایا کہ تیسرے ملک کا پاسپورٹ رکھنے والے سکھ یاتریوں کیلئے خصوصی سہولت دی ہے، ویزا آن آرائیول کی سہولت کیلئے الگ سے سب-کیٹیگری کی منظوری دی گئی ہے۔
وزیراعظم کا کہنا تھا کہ کراچی، لاہور اور اسلام آباد کے ہوائی اڈوں پر ای نظام کا نفاذ کیا جارہا ہے، ویزا پالیسی میں نرمی سے معیشت مستحکم ہوگی، زر مبادلہ ذخائرمیں اضافہ ہوگا۔
شہباز شریف نے کہا کہ پاکستان میں بہت سے مذاہب کے مقدس مقامات موجود ہیں، وفاق نے سیاحت کے فروغ کے حوالے سے بھی قدم اٹھایا، وزارت داخلہ، دیگر وزارتوں نے ویزا رجیم میں نرمی کی جو مثبت پیشرفت ہے۔
وزیراعظم نے کہا خلیج تعاون کونسل ممالک کی کاروباری شخصیات کیلئے ویزا فری انٹری کی منظوری دی، اقدام سے خلیجی ممالک سے سرمایہ کاری اور کاروبار کے مواقع مزید بڑھیں گے۔
گلگت بلتستان سمیت ملک کے دیگر شمالی علاقے سیاحوں کیلئے جنت ہیں، ویزا رجیم پالیسی پر عملدرآمد جائزے کیلئے وزارت داخلہ میں ڈیش بورڈ قائم ہوگا۔
شہباز شریف نے کہا کہ ڈیش بورڈ ویزا فری انٹری، بزنس ویزا لسٹ اور ٹورسٹ ویزا آن آرائیول کی نگرانی کرے گا، نئی ویزا رجیم پر متعلقہ وزارتوں اور اداروں کی کارکردگی لائق تحسین ہے۔