اسلام آباد : وفاقی حکومت نے 24 سرکاری اداروں کی نجکاری کا فیصلہ کرلیا ہے اور باقاعدہ نجکاری فہرست بھی جاری کر دی گئی ہے۔

تفصیلات کے مطابق حکومت کی جانب سے تیار کی گئی نئی نجکاری فہرست قومی اسمبلی میں پیش کر دی گئی۔

یہ فہرست وفاقی وزیر برائے نجکاری عبدالعلیم خان نے ایوان میں پیش کی، جس میں مختلف سرکاری اداروں کی مرحلہ وار نجکاری کا منصوبہ شامل ہے۔

وفاقی وزیر نے بتایا کہ گزشتہ سال 24 سرکاری اداروں کو نجکاری فہرست میں شامل کیا گیا تھا اور اب یہ عمل تین مراحل میں مکمل کیا جائے گا۔

عبدالعلیم خان کا کہنا تھا کہ پہلے مرحلے میں 10 اداروں کی نجکاری ایک سال کے اندر مکمل کی جائے گی۔

ان اداروں میں پی آئی اے (پاکستان انٹرنیشنل ایئرلائن)، روز ویلٹ ہوٹل (نیویارک) ، فرسٹ وومن بینک ، ہاؤس بلڈنگ فنانس کارپوریشن ، زرعی ترقیاتی بینک (ZTBL) ، آئیسکو (اسلام آباد الیکٹرک سپلائی کمپنی) اور مزید 2 ڈسکوز شامل ہیں۔

مزید پڑھیں : پی آئی اے کی نجکاری کے عمل میں مزید تیزی

وفاقی وزیر کے مطابق دوسرے مرحلے میں 13 اداروں کی نجکاری تین سال کے اندر مکمل کی جائے گی، جن میں اسٹیٹ لائف انشورنس کارپوریشن ، یوٹیلیٹی اسٹورز کارپوریشن ، لیسکو (لاہور الیکٹرک سپلائی کمپنی) ، مزید 5 ڈسکوز اور 4 جینکوز (پاور جنریشن کمپنیاں) شامل ہیں۔

تیسرے مرحلے میں صرف پوسٹل لائف انشورنس کمپنی کی نجکاری کی جائے گی، جسے پانچ سال کے اندر مکمل کرنے کا ہدف رکھا گیا ہے۔

وفاقی وزیر نے واضح کیا کہ نجکاری کا مقصد سرکاری اداروں کو فعال، مؤثر اور منافع بخش بنانا ہے۔ حکومت شفاف طریقہ کار کے تحت قومی اثاثوں کی نجکاری کو ممکن بنانے کے لیے پرعزم ہے۔

اسلام آباد (20 جولائی 2025): وزارت خزانہ نے کئی سرکاری اداروں کے ریڈ زون میں کام کرنے اور دیوالیہ ہونے کا خدشہ ظاہر کیا گیا ہے۔

اے آر وائی نیوز کے مطابق وزارت خزانہ کی سرکاری اداروں سے متعلق دستاویز جاری کی ہیں، جس میں اداروں کی زبوں حالی کا احوال بیان کیا گیا ہے۔

وزارت خزانہ کی دستاویز کے مطابق کئی سرکاری ادارے ریڈ زون میں کام کر رہے ہیں جب کہ کئی سرکاری کارپوریشنز کے دیوالیہ ہونے کا خدشہ شدت اختیار کر گیا ہے۔

ان دستاویز میں کہا گیا ہے کہ سرکاری اداروں کے بہت سے بورڈ آف ڈائریکٹرز بدستور غیر فعال ہیں۔ ان بورڈ ارکان کے پاس نہ تو مہارت ہوتی ہے اور نہ آزادی اور تجربہ ہوتا ہے۔ بورڈ ارکان کے پاس اسٹریٹجک فیصلے لینے اور احتساب نافذ کرنے کا عزم بھی نہیں ہوتا ہے۔

دستاویز میں یہ انکشاف بھی کیا گیا ہے کہ زیادہ تر اداروں میں آڈٹ کمیٹیاں غیر فعال یا صرف علامتی ہوتی ہیں۔ خطرے کے انتظام کے طریقہ کار یا تو بالکل موجود نہیں یا صرف خانہ پُری تک محدود ہیں۔

وزارت خزانہ کی ان دستاویزات میں سرکاری اداروں پر عوامی اعتماد کے زوال کی وجہ بھی بیان کی گئی ہے اور کہا ہے کہ موثر نگرانی کی عدم موجودگی نے مالیاتی غلط بیانی اور لاگت میں اضافے کو جنم دیا ہے۔ بعض صورتوں میں مشتبہ فراڈ جیسے معاملات پیدا ہوئے ہیں۔ مالی عدم استحکام، اداروں پر عوامی اعتماد کے زوال میں اضافہ ہوا ہے۔

اسلام آباد : سرکاری اداروں کو بند کرنے حکومتی فیصلے کے بعد سرکاری ملازمین میں تشویش کی لہر دوڑ گئی، جس سے بے روزگار ہونے کا خدشہ ہے۔

تفصیلات کے مطابق وفاقی حکومت نے مزید سرکاری اداروں کو بند کرنے کی تجاویز تیار کرلیں، ذرائع نے بتایا کہ رائٹ سائزنگ اقدامات کے تحت مختلف ادارے بندکرنےکی نشاندہی کی گئی۔

ذرائع کا کہنا تھا کہ وزارت صنعت وپیداوار کے ادارے کراچی ٹولزڈائز اینڈ مولڈز سینٹر اور نیشنل پروڈکٹوٹی آرگنائزیشن بندکرنے کی تجویز تیار کی گئی ہے۔

پاکستان انڈسٹریل ٹیکنیکل اسسٹنس سینٹر اور ٹیکنالوجی اپ گریڈیشن اینڈاسکل ڈیولپمنٹ کمپنی بھی بندکرنےکی تجویزتیار ہے جبکہ یوٹیلیٹی اسٹورزکارپوریشن کی نجکاری یا ختم کرنےکی تجویز بھی دی گئی ہے۔

یاد رہے اس سے قبل نیشنل فرٹیلائزر کارپوریشن اور نیشنل فرٹیلائزرمارکیٹنگ لمیٹڈ کو بند کرنے کی تجویز دی گئی تھی ، ذرائع کا کہنا تھا کہ وزیراعظم نےان اداروں کو بند کرنے کیلئے وزارت صنعت وپیداوارکو ٹاسک دے دیا ہے اور دونوں اداروں کو بند کرنے کے لیے تجاویز مانگی ہیں۔

خیال رہے وفاقی حکومت رائٹ سائزنگ کمیٹی نے مختلف ادارے بند کرنے کی ہدایت کی تھی اور کہا تھا کہ وزارت آئی ٹی کے ماتحت ٹیلی کام فاؤنڈیشن کو بند کیا جائے۔

ٹیلی کام فاؤنڈیشن کے ماتحت اداروں کی نجکاری کرنے کے احکامات بھی جاری کرتے ہوئے ادارہ جاتی اصلاحات کمیٹی کی نیشنل آئی ٹی بورڈکی بڑےپیمانے پرتنظیم نوکی ہدایت کی تھی۔

اسلام آباد : حکومت نے مختلف سرکاری اداروں کا خصوصی آڈٹ کرانے کا فیصلہ کرلیا اور آڈٹ کرانے سے متعلق پلان سےآئی ایم ایف کو آگاہ کردیا ہے۔

تفصیلات کے مطابق وفاقی حکومت نے مختلف سرکاری اداروں کا خصوصی آڈٹ کرانے کا فیصلہ کرلیا۔

سوئی سدرن گیس کمپنی، حیسکواور پیسکوکا خصوصی آڈٹ کیا جائے گا ، حکومت نے خصوصی آڈٹ کرانے سے متعلق پلان سےآئی ایم ایف کو آگاہ کردیا ہے۔

نگراں حکومت نے خصوصی آڈٹ کیلئے آڈیٹر جنرل کوکہہ دیا ہے اور خصوصی آڈٹ کے اسکوپ اورٹی او آرزکوحتمی شکل دیدی گئی ہے۔

دستاویز میں کہا گیا ہے کہ خصوصی آڈٹ جاری سہہ ماہی کے دوران شروع کرنے کا پلان ہے۔

حکومت نے آئی ایم ایف کو سرکاری اداروں کی کارکردگی بہتر کرنے کی یقین دہانی کراتے ہوئے کہا ہے کہ سرکاری اداروں میں شفافیت لائی جائے گی۔