Tag: سرکاری اسپتال

جھنگ: پنجاب کے شہر جھنگ کے سرکاری اسپتال میں سینئر ڈاکٹر آپے سے باہر ہو گیا اور نرس پر تھپڑوں سے بارش کر دی۔

تفصیلات کے مطابق ڈاکٹر کو اس کے فرائض منصبی یاد دلانا اسٹاف نرس کو مہنگا پڑ گیا، جھنگ کے علاقے شور کورٹ کے تحصیل ہیڈ کوارٹر اسپتال میں معمولی تلخ کلامی پر ڈاکٹر آپے سے باہر ہو گیا۔

اے آر وائی نیوز کے مطابق سینئر ڈاکٹر صفدر نے اسٹاف نرس کو غصے سے بے قابو ہو کر تشدد کا نشانہ بنا لیا، واقعے کی سی سی ٹی وی فوٹیج بھی میڈیا پر مشتہر ہو گئی، جس کے بعد اسپتال کے ایم ایس نے کہا کہ تشدد میں ملوث ڈاکٹر کے خلاف کارروائی کے لیے رپورٹ بھیج دی گئی ہے۔

انسانیت سے عاری ڈاکٹر نے کافی دیر تک نرس اسٹاف روم میں نرس کو تشدد کا بنایا، وقفے وقفے سے اس پر حملہ آور ہوتا، رہا، اور تھپڑ مارتا جس سے نرس نیچے بھی گر پڑی، لیکن ڈاکٹر انھیں مارنے سے باز نہ آیا۔ ڈاکٹر نے دوسری نرس کو بھی دھکا دیا۔

فوٹیج کے مطابق ڈاکٹر صفدر قواعد و ضوابط بالائے طاق رکھ کر نرسنگ آفس میں داخل ہوا اور روبینہ نامی ایک نرس پر تھپڑوں کی بارش کر دی، اطلاعات کے مطابق نرس روبینہ نے ڈاکٹر کو ایک مریض کی طبیعت خراب ہونے پر وزٹ کا کہہ دیا تھا جب کہ ڈاکٹر نے وزٹ سے انکار کیا، اس پر معمولی تکرار نے سینئر ڈاکٹر کو آپے سے باہر کر دیا۔

واقعے کے بعد ڈاکٹر صفدر کو اپنے فعل پر شرمندی کا احساس بھی نہ ہوا، فوٹیج کے مطابق وہ نرسنگ آفس سے سینہ تان کر نکلے۔ واقعے سے معلوم ہوتا ہے کہ مذکورہ سینئر ڈاکٹر کو اخلاقیات سمیت قواعد و ضوابط کی بھی کوئی پروا نہیں۔

اسپتال ذرایع کے مطابق ڈاکٹر صفدر کے خلاف محکمہ جاتی کارروائی کی جائے گی۔

اسلام آباد: وزیراعظم کے معاون خصوصی برائے صحت ڈاکٹر ظفر مرزا نے وفاقی سرکاری اسپتالوں کی صورت حال پرعدم اطمینان کا اظہار کرتے ہوئے کہا کہ اسپتالوں کی ایمرجنسی ،او پی ڈی میں سینئر ڈاکٹرز غیر حاضر ہوتے ہیں۔

تفصیلات کے مطابق وزارت صحت نے وفاقی دارالحکومت کے سرکاری اسپتالوں کی انتظامیہ کو مراسلہ لکھا ہے جس میں ڈاکٹر ظفر مرزا نے اسپتالوں میں سینئرڈاکٹرز کی عدم موجودگی پر شدید برہمی کا اظہار کرتے ہوئے کہا کہ اسپتالوں کی ایمرجنسی ،او پی ڈی میں سینئر ڈاکٹرز غیر حاضر ہوتے ہیں۔

معاون خصوصی برائے صحت نے کہا کہ بیشتر سینئر ڈاکٹرز ڈیوٹی اوقات کار پورے کیے بغیر چلے جاتے ہیں، سینئر ڈاکٹرز کی عدم موجودگی پر دیگرعملہ بھی ڈیوٹی مکمل نہیں کرتا۔

ڈاکٹر ظفر مرزا نے کہا کہ ڈاکٹرزکی عدم موجودگی سے مریضوں کو مشکلات پیش آتی ہیں، کیا غریب عوام کو اسپیشلسٹ ڈاکٹرز سے علاج کا حق نہیں ہے۔ انہوں نے مزید کہا کہ اسپیشلسٹ، سینئر ڈاکٹرز او پی ڈی، ایمرجنسی میں حاضری یقینی بنائیں۔

پاکستان میڈیکل کونسل کو جدید خطوط پر استوار کر رہے ہیں، ظفر مرزا

یاد رہے کہ گزشتہ روز وزیراعظم کے معاون خصوصی برائے صحت ڈاکٹر ظفر مرزا کا کہنا تھا کہ پاکستان میڈیکل کونسل کو جدید خطوط پر استوار کر رہے ہیں۔

لاہور: لاہور ہائی کورٹ میں سرکاری اسپتالوں میں احتجاج اور ہڑتالوں کے خلاف درخواست دائر کی گئی ہے جس میں موقف اختیار کیا گیا ہے کہ ڈاکٹروں کا کام ہڑتال نہیں لوگوں کا علاج معالجہ ہے۔

تفصیلات کے مطابق لاہور ہائی کورٹ میں سرکاری اسپتالوں میں احتجاج اور ہڑتالوں کے خلاف درخواست دائر کی گئی ہے جس میں وفاقی وصوبائی حکومت، ینگ ڈاکٹرز سمیت دیگر کو فریق بنایا گیا ہے۔

درخواست گزار کے مطابق ڈاکٹرز کی آئے روز ہڑتالوں سے مریض مشکلات کا شکار ہیں، ڈاکٹروں کا کام ہڑتال نہیں لوگوں کا علاج معالجہ ہے۔

درخواست گزار نے موقف اختیار کیا ہے کہ عدالتوں نے ڈاکٹرز کی ہڑتال پر واضح احکامات جاری کر رکھے ہیں، ہڑتال کر کے ڈاکٹرز عدالتی احکامات کی خلاف ورزی کر رہے ہیں۔

درخواست گزار نے عدالت سے استدعا کی ہے کہ احتجاج، ہڑتال کرنے والے ڈاکٹرز کے خلاف کارروائی کرنے کا حکم دیا جائے، عدالت ینگ ڈاکٹرز کی ہڑتال فوری ختم کرنے کا حکم دے۔

یاد رہے کہ گزشتہ ماہ صوبائی وزیر صحت ڈاکٹر یاسمین راشد کا کہنا تھا کہ سرکاری اسپتالوں کی نجکاری کا خدشہ بالکل جھوٹ اور گمراہی کا فسانہ ہے۔

یاسمین راشد کا کہنا تھا کہ حکومت میڈیکل ٹیچنگ انسٹیٹیوشن ایکٹ کے تحت پنجاب کے کسی بھی سرکاری اسپتال کی نجکاری نہیں کر رہی بلکہ عوام کو صحت کے شعبے میں مزید سہولیات پیدا کرنے کے لیے انقلابی اقدامات اٹھا رہی ہے۔

اسلام آباد: وزیراعظم کے معاون خصوصی ڈاکٹر ظفرمرزا کا کہنا ہے کہ جہاں مچھر کی افزائش، وائرس ہے وہاں اسپرے یقینی بنایا جا رہا ہے۔

تفصیلات کے مطابق اسلام آباد میں ڈاکٹرظفرمرزا کی زیرصدرت ڈینگی سے متعلق اجلاس ہوا جس میں سیکرٹری صحت اللہ بخش ملک، ڈی جی ہیلتھ، جڑواں شہروں کی انتظامیہ نے شرکت کی۔

اجلاس سے خطاب کرتے ہوئے وزیراعظم کے معاون خصوصی برائے صحت کا کہنا تھا کہ ڈینگی کےخاتمے کا تہیہ کر رکھا ہے، انسداد ڈینگی کے لیے کی گئی کوششیں کارگر ثابت ہو رہی ہیں۔

ڈاکٹر ظفرمرزا کا کہنا تھا کہ جہاں مچھر کی افزائش، وائرس ہے وہاں اسپرے یقینی بنایا جا رہا ہے۔

وزیراعظم کے معاون خصوصی برائے صحت کا مزید کہنا تھا کہ اسپتالوں میں علاج کی مفت، بہترین سہولیات فراہم کی جا رہی ہیں، جلد ڈینگی کے کیسز میں کمی واقع ہونا شروع ہوجائے گی۔

ڈینگی مریضوں کے علاج معالجے میں غفلت برداشت نہیں کی جائیگی، ڈاکٹر ظفرمرزا

یاد رہے کہ گزشتہ ہفتے وزیراعظم کے معاون خصوصی ڈاکٹر ظفرمرزا نے سرکاری اسپتالوں کے اچانک دورے کیے اور ڈینگی وارڈز کا معائنہ کیا تھا۔ اس موقع پر ڈاکٹر ظفر مرزا کا کہنا تھا کہ ڈینگی مریضوں کے علاج معالجے میں غفلت برداشت نہیں کی جائے گی۔