کراچی : پرائیویٹ اسکول کی فیسوں سے پریشان والدین نے بچوں کا داخلہ سرکاری اسکول میں کرادیا، ڈھائی ہزار بچے نجی اسکولوں کو چھوڑ کر سرکاری اسکول میں تعلیم حاصل کریں گے۔
تفصیلات کے مطابق کراچی میں پرائیویٹ اسکول کی فیسوں سے پریشان والدین نے بچوں کا داخلہ سرکاری اسکول میں کرادیا، والدین کا کہنا ہے سرکاری اسکول کی پڑھائی پرائیویٹ اسکول سے اچھی ہے۔
والدین کو خوشگوار حیرت تب ہوئی جب انہیں سرکاری اسکول میں تبدیلی نظر آئی نشتر روڈ پر واقع سرکاری اسکول میں مختلف پرائیوٹ اسکولوں کے ڈھائی ہزاربچوں نے داخلہ لے لیا۔
طلباء و طالبات کے والدین کہتے ہیں کہ سرکاری اسکول کی پڑھائی پرائیوٹ سے زیادہ اچھی ہے، داخلے کے لیے آئی ننھی بچی نے پرانے اسکول میں پڑھائی کا حال بھی یہی بتایا۔
اس حوالے سے ذرائع کا کہنا ہے کہ مزید ایک ہزار طلبہ چرچ مشن اسکول میں داخلہ لینا چاہتے ہیں۔ اس مہنگائی کے دور میں بچوں کو پڑھانا تو دور کی بات ہے پہلے ٹوٹے پھوٹے درو دیوار دیکھ کر شہری سرکاری اسکولوں کے آس پاس بھٹکتے بھی نہ تھے۔
مزید پڑھیں: وزیرتعلیم سندھ نےاپنی بیٹی کوسرکاری اسکول میں داخل کرادیا
یاد رہے کہ گزشتہ سال سابق وزیر تعلیم سندھ سردار شاہ نے اسمبلی میں اعلان پرعمل کر دکھایا اور اپنی بیٹی سمیت دو بھتیجیوں کو سرکاری اسکول میں داخل کروادیا۔ سردار شاہ کی بیٹی کا گورنمنٹ گرلز میراں اسکول میں داخلہ ہوا، 9سال کی بیٹی چوتھی جماعت کی طالبہ ہے۔
