ARYNews.tv | Urdu – Har Lamha Bakhabar

Tag: سرکاری اسکول

  • سرکاری اسکول میں اندوہناک حادثہ، طالبہ نے آئرن کی درجنوں گولیاں کھا لیں

    سرکاری اسکول میں اندوہناک حادثہ، طالبہ نے آئرن کی درجنوں گولیاں کھا لیں

    نئی دہلی: بھارت کے سرکاری اسکول میں کھیل کے دوران اندوہناک حادثہ پیش آیا جہاں ایک طالبہ نے درجنوں آئرن کی گولیاں کھا لیں، طالبہ اسپتال لے جاتے ہوئے دم توڑ گئی۔

    بھارتی میڈیا کے مطابق واقعہ ریاست تامل ناڈو میں پیش آیا جہاں آٹھویں جماعت کی طالبہ نے آئرن کی 45 گولیاں کھالیں جس سے اس کی موت ہوگئی۔

    تامل ناڈو کے اس سرکاری اسکول میں طلبہ کے درمیان ہمت کا کام کرنے کا کھیل جارہا تھا جس کے دوران طالبہ نے ہیڈ ماسٹر کے کمرے میں رکھی آئرن کی گولیاں کھالیں۔

    لنچ بریک کے دوران 6 طلبا ہیڈ ماسٹر کے کمرے میں گھسے اور وہاں موجود گولیوں کا پیکٹ دیکھ کر انہوں نے ایک دوسرے کو زیادہ دوائیں کھانے کا چیلنج کیا، کھیل میں 2 لڑکے بھی شامل تھے۔

    مرنے والی طالبہ نے سب سے زیادہ 45 گولیاں کھائی تھیں جبکہ دیگر طلبہ کو چکر آنے کی شکایت کے بعد اسپتال منتقل کردیا گیا۔

    بھارتی میڈیا کے مطابق طبیعت بگڑنے پر چاروں لڑکیوں کو دوسرے اسپتال بھی منتقل کیا گیا جبکہ سب سے زیادہ دوا کھانے والی طالبہ کو چنئی کے اسپتال منتقل کرنے کا فیصلہ کیا گیا تاہم وہ راستے میں ہی چل بسی۔

    واقعے کے بعد محکمہ تعلیم نے اسکول کے ہیڈ ماسٹر اور 8 اساتذہ کو نوٹسز جاری کردیے ہیں۔

  • حکومت اسکولوں میں فرنیچر نہیں دے سکتی تو تعلیم کیا دے گی؟ عدالت برہم

    حکومت اسکولوں میں فرنیچر نہیں دے سکتی تو تعلیم کیا دے گی؟ عدالت برہم

    سکھر: صوبہ سندھ میں سرکاری اسکولز بند ہونے کے کیس کی سماعت کے دوران عدالت نے ریمارکس دیے کہ حکومت اسکولوں میں فرنیچر ہی مہیا نہیں کر سکتی تو تعلیم کیا فراہم کرے گی۔

    تفصیلات کے مطابق سندھ ہائی کورٹ کے سکھر بینچ میں سرکاری اسکولز بند ہونے کے کیس کی سماعت کی گئی۔ عدالت نے دریافت کیا کہ سندھ میں بند اسکولز کی تعداد کتنی ہے؟ ڈائریکٹر تعلیم نے بتایا کہ سکھر میں 219 بند اسکول دوبارہ کھولے جا رہے ہیں۔

    جسٹس صلاح الدین کا کہنا تھا کہ کیا بلڈنگ نہ ہونے کی وجہ سے اسکول بند یا ختم کر دیے جائیں گے؟

    عدالت کو بتایا گیا کہ ضلع سانگھڑ میں 201 اسکول تاحال بند ہیں، تھر پارکر میں 628 اسکول بند ہیں جن میں سے 95 کھول دیے گئے ہیں، عمر کوٹ میں 417 اسکول بند ہیں جن میں سے 69 کھولے گئے ہیں۔

    عدالت نے کہا کہ عدالت میں جمع کروائے گئے اعداد و شمار غلط نکلے تو کارروائی کی جائے گی، سرکاری اسکولوں میں غریبوں کے بچے پڑھتے ہیں، فرنیچر ہی مہیا نہیں کر سکتے تو تعلیم کیا فراہم کریں گے۔

  • وزیر تعلیم سندھ نے افسران کو روزانہ دفتر سے تصاویر واٹس ایپ کرنے کی ہدایت کر دی

    وزیر تعلیم سندھ نے افسران کو روزانہ دفتر سے تصاویر واٹس ایپ کرنے کی ہدایت کر دی

    کراچی: وزیر تعلیم سندھ نے سرکاری اسکولوں کی حالت درست کرنے کے لیے 3 ماہ کی مہلت دے دی، نیز محکمے کے افسران کو روزانہ صبح دفتر سے تصاویر واٹس ایپ کرنے کی بھی ہدایت کر دی۔

    تفصیلات کے مطابق وزیر تعلیم سندھ سردار شاہ نے اعلیٰ افسران کو 3 ماہ میں تمام بند اسکولوں کی حالت درست کرنے کی ہدایت جاری کر دی۔

    صوبائی وزیر تعلیم نے ہدایت کی ہے کہ تین ماہ میں تمام بند اسکول کھول کر مرمتی کام مکمل کر لیا جائے۔

    انھوں نے کہا کسی اسکول میں استادوں کی کمی کی شکایت بھی نہیں ملنی چاہیے، ہر 30 بچوں پر ایک استاد کا ہونا لازمی ہے، 53 ہزار نئے بھرتی اساتذہ کو اسکولوں میں تعینات کیا جائے گا۔

    وزیر تعلیم سندھ نے ہدایت کی ہے کہ ڈی ای اوز اور ڈائریکٹرز دفتر میں نہیں بیٹھیں گے، اور اعلیٰ افسران روزانہ صبح اپنے دفتر سے تصویریں واٹس ایپ کریں گے۔

  • بھارت میں ’لب پہ آتی ہے دعا بن کے تمنا میری‘ پڑھے جانے پر اسکول پرنسپل معطل

    نئی دہلی: بھارت کی ریاست اترپردیش کے ایک سرکاری اسکول میں طلبہ کے علامہ اقبال کا دعائیہ کلام پڑھنے کی شکایت پر پرنسپل کو معطل کر دیا گیا ہے۔

    بھارتی میڈیا رپورٹ کے مطابق اترپردیش کے ضلع بریلی میں دائیں بازو کے گروپوں کی جانب سے پولیس کو شکایت کی گئی تھی کہ اسکول میں بچوں نے علامہ اقبال کا دعائیہ کلام ’لب پہ آتی ہے دعا بن کے تمنا میری‘ پڑھا ہے۔

    سوشل میڈیا پر اسکول کے طلبہ کی ایک ویڈیو گردش کر رہی ہے جس میں انہیں یہ کلام پڑھتے دیکھا جا سکتا ہے، اس ویڈیو کے منظر عام پر آنے کے بعد بھارت کی محکمہ تعلیم نے اسکول کے پرنسپل کو معطل کر دیا ہے۔

    ویڈیو کلپ کا جو حصہ وائرل ہو رہا ہے اس میں اسکول کے بچوں کو مذکورہ کلام کی ایک سطر ’میرے اللہ برائی سے بچانا مجھ کو‘ پڑھتے سُنا جا سکتا ہے۔

     پولیس کا کہنا ہے کہ انہوں نے اس لیے مقدمہ درج کیا ہے کیونکہ نماز سرکاری اسکولوں کے شیڈول کا حصہ نہیں۔

     محکمہ تعلیم نے کہا ہے کہ ابتدائی معلومات کی بنا پر پرنسپل کو معطل کیا گیا ہے اور وہ اس معاملے کی انکوائری کریں گے۔

  • سندھ کے سرکاری اسکولوں میں میوزک ٹیچرز کی بھرتی جلد ہوگی

    سندھ کے سرکاری اسکولوں میں میوزک ٹیچرز کی بھرتی جلد ہوگی

    کراچی: سندھ کے سرکاری اسکولوں میں میوزک ٹیچرز کی باضابطہ بھرتیوں کا عمل جلد شروع کردیا جائے گا، میوزک ٹیچرز تعلیمی اداروں میں نعت، حمد، اذان اور موسیقی سکھائیں گے۔

    تفصیلات کے مطابق سندھ حکومت نے سرکاری اسکولوں میں میوزک ٹیچرز کی باضابطہ بھرتیوں کا عمل جلد شروع کرنے کا فیصلہ کیا ہے۔

    میوزک ٹیچر کو بی ایس 14 میں بھرتی کیا جائے گا، میوزک ٹیچر کے لیے میٹرک تک کی تعلیم اور موسیقی کے سرٹیفکیٹس لازمی قرار دیے گئے ہیں۔

    میوزک ٹیچر کے لیے نیشنل میوزک اکیڈمی اور سندھ انسٹی ٹیوٹ میوزک آرٹ کا سرٹیفکیٹ لازمی قرار دیا گیا ہے، ٹیچر کو ہارمونیم، میوزیکل کی بورڈ اور پیانو بجانا آنا چاہیئے۔

    وزیر تعلیم سندھ کے مطابق میوزک ٹیچرز تعلیمی اداروں میں نعت، حمد، اذان اور موسیقی سکھائیں گے۔

  • سرکاری اسکول سے ڈینگی لاروا برآمد ہونے پر پرنسپل کیخلاف مقدمہ درج

    سرکاری اسکول سے ڈینگی لاروا برآمد ہونے پر پرنسپل کیخلاف مقدمہ درج

    راولپنڈی : سرکاری اسکول سے ڈینگی لاروابرآمد ہونے پر پرنسپل کیخلاف مقدمہ درج کرلیا گیا، اسکول کی ٹینکی میں ڈینگی لاروا کی کثیر تعداد موجود تھی۔

    تفصیلات کے مطابق راولپنڈی کے سرکاری اسکول سے ڈینگی لاروابرآمد ہونے پر پرنسپل کیخلاف مقدمہ درج کرلیا گیا۔

    خاتون پرنسپل کےخلاف دفعہ 268 اور 269 کے تحت تھانہ کلر سیداں میں مقدمہ درج کیا گیا۔

    مقدمے میں کہا گیا ہے کہ اسکول میں ڈینگی ایس او پیزکی سنگین نوعیت کی خلاف ورزی کی گئی، سرکاری اسکول کی ٹینکی میں ڈینگی لاروا کی کثیر تعداد موجود تھی۔

    خاتون پرنسپل کے خلاف مقدمہ ڈپٹی ڈسٹرکٹ ایجوکیشن آفیسرکی سفارش پر درج کیا گیا ہے۔

    خیال رہے راولپنڈی میں ڈینگی وائرس سے متاثرہ مریضوں کی تعداد میں مسلسل اضافہ ہورہا ہے ، 24گھنٹے میں ضلع بھرسے27 افراد میں ڈینگی وائرس کی تشخیص ہوئی۔

  • پانچ لاکھ بچوں نے سرکاری اسکولوں کو خیر باد کہہ دیا

    پانچ لاکھ بچوں نے سرکاری اسکولوں کو خیر باد کہہ دیا

    کراچی: صوبہ سندھ میں کرونا وبا کے باعث 5 لاکھ بچوں نے سرکاری اسکولوں کو خیر باد کہہ دیا۔

    اے آر وائی نیوز کے مطابق سندھ کی ایک سرکاری رپورٹ میں سرکاری اسکولوں میں داخلوں میں نمایاں کمی کا انکشاف کیا گیا ہے۔

    سندھ سرکار کا کہنا ہے کہ کرونا وائرس کی عالم گیر وبا کے اثرات اسکولوں میں داخلوں پر بھی مرتب ہوئے ہیں، اور سرکاری اسکولوں کی انرولمنٹ 46 لاکھ سے کم ہو کر 41 لاکھ ہوگئی ہے۔

    سیکریٹری اسکول ایجوکیشن اکبر لغاری کی جانب سے دیے گئے اعداد و شمار کے مطابق سرکاری اسکولوں میں 41 لاکھ بچوں کی انرولمنٹ ہوئی ہے۔

    سندھ سرکار نے داخلوں میں نمایاں کمی کی وجہ کرونا وبا قرار دے دیا، سیکریٹری کا کہنا تھا کہ کووِڈ نائٹین کے باعث داخلہ مہم نہ چلانے کے سبب سرکاری اسکولوں میں داخلوں کا رحجان کم رہا۔ انھوں نے کہاکہ گزشتہ 2 سال کے دوران کووِڈ کی صورت حال کے باعث داخلہ مہم نہ چل سکی۔

    وزیر تعلیم کو سیکریٹری اسکول ایجوکیشن کی جانب سے اسکولز کی انرولمنٹ کے حوالے سے تفصیلی ڈیٹا شیئر کر دیاگیا ہے، وزیر تعلیم سندھ نے بھی اس کی تصدیق کر دی ہے۔

  • سرکاری اسکولوں کو کتب کی فراہمی نہ ہوسکی، طلبا بغیر کتابوں کے جائیں گے

    سرکاری اسکولوں کو کتب کی فراہمی نہ ہوسکی، طلبا بغیر کتابوں کے جائیں گے

    کراچی: ملک بھر میں کل سے اسکول کھلنے جارہے ہیں تاہم محکمہ تعلیم سندھ کی جانب سے سرکاری اسکولوں کو کتب کی فراہمی نہ کی جاسکی۔

    تفصیلات کے مطابق سندھ ٹیکسٹ بک بورڈ سرکاری اسکولوں کے لیے کتب کی چھپائی اور ترسیل میں ناکام ہوگیا، کتب نیا تعلیمی سال شروع ہونے سے قبل طلبا کو فراہم کی جانی تھیں۔

    ذرائع کا کہنا ہے کہ سرکاری اسکولوں کو مفت کتب فراہم نہ ہوسکیں، سندھ ٹیکسٹ بک بورڈ نے کتب کی چھپائی کے لیے نجی پبلشر کو رقم ادا نہ کی، رقم نہ ملنے سے نجی پبلشر نے سرکاری کتب کی چھپائی 40 فیصد کم کردی۔

    ذرائع کے مطابق 40 فیصد کم کتابوں کی اشاعت کے علاوہ سندھ ٹیکسٹ بک بورڈ کی جو شائع کردہ کتابیں ہیں وہ بھی طلبا تک نہیں پہنچ سکیں۔

    ذرائع کا کہنا ہے کہ کل سے شروع تعلیمی سیشن میں طلبا بغیر کتابوں کے جائیں گے، نویں دسویں کے علاوہ انٹر کی سطح کی کتب بھی دستیاب نہیں۔ نویں دسویں کی صرف مطالعہ پاکستان اور سندھی کی کتب فراہم کی گئی ہیں۔

    خیال رہے کہ کل مخصوص ہدایات کےساتھ ملک بھر کے اسکول کھول دیے جائیں گے، طالب علم مخصوص فاصلے سے کلاس میں بیٹھیں گے۔

    اسکولوں میں طلبا اور اسکول کے عملے کے لیے ماسک کا استعمال لازمی قرار دیا گیا ہے، بیمار ہونے کی صورت میں طلبا کو اسکول میں داخلے کی اجازت نہیں ہوگی۔

  • بحرین حکومت کا سرکاری اسکولوں کے لیے بڑا اعلان

    بحرین حکومت کا سرکاری اسکولوں کے لیے بڑا اعلان

    مناما: بحرین حکومت نے سرکاری اسکولوں کے اساتذہ اور منتظمین کا کرونا ٹیسٹ کرنے کا اعلان کیا ہے۔

    تفصیلات کے مطابق بحرین کی وزارت تعلیم اور صحت نے تمام سرکاری اسکولوں کے منتظمین، اساتذہ اور تکنیکی ماہرین کے لیے کرونا ٹیسٹ کروانے کے لیے ایک مہم چلائی ہے۔

    حکومت کی جانب سے چلائی جانے والی مہم کے تحت بحرین بین الاقوامی نمائش اور کانفرنس سینٹر میں کرونا ٹیسٹ ایک مخصوص شیڈول کے مطابق کیے جا رہے ہیں اور تعلیمی سال کے آغاز سے پہلے ہی اسے مکمل کرنا ہے۔

    وزارت تعلیم اور صحت کی جانب سے کہا گیا ہے کہ 9 ستمبر سے شروع ہونے والی مہم کے دوران ٹیسٹ کے لیے ہر سرکاری اسکول کے عملے کو مخصوص تاریخیں ارسال کی جائیں گی، اس کا مقصد سینٹر کے باہر لمبی قطاروں اور ہجوم سے بچنا ہے۔

    وزارت تعلیم اور صحت کی جانب سے سرکاری اسکولوں کے اساتذہ اور دیگر ملازمین کو ہدایت کی گئی ہے کہ وہ مقررہ تاریخ پر اپنا کرونا ٹیسٹ کروائیں۔

    خیال رہے کہ سرکاری اسکولوں کے عملے کو رواں ماہ 6 ستمبر سے دوبارہ اسکول آنا تھا لیکن ملک مں کرونا کیسز کی تعداد میں اضافے کے بعد کرونا ٹیسٹ کی اجازت دینے کے لیے اس تاریخ کو 20 ستمبر تک ملتوی کر دیا گیا ہے۔

  • دبئی میں پہلا چینی سرکاری اسکول

    دبئی میں پہلا چینی سرکاری اسکول

    ابو ظہبی: متحدہ عرب امارات کے شہر دبئی میں چین اپنا پہلا سرکاری اسکول کھولنے جارہا ہے، اسکول کے قیام کا بنیادی مقصد امارات میں چینی کمیونٹی کو تعلیمی سہولت فراہم کرنا ہے۔

    اماراتی ذرائع ابلاغ کے مطابق دبئی محکمہ تعلیم نے کہا ہے کہ چین آئندہ تعلیمی سال کے آغاز سے دبئی میں اپنا پہلا سرکاری اسکول کھولے گا، یہ چین کے باہر پہلا سرکاری سکول ہوگا۔

    حکام کے مطابق اس میں 2 ہزار طلبہ کی گنجائش ہوگی، مذکورہ اسکول کا افتتاح ستمبر میں ہوگا۔ چینی اسکول کی عمارت مردف کے علاقے میں تعمیر کی گئی ہے، یہاں چینی نصاب پڑھایا جائے گا۔

    نصاب میں چین کی سرکاری زبان، سائنس، ریاضی، ٹیکنالوجی، انجینیئرنگ، اخلاقیات، سپورٹس اور فنون لطیفہ وغیرہ شامل ہوں گے۔ علاوہ ازیں چین کے سرکاری اسکول میں دوسری زبان عربی ہوگی جبکہ اسلامیات اور سماجی مطالعات کا مضمون بھی شامل ہوگا۔

    اسکول کے قیام کا بنیادی مقصد امارات میں چینی کمیونٹی کو تعلیمی سہولت فراہم کرنا ہے۔