ARYNews.tv | Urdu – Har Lamha Bakhabar

Tag: سرکاری املاک

  • احتجاج کے دوران سرکاری املاک کو نقصان پہنچانے میں ملوث 5 ملزمان گرفتار

    احتجاج کے دوران سرکاری املاک کو نقصان پہنچانے میں ملوث 5 ملزمان گرفتار

    کراچی: احتجاج کے دوران سرکاری املاک اور گاڑیوں کو نقصان پہنچانے سمیت ریاستی اداروں کے خلاف منفی پروپیگنڈے میں ملوث ملزمان کو گرفتار کرلیا گیا۔

    تفصیلات کے مطابق کراچی بن قاسم ٹاؤن میں رینجرز اور پولیس نے مشترکہ کارروائی کرتے ہوئے احتجاج کے دوران سرکاری املاک و گاڑیوں کو نقصان پہنچانے میں ملوث پانچ ملزمان کو گرفتار کرلیا۔

    ترجمان رینجرز کے مطابق گرفتار ملزمان میں گلاب، غلام علی، ناظم علی، محمد عمر شر اور عبدالطیف شامل ہیں۔

    ترجمان کا کہنا ہے کہ ملزمان کے موبائل سے ملکی اداروں کے خلاف منفی پروپیگنڈے کے ثبوت ملے ہیں اور ان کے خلاف شہر کے مختلف تھانوں میں مقدمات درج ہیں۔

    گرفتار ملزمان کو مزید کارروائی کیلئے پولیس کے حوالے کر دیا گیا ہے، جبکہ ان کے دیگر ساتھیوں کی گرفتاری کے لیے مختلف مقامات پر چھاپے مارے جا رہے ہیں۔

    https://urdu.arynews.tv/karachi-girl-kidnapping-drama/

    دوسری جانب کراچی میں بلال کالونی پولیس کے ہاتھوں مقابلے کے بعد زخمی حالت میں گرفتار ملزمان کا تعلق لیاری گینگ وار بھتہ خور وصی لاکھو اور صمد کا ٹھیاواری سے نکلا۔

    ملزمان تاجروں دکانداروں بلڈرز، حضرات کو صمد کا ٹھیاواری کے حکم پر بھتہ کی پرچیاں، دھمکی آمیز کال سمیت فائرنگ کرنے میں ملوث ہیں۔

    ایس ایس پی سینٹرل ذیشان شفیق صدیقی کے مطابق ملزمان کا گروہ نیو کراچی 5 نمبر پر بھتہ نہ دینے پر فائرنگ کر کے دوکانداروں کو قتل و زخمی کرنے کی وارداتوں میں ملوث ہیں

  • سرکاری املاک اور عوامی مقامات پر سائن بورڈز اور اشتہارات لگانے کے کیس میں پیش رفت

    سرکاری املاک اور عوامی مقامات پر سائن بورڈز اور اشتہارات لگانے کے کیس میں پیش رفت

    کراچی: سرکاری املاک اور عوامی مقامات پر سائن بورڈز، سیاسی بینرز اور اشتہارات لگانے کے کیس میں پیش رفت ہوئی ہے۔

    تفصیلات کے مطابق سائن بورڈ لگانے والی ایک نجی کمپنی نے ’سرکاری املاک اور عوامی مقامات پر سائن بورڈز، سیاسی بینرز اور اشتہارات لگانے‘ کے کیس میں فریق بننے کے لیے عدالت سے رجوع کر لیا۔

    عدالت نے نجی کمپنی کی درخواست پر فریقین کو نوٹس جاری کر دیے، جمشید قاضی ایڈووکیٹ نے عدالت کو بتایا کہ کمپنی نے معاہدے کے بعد ہی سائن بورڈز لیے تھے، کمپنی کو سنے بغیر کی آپریشن کر کے سائن بورڈ ہٹا دیے گئے۔

    واضح رہے کہ سپریم کورٹ کے احکامات پر عمل درآمد نہ کرنے پر سندھ ہائیکورٹ نے میئر کراچی کو شہر بھر سے سائن بورڈز ہٹانے کا حکم دیا تھا، عدالت نے کے ایم سی، کے ڈی اے، ڈی ایچ اے، کنٹونمنٹ بورڈز اور دیگر کو شہر بھر سے سائن بورڈز ہٹانے کا حکم دیا تھا۔

    سندھ ہائیکورٹ نے سپریم کورٹ کے حکم کی روشنی میں احکامات پر عمل درآمد کر کے رپورٹ پیش کرنے کا بھی حکم دیا تھا، عدالتی حکم ہے کہ غیر قانونی سائن بورڈز لگانے والوں کے خلاف مقدمات درج کرائے جائیں۔ عدالت نے کہا ہے کہ جس نے بھی غیر قانونی سائن بورڈز لگائے ہوئے ہیں، ان کے خلاف مقدمات درج کرکے رپورٹ پیش کی جائے۔

    وکیل درخواست گزار نے مؤقف پیش کیا کہ سپریم کورٹ نے سرکاری املاک پر سے سائن بورڈ ہٹانے کا حکم دیا تھا۔

  • سرکاری املاک پر سیاسی جھنڈے لگانے پر فوری مقدمہ درج کرنے کا حکم

    سرکاری املاک پر سیاسی جھنڈے لگانے پر فوری مقدمہ درج کرنے کا حکم

    کراچی : سندھ ہائی کورٹ نے سرکاری املاک پر سیاسی جھنڈے ، بینرز اور پوسٹرز لگانے والوں کے خلاف فوری مقدمہ درج کرنے کا حکم دے دیا۔

    تفصیلات کے مطابق سندھ ہائی کورٹ نے عوامی مقامات پر بل بورڈز ، ہورڈنگز اور سائن بورڈز لگانے کے کیس کا تحریری حکم نامہ جاری کردیا۔

    حکم نامے میں سرکاری املاک پر سیاسی جھنڈے ، بینرز اور پوسٹرز لگانے والوں کے خلاف فوری مقدمہ درج کرنے کا حکم دیا گیا ہے۔

    عدالت نے کہا کہ پوسٹرز ، بینرز آویزاں کرنے والے سیاسی رہنماؤں اور متعلقہ جماعت کے صوبائی صدر کے خلاف بھی مقدمہ درج کیا جائے اور میئر کراچی، کمشنر، تمام ٹاؤن اور کنٹونمنٹ بورڈز کو عوامی مقامات/سرکاری املاک سے تمام بورڈز ہٹانے کا حکم دیا۔

    عدالت کا کہنا تھا کہ جس پروڈکٹ کا اشتہار ہو اس کمپنی کے سی ای او کے خلاف بھی مقدمہ درج کیا جائے۔

    تحریری حکم نامے میں کے ایم سی اور تمام کنٹونمنٹ بورڈز کو اشتہارات کے تمام ٹھیکوں کی تفصیلات بھی پیش کرنے کا بھی حکم دیا۔

    عدالت نے کہا کہ شہر بھر میں بھرپور ایکشن لیا جائے، تمام ادارے 29 جنوری تک عمل درآمد رپورٹ پیش کریں۔

    حکم نامے میں عدالت کے فیصلے کی نقل الیکشن کمیشن کو بھی فراہم کرنے کی ہدایت کی گئی ہے۔

  • وزیر اعظم عمران خان کا عوام کی فلاح و بہبود کے لیے ایک اور اقدام

    وزیر اعظم عمران خان کا عوام کی فلاح و بہبود کے لیے ایک اور اقدام

    اسلام آباد: وزیر اعظم عمران خان نے ہدایت کی ہے کہ وزارتوں اور وفاقی اداروں کی استعمال نہ ہونے والی املاک کو بروئے کار لایا جائے اور حاصل ہونے والی آمدن کو عوام کی فلاح و بہبود کے لیے استعمال کیا جائے۔

    تفصیلات کے مطابق وزیر اعظم عمران خان کی زیر صدارت اجلاس منعقد ہوا جس میں وزارتوں اور وفاقی اداروں کی غیر استعمال املاک کو بروئے کار لانے کا جائزہ لیا گیا۔

    وزیر اعظم کو سرکاری املاک اور ممکنہ نجکاری میں پیش رفت پر بریفنگ دی گئی۔ سیکریٹری نجکاری کا کہنا تھا کہ ہر وزارت کو کم از کم 3 املاک کی نشاندہی کرنے کی ہدایت کی گئی۔

    سیکریٹری نے بتایا کہ پہلے مرحلے میں اب تک 32 املاک کی نشاندہی کی گئی ہے۔ املاک کا تخمینہ لگانے کے لیے مالی مشیر کی خدمات حاصل کی گئی ہیں۔ املاک اور جائیدادوں کی مارکیٹنگ دبئی ایکسپو میں کی جائے گی۔

    وزیر اعظم کا کہنا تھا کہ سالوں سے غیر استعمال اربوں کی جائیدادوں کا مثبت استعمال ضروری ہے۔ حاصل ہونے والی آمدن کو عوام کی فلاح و بہبود کے لیے استعمال کریں گے۔

    انہوں نے کہا کہ آمدن کو اسکول، کالجوں اور اسپتالوں کی تعمیر میں استعمال کریں گے۔ اربوں کی جائیدادوں کے باوجود مختلف ادارے سالانہ خسارہ اٹھا رہے ہیں۔

    وزیر اعظم کا کہنا تھا کہ ماضی میں بیش قیمت جائیدادوں کو استعمال میں نہ لا کر مجرمانہ غفلت کی گئی۔ غیر استعمال املاک کے مثبت استعمال میں رکاوٹ پر سخت کارروائی کی جائے گی۔

    وزیر اعظم نے وفاقی اور صوبائی حکومتوں کو متعلقہ امور ایک ہفتے میں حل کرنے کی ہدایت بھی کی۔