حالیہ پاک بھارت کشیدگی کے بعد پاکستانی موقف سے دنیا کو آگاہ کرنے کے لیے بلاول بھٹو کل سے سرکاری دورہ امریکا کا آغاز کریں گے۔
بھارتی جنگی جنون اور حالیہ پاک بھارت کشیدگی اور سرحد پار سے مسلسل دھمکی آمیز بیانات کے بعد پاکستان کے امن پسند موقف سے دنیا کو آگاہ کرنے کے لیے پی پی پی چیئرمین اور سابق وزیر خارجہ بلاول بھٹو کی سربراہی میں پارلیمانی کمیٹی کل سے غیر ملکی دورے شروع کر رہا ہے۔
سفارتی ذرائع کے مطابق اس وقت بلاول بھٹو زرداری کے علاوہ سابق وزیر خارجہ حنا ربانی کھر اور جلیل عباس جیلانی امریکا میں موجود ہیں جب کہ پارلیمانی کمیٹی کے دیگر اراکین امریکا میں اس وفد میں شامل ہو جائیں گے۔
ان غیر ملکی دوروں کا آغاز امریکا سے شروع ہوگا اور بلاول بھٹو کل سے امریکا میں سرکاری دورے کا باقاعدہ آغاز کریں گے
وزیراعظم شہباز شریف کی ہدایت پر بلاول بھٹو کی سربراہی میں پارلیمانی کمیٹی امریکا اور یورپی ممالک کا دورہ کر رہی ہے۔ بلاول بھٹو 2 جون سے امریکی حکام سے باضابطہ ملاقاتیں شروع کرینگے۔
ذرائع کے مطابق واشنگٹن میں بلاول بھٹو کی سربراہی میں کمیٹی امریکی حکام سے ملاقاتیں کریگی۔ ان ملاقاتوں میں امریکی حکام کو پاک بھارت کشیدگی پر پاکستان کے موقف سے متعلق بریفنگ دی جائے گی اور بھارت کے پروپیگنڈے سے بھی آگاہ کیا جائے گا۔
ذرائع نے یہ بھی بتایا کہ بلاول بھٹو اور کمیٹی اراکین کی نیویارک میں اقوام متحدہ کے سیکریٹری جنرل انتونیو گوتریس سے بھی ملاقات متوقع ہے جب کہ بلاول بھٹو کی اقوام متحدہ جنرل اسمبلی کے صدر سے بھی ملاقات ہو سکتی ہے۔
وفد اقوام متحدہ میں پاکستان کے مستقبل مندوب عاصم افتخار سے بھی ملاقات کرے گی۔
واضح رہے کہ گزشتہ ماہ اپریل میں پہلگام فالس فلیگ آپریشن کی آڑ میں بھارت نے جنگی جارحیت کرتے ہوئے پاکستان کے شہری علاقوں میں رات کی تاریکی میں حملے کر کے درجنوں بے گناہ پاکستانیوں کو شہید کر دیا تھا۔
پاک فوج نے فوری جوابی کارروائی کرتے ہوئے بھارت کا غرور تین رافیل طیاروں سمیت 6 جنگی جہازوں اور درجنوں اسرائیلی ساختہ ڈرونز کو مار گرایا۔
بعد ازاں بھارتی جنگی جنون میں کمی نہ آنے پر پاک فوج نے 10 مئی کی علی الصباح آپریشن بنیان مرصوص کے ذریعہ صرف چند گھنٹوں میں بھارت کو گھٹنے ٹیکنے اور جنگ بندی کی اپیل کرنے پر مجبور کر دیا تھا اور امریکا کو درمیان میں آکر جنگ بندی کرانا پڑی۔
تاہم چند گھنٹوں پر مشتمل آپریشن بنیان مرصوص میں پاک فضائیہ نے کمال مہارت کا مظاہرہ کرتے ہوئے بھارت کا ایئر ڈیفنس سسٹم تباہ کر دیا تھا۔
