سرکاری پیداواری یونٹس کے پاور پلانٹس کی نیلامی کا دوسرا مرحلہ مکمل ہو گیا ہے اور تین پاور پلانٹس میں سے صرف ایک کی بولی لگی۔
اے آر وائی نیوز کے مطابق سرکاری پیداواری یونٹس کے پاور پلانٹس کی نیلامی کا دوسرا مرحلہ آج اسلام آباد میں مکمل ہو گیا۔ نیلامی میں تین پاور پلانٹس کو رکھا گیا تھا، تاہم صرف ایک سرکاری پلانٹ کی بولی لگی۔
پاور ڈویژن حکام کے مطابق آج مجموعی طور پر 2362 میگا واٹ کے تین پاور پلانٹس نیلامی کے لیے پیش کیے گئے تھے۔ ان میں سے صرف 800 میگاواٹ والے جامشورو پاورپلانٹ کے لیے خریدار کمپنی سامنے آئی۔
صدیق اینڈ سنز کمپنی نے جامشورو تھرمل پاور پلانٹ کی خریداری کیلیے بولی لگائی۔ حکومت نے جامشورو پاور پلانٹ کی ریزرو پرائس 9 ارب 97 کروڑ مقرر کی تھی۔
پاور ڈویژن حکام کا کہنا ہے کہ جنکو ٹو کے 6 پاور پلانٹس کی نیلامی کا عمل مؤخر کردیا گیا ہے اور اب یہ نیلامی 30 مئی کو دوبارہ شروع کی جائے گی۔
اس نیلامی میں جنکو تھری کیلیے کوئی بھی بولی دہندہ نیلامی میں شامل نہ ہوا۔ اس میں مظفر گڑھ اور فیصل آباد پاور اسٹیشن شامل ہیں اور دونوں پاور پلانٹس کی پیداواری صلاحیت 1482 میگاواٹ ہے۔ حکومت نے جنکو تھری پاور پلانٹس کی ریزرو پرائس 26 ارب 62 کروڑ مقرر کی تھی۔
پاور ڈویژن کے مطابق پرانے پلانٹس کی بولی کا انتظام کیا تھا جس کا پہلا فیز مکمل ہوگیا تھا۔ پہلے فیز میں 9 ارب کی بولیاں موصول ہوئیں۔ نیسپاک نے بولی کے عمل میں معاونت کی جب کہ مظفر گڑھ اور فیصل آباد کیلیے کوئی بولی نہیں آئی۔
