ARYNews.tv | Urdu – Har Lamha Bakhabar

Tag: سری لنکا

  • سری لنکا کو مطلوب ڈرگ مافیا کا سرغنہ دبئی سے گرفتار

    سری لنکا کو مطلوب ڈرگ مافیا کا سرغنہ دبئی سے گرفتار

    دبئی: سری لنکا کو متعدد مقدمات میں مطلوب ڈرگ مافیا کے سرغنہ کو دبئی سے گرفتار کرلیا گیا۔

    عرب میڈیا کے مطابق دبئی پولیس اور سری لنکا سیکیورٹی فورسز نے دبئی کے ہوٹل میں مشترکہ کارروائی کرتے ہوئے سری لنکا کو مطلوب ڈرگ مافیا کے سرغنہ مکن ڈیور مدہش کو گرفتار کرلیا۔

    ملزم ماضی میں سری لنکا کی جیل میں قید کی سزا بھگت چکا ہے جبکہ ملزم مکن ڈیور مدہش سری لنکا کو متعدد مقدمات میں مطلوب تھا۔

    عرب میڈیا کے مطابق ملزم مکن ڈیور مدہش کے ہمراہ 20 دیگر افراد کو حراست میں لیا گیا ہے جس میں معروف گلوکار امل پریرا بھی شامل ہیں۔

    سری لنکا کی سیکیورٹی فورسز اور دبئی پولیس کے مشترکہ آپریشن میں ملزمان کے قبضے سے بھاری تعداد میں منشیات برآمد کی گئی ہیں۔

    مطلوب ملزم مکن ڈیور مدہش کو سری لنکا کے حوالے کرنے سے متعلق دونوں ملکوں کے حکام کی جانب سے رابطے جاری ہیں۔

    سری لنکن میڈیا کی رپورٹ کے مطابق گرفتار معروف سنگر امل پریرا انڈر ورلڈ ڈان ندی مل کا بیٹا ہے، گرفتار ملزمان کو دبئی حکام کی جانب سے ڈی پورٹ کیے جانے کا امکان ہے۔

    یہ پڑھیں: دبئی : ایئرپورٹ سے مسافروں کا سامان چوری کرنے والا گروہ گرفتار

    واضح رہے کہ گزشتہ سال اگست میں دبئی کی ایئرپورٹ سیکیورٹی فورسز نے ہوائی اڈے سے مسافروں کا سامان چوری کرنے والے 3 ایشیائی شہریوں کو گرفتار کیا تھا۔

    غیر ملکی خبر رساں ادارے کا کہنا تھا کہ تینوں ملزمان نے پولیس تفیش کے دوران ایئرپورٹ پر مسافروں کے بیگوں سے سامان چوری کرنے کا اعتراف کیا، جس کے بعد پولیس نے مذکورہ ملزمان کو عدالت کے حکم پر جیل منتقل کردیا۔

  • نیوزی لینڈ نے سری لنکا کو شکست دے کر ون ڈے سیریز جیت لی

    نیوزی لینڈ نے سری لنکا کو شکست دے کر ون ڈے سیریز جیت لی

    تورنگا : نیوزی لینڈ نے سری لنکا کو21رنز سے شکست دے کر ون ڈے سیریز جیت لی، پریرا کے140رنز بھی ٹیم کو ہارنے سے نہ بچا سکے، نیوزی لینڈ ہارتے ہارتے بچ گیا۔

    تفصیلات کے مطابق ماؤنٹ مونگانوئی اسٹیڈیم میں نیوزی لینڈ نے سری لنکا کے درمیان کھیلے جانے والے دوسرے ون ڈے میں نیوزی لینڈ ہارتے ہارتے بچ گیا، دوسرے ایک روزہ میچ میں نیوزی لینڈ نے پہلے بیٹنگ کرتے ہوئے مقررہ50اوورز میں سات وکٹوں کے نقصان پر319رنز بنائے۔

    روز ٹیلر نے90کولن منرو نے87 اور نیشم نے64رنز کی شاندار اننگز کھیلی، تین سو بیس رنز کے ہدف کے تعاقب میں سری لنکا کی سات وکٹیں ایک سو اٹھائیس پر گرگئیں۔

    نیوزی لینڈ نے سری لنکا کے خلاف سیریز تو جیت لی لیکن تھسارا پریرا کی دھواں دھار بیٹنگ نے نیوزی لینڈ کے مداحوں کی سانسیں ضرور روک دیں، بظاہر میچ ختم ہوچکا تھا، تھسارا پریرا نے جارحانہ اننگز سے میچ میں پھر جان ڈال دی۔

    ہرچھکا پہلے سے بہتر تھا، تیرہ چھکے لگا کر سری لنکا کو فتح کے بائیس رنز قریب لے آئے لیکن ایک اور چھکا لگانے کی کوشش میں پریرا آؤٹ ہوگئے، کیویز نے منرو اور ٹیلر کی جارحانہ بیٹنگ کی بدولت پہلے کھیلتے ہوئے تین سو انیس رنزبنائے تھے۔

    جواب میں سری لنکا کی پوری ٹیم 47 ویں اوور میں 298 رنز بنا کر آﺅٹ ہوگئی۔ سری لنکن بلے باز پریرا کے140اور گناتھیلاکا کے71رنز بھی ٹیم کو شکست سے نہ بچاسکے۔

  • پوسٹر کو رشوت کیوں دی؟ سری لنکن نوجوان مشکل میں پڑ گئے

    پوسٹر کو رشوت کیوں دی؟ سری لنکن نوجوان مشکل میں پڑ گئے

    کولمبو:  پولیس کی رشوت خوری کو طنز کا نشانہ بنانے والے سری لنکن نوجوان اس وقت مشکل میں پڑ گئے جب انھیں ایک پوسٹر کو رشوت دینے کے ’جرم‘ میں گرفتار کر لیا گیا۔

    تفصیلات کے مطابق سری لنکا میں دو شہریوں نے ٹریفک پولیس اہل کار کے ایک کٹ آؤٹ پوسٹر کو ’رشوت‘ دی، اور اس عمل کی ویڈیو بنا کر انٹر نیٹ پر ڈال دی۔

    [bs-quote quote=”سوشل میڈیا پر عوام نے نوجوانوں کے عمل کو جرم کی بجائے طنز قرار دے دیا۔” style=”style-7″ align=”left” color=”#dd3333″][/bs-quote]

    انٹرنیٹ پر ویڈیو وائرل ہوتے ہی سری لنکن پولیس اپنی ساکھ خطرے میں پڑتے میں دیکھ کر حرکت میں آ گئی اور پولیس اہل کار کے قدِ آدم پوسٹر کو رشوت دینے اور ویڈیو بنانے والے نوجوان کو گرفتار کر لیا۔

    پولیس نے موٹر سائیکل سوار دوستوں کو عوامی املاک اور محکمے کی ساکھ کو نقصان پہنچانے کے الزام میں گرفتار کیا، تاہم بعد میں دونوں کو ضمانت پر رہا کیا گیا۔

    یہ بھی پڑھیں:  سری لنکا میں آسمان سے درختوں کی بارش

    خیال رہے کہ محکمہ پولیس کی جانب سے عوام کو تیز رفتاری سے روکنے کے لیے گتے سے بنے ’ٹریفک اہل کار‘ مرکزی شاہراہوں پر نصب کیے گئے ہیں۔

    دو شہریوں کی گرفتاری پر سوشل میڈیا استعمال کرنے والوں نے بھی تنقید کرتے ہوئے اس عمل کو جرم کی بہ جائے طنز قرار دیا، ان کا کہنا تھا کہ لڑکوں نے اپنے عمل سے ایک اہم پیغام دیا ہے۔

  • ایشیا کپ 2020 کی میزبانی پاکستان کو مل گئی

    ایشیا کپ 2020 کی میزبانی پاکستان کو مل گئی

    ڈھاکا: پاکستانی کرکٹ شائقین کے لیے اچھی خبر ہے کہ ایشیا کپ کرکٹ ٹورنامنٹ 2020 کی میزبانی پاکستان کو مل گئی۔

    تفصیلات کے مطابق میزبانی پاکستان کو دینے کا فیصلہ اییشین کرکٹ کونسل کے اجلاس میں ہوا تاہم ایونٹ کے میچز کہاں ہوں گے اس کا فیصلہ ایشیا کپ شروع ہونے سے کچھ عرصہ قبل کیا جائے گا۔

    ایشیا کپ کرکٹ ٹورنامنٹ ستمبر 2020 میں کھیلا جائے گا اور اس بار یہ ایونٹ ٹی ٹوئنٹی فارمیٹ پر مشتمل ہوگا۔

    [bs-quote quote=”ایشیا کپ کا ایک فارمیٹ 50 اوورز پر مشتمل ہوتا ہے اور دوسرا ٹی ٹوینٹی فارمیٹ کے تحت کھیلا جاتا ہے” style=”style-6″ align=”left”][/bs-quote]

    رواں برس ستمبر میں ایشیا کپ کرکٹ ٹورنامنٹ 50 اوورز کے فارمیٹ کے تحت متحدہ عرب امارات میں کھیلا گیا تھا جس میں بھارت نے بنگلہ دیش کو شکست دے کر فائنل میں کامیابی حاصل کی تھی۔

    رپورٹ کے مطابق یہ ٹورنامنٹ پہلے بھارت میں ہونا تھا تاہم بھارت نے پاکستان کی وجہ سے ایشیا کپ کی میزبانی سے انکار کردیا تھا۔

    بی سی سی آئی کی گورننگ باڈی کے اجلاس میں فیصلہ کیا گیا تھا کہ پاکستان کی موجودگی میں وہ ایشیا کپ کی میزبانی نہیں کرسکتے۔

    خیال رہے کہ ایشیا کپ میں پاکستان، بھارت، سری لنکا، بنگلہ دیش اور افغانستان کی ٹیمیں شرکت کرتی ہیں، ایشیا کپ کا ایک فارمیٹ 50 اوورز پر مشتمل ہوتا ہے اور دوسرا ٹی ٹویںٹی فارمیٹ کے تحت کھیلا جاتا ہے۔

  • سیاسی بحران : سری لنکا کے صدرمیتھری پالا سری سینا نے پارلیمنٹ کو معطل کردیا

    سیاسی بحران : سری لنکا کے صدرمیتھری پالا سری سینا نے پارلیمنٹ کو معطل کردیا

    کولمبو : سری لنکا کے صدر نے پارلیمنٹ کو معطل کردیا ہے، انہوں نے گزشتہ روز وزیر اعظم کو بھی عہدے سے برطرف کردیا تھا جنہوں نے عہدہ چھوڑنے سے انکار کردیا ہے۔

    غیر ملکی خبر رساں ایجنسی کے مطابق سری لنکا کے صدر میتھری پالا سری سینا نے آئین کے آرٹیکل 70 کے تحت اپنے اختیارات کو استعمال کرتے ہوئے پارلیمنٹ کو معطل کر دیا ہے جس کا اطلاق سولہ نومبر تک ہوگا۔

    پارلیمنٹ کی معطلی کا فیصلہ اس وقت سامنے آیا جب سری لنکا کے صدر اور وزیراعظم کے درمیان اقتدار کی چپقلش اور اختلافات کی خبروں کا بازار گرم تھا، سری لنکن صدر نے گزشتہ روز رانیل وکرما سنگھے کو وزارت عظمیٰ کے عہدے سے ہٹا کر ان کی جگہ مہندا راجا پاکسے کو وزیراعظم بنایا تھا، برخاست کیے گئے وزیراعظم نے اپنا منصب چھوڑنے سے انکار کر دیا ہے۔

    اس سے قبل برطرف کیے جانے والے وزیر اعظم رانیل وکرمے سنگھے نے پارلیمان کا ہنگامی اجلاس طلب کرنے کا مطالبہ کیا تھا۔ میڈیا سے گفتگو کرتے ہوئے ان کا کہنا تھا کہ وہ اب بھی آئینی وزیر اعظم ہیں اسی دوران ان کو اطلاع دی گئی کہ صدر میتھری پالا سری سینا سولہ نومبر تک225رکنی ملکی پارلیمان کو معطّل کردیا ہے۔

    علاوہ ازیں کولمبو میں موجودہ صورتحال پر عوام کی جانب سے کسی قسم کا ردعمل ظاہر نہیں ہوا ہے تاہم پولیس حکام کی جانب سے کسی بھی ناخوشگوار واقعے سے نمٹنے کے لیے تمام اہلکاروں کی چھٹیاں منسوخ کردی گئی ہیں۔

  • سری لنکا میں وکٹ فکسنگ کی سازش پکڑی گئی

    سری لنکا میں وکٹ فکسنگ کی سازش پکڑی گئی

    کولمبو:عرب ٹی وی کے صحافی نے اسٹنگ آپریشن میں سری لنکا اورانگلینڈ کے درمیان رواں برس نومبر میں گال ٹیسٹ کی وکٹ فکس کرنے کی سازش بے نقاب کردی۔

    تفصیلات کے مطابق اسپاٹ فکسنگ، میچ فکسنگ کے بعد وکٹ فکسنگ کا اسکینڈل سامنے آگیا۔ سری لنکا اورانگلینڈ کے درمیان نومبرمیں گال ٹیسٹ کی وکٹ فکس کی جانی تھی، گراؤنڈ اسٹاف نے گال ٹیسٹ کے لیے وکٹ فکسنگ کی یقین دہانی کرا دی تھی۔

    وکٹ فکسنگ کی سازش میں سابق بھارتی فرسٹ کلاس کرکٹررابن مورس اورگال اسٹیڈیم کے اسسٹنٹ مینیجر تھرانگا اندیکا شامل ہیں۔

    صحافی نے تاجرکے روپ میں گال اسٹیڈیم کے اسسٹنٹ مینیجرتھرانگا اندیکا سے ملاقات کی، سابق بھارتی فرسٹ کلاس کرکٹررابن مورس بھی وہاں موجود تھے۔

    رپورٹرنے پوچھا کہ کیا ٹیسٹ میچ 4 دن میں ختم ہوجائے گا؟ جس پر گال اسٹیڈیم کے اسسٹنٹ مینیجر تھرانگا اندیکا نے جواب دیا چار دن کیا، ڈھائی دن میں ہی ختم کردیں گے۔

    وکٹ فکسرتھرانگا اندیکا نے بھارت اور سری لنکا کے درمیان گال ٹیسٹ کی وکٹ کو بھی فکس کرنے کا اعتراف کیا جس میں بھارت نے 6 سو سے زائد رنز بنائے تھے۔

    یاد رہے کہ اکتوبر2015 کو آئی سی سی کی جانب سے سابق سری لنکن ٹیسٹ کرکٹر اور گال کرکٹ اسٹیڈیم کے کیوریٹر جیا آنندا ورنا ویرا کو فکسنگ کے شبے میں معطل کیا گیا تھا۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • سری لنکا میں آسمان سے درختوں کی بارش

    سری لنکا میں آسمان سے درختوں کی بارش

    کیا آپ نے کبھی آسمان سے درختوں کو برستے ہوئے دیکھا یا سنا ہے؟ شاید یہ سننے میں آپ کو عجیب لگے لیکن سری لنکا میں ایسا ہو رہا ہے جہاں آسمان سے درخت ’برستے‘ ہیں۔

    سری لنکا میں مختلف خالی مقامات پر ہیلی کاپٹر کے ذریعہ کھاد کے ایسے گولے برسائے جارہے ہیں جو کچھ عرصے بعد اگنا شروع ہوجاتے ہیں۔ سری لنکا کو یہ ضرورت اس لیے پیش آئی کیونکہ صرف گذشتہ چند عشروں میں اس ملک کے آدھے جنگلات کو مختلف مقاصد کے لیے کاٹا جاچکا ہے۔

    مزید پڑھیں: دنیا کے طویل ترین درختوں کا کلون

    اب سری لنکا کا ارادہ ہے کہ سنہ 2017 تک وہ اپنے اس کھوئے ہوئے اثاثے کو کسی حد تک واپس حاصل کرلے۔

    آسمان سے برسائے جانے والے یہ گولے چکنی مٹی، کھاد اور مختلف بیجوں سے تیار کیے گئے ہیں جن سے کچھ عرصہ بعد ہی پودے اگ آتے ہیں۔

    یہ طریقہ کار جاپانی کسانوں کا ایجاد کردہ ہے جنہوں نے کاشت کاری میں انسانی محنت کم کرنے کے لیے اسے ایجاد کیا۔

    واضح رہے کہ اقوام متحدہ کے ادارہ برائے خوراک و زراعت ایف اے او کے مطابق ہر سال دنیا بھر میں ایک کروڑ 80 لاکھ ہیکٹرز کے رقبے پر مشتمل جنگلات کاٹ دیے جاتے ہیں۔

    مزید پڑھیں: جنگلات کے قریب وقت گزارنا بے شمار فوائد کا باعث

    ماہرین کا کہنا ہے کہ دنیا بھر میں موجود گھنے جنگلات جنہیں رین فاریسٹ کہا جاتا ہے، اگلے 100 سال میں مکمل طور پر ختم ہوجائیں گے۔

    جنگلات کی کٹائی عالمی حدت میں اضافہ یعنی گلوبل وارمنگ کا ایک اہم سبب ہے جس کے باعث زہریلی گیسیں فضا میں ہی موجود رہ جاتی ہیں اور کسی جگہ کے درجہ حرارت میں اضافہ کرتی ہیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • سری لنکا: مسلم کش فسادات میں سابق صدراورپولیس کے شامل ہونے کا انکشاف

    سری لنکا: مسلم کش فسادات میں سابق صدراورپولیس کے شامل ہونے کا انکشاف

    کولمبو : سری لنکا میں مسلم مخالف فسادات میں سابق صدر مہندرا راجا پاکسے، اس کے حامی سياستدان اور پوليس اہلکاروں کے شامل ہونے کا انکشاف ہوا ہے۔

    تفصیلات کے مطابق سری لنکا کے وسطی شہر کينڈی ميں مسلمانوں کے سينکڑوں مکانات، مساجد اور دکانوں پر اسی مہينے منظم حملے کيے گئے تھے، یہ حملے تین دن تک جاری رہے۔

    ان خونی فسادات میں تين افراد ہلاک اور بيس سے زائد زخمی ہوئے، فسادات کے بعد ملک میں ایمرجنسی نافذ کرکے سوشل میڈیا پر بھی پابندی عائد کردی گئی تھی۔

    صورتحال کی سنگینی کا نوٹس لیتے ہوئے سری لنکا کے صدر ميتھريپالا سريسينا نے تحقيقات کا حکم ديا تھا۔ ایک خبر رساں ادارے کی ايک تحقيقاتی رپورٹ ميں عينی شاہدين، سرکاری اہلکاروں اور سی سی ٹی وی فوٹيج کا حوالہ ديتے ہوئے کہا گیا ہے کہ سری لنکا ميں مسلمانوں پر اسی ماہ ہونے والے پرتشدد حملوں ميں سابق صدر مہندرا راجا پاکسے، ان کے حامی سياستدان اور پوليس اہلکار بھی شامل تھے۔

    رپورٹ کے مطابق فسادات کے متاثرين اور عينی شاہدين نے دعویٰ کيا ہے کہ خصوصی پيرا ملٹری پوليس يونٹ (ایس ٹی ایف) کے اہلکاروں نے مسلمانوں کے مقامی رہنماؤں اور اماموں کو تشدد کا نشانہ بنايا۔

    دوسری جانب ايک پريس کانفرنس ميں راجا پاکسے نے ايسے تمام تر الزامات کو مسترد کرتے ہوئے کہا کہ ان کہ خلاف يہ الزامات سياسی نوعيت کے ہيں۔ انہوں نے کہا کولمبو حکومت نے اپنی خامياں چھپانے اور مسلمانوں کے ووٹ حاصل کرنے کے ليے فسادات کو طول دی۔

    واضح رہے کہ سری لنکا ميں مسلم مخالف فسادات، خطے ميں بڑھتے ہوئے بدھ قوم پرست اور مسلم مخالف رجحانات کی ايک اور مثال ہيں، سری لنکا کی کل اکيس ملين کی آبادی ميں ستر فيصد بدھ مذہب کے ماننے والے ہيں جبکہ مسلمانوں کی شرح نو فيصد ہے۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

     

  • صدر ممنون حسین اور سری لنکن صدر کے درمیان ملاقات

    صدر ممنون حسین اور سری لنکن صدر کے درمیان ملاقات

    اسلام آباد: صدر مملکت ممنون حسین اور سری لنکن صدر متھری پالا سری سینا کے درمیان ملاقات ہوئی۔ ملاقات میں علاقائی امن اور ترقی کے لیے مل کر کام کرنے پر اتفاق کیا گیا۔

    تفصیلات کے مطابق سری لنکن صدر متھری پالا سری سینا 3 روزہ سرکاری دورے پر پاکستان میں موجود ہیں۔

    سری لنکن صدر نے آج صدر مملکت ممنون حسین سے ملاقات کی۔ ملاقات میں علاقائی امن اور ترقی کے لیے مل کر کام کرنے پر اتفاق کیا گیا۔

    دونوں صدور نے سارک تنظیم کو مزید مؤثر بنانے اور باہمی تجارت میں اضافے پر بھی اتفاق کیا۔

    سری لنکا کے صدر متھری پالا سری سینا کا کہنا تھا کہ سری لنکن طلبا، افسران کے لیے پاکستانی اسکالر شپ پر شکر گزار ہیں۔ صدر ممنون حسین نے کہا کہ پاکستان اور سری لنکا کے درمیان سفری سہولتوں میں مزید اضافہ ہونا چاہیئے۔

    سری لنکا کے صدر نے صدر ممنون حسین کو قورنیا بھی تحفے میں پیش کیے۔

    یاد رہے کہ سری لنکن صدر نے گزشتہ روز یوم پاکستان کی پریڈ میں بھی شرکت کی تھی۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • سری لنکا کے صدر3 روزہ دورے پرآج پاکستان پہنچیں گے

    سری لنکا کے صدر3 روزہ دورے پرآج پاکستان پہنچیں گے

    اسلام آباد : سری لنکا کے صدر متھری پالا سری سینا تین روزہ دورے پر آج پاکستان پہنچیں گے، دورے کے دوران وہ صدر اور وزیراعظم سے ملاقات کریں گے۔

    تفصیلات کے مطابق صدر ممنون حسین کی دعوت پر سری لنکا کے صدر متھری پالا سری سنیا آج 3 روزہ سرکاری دورے پر پاکستان پہنچیں گے۔

    سری لنکن صدر متھری پالا سری سنیا اپنے دورے کے دوران یوم پاکستان کے موقع پر ہونے والی سرکاری تقریبات میں سرکاری مہمان کے طور پر شرکت کریں گے۔

    معزز مہمان پاکستان میں اپنے قیام کے دوران دوران سری لنکا اور پاکستان کے درمیان باہمی تعلقات کو فروغ دینے کے لیے بات چیت کریں گے اور اس دوران اعلیٰ سیاسی اور عسکری قیادت سے بھی ملاقاتیں کریں گے۔

    ذرائع کے مطابق سری لنکن صدر متھری پالا سری سنیا کے دورے کے دوران دونوں ممالک کے درمیان مختلف معاہدوں پر بھی دستخط کیے جائیں گے۔

    وزیراعظم شاہد خاقان عباسی اورسری لنکن صدر کی ملاقات

    خیال رہے کہ گزشتہ سال 20 ستمبر کو نیویارک میں وزیراعظم شاہد خاقان عباسی کی سری لنکا کے صدر سے ملاقات ہوئی تھی جس میں دونوں ممالک میں قریبی تعلقات کو مزید مضبوط بنانے کے عزم کا اعادہ کیا تھا۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔