Tag: سری لنکن ٹیم

راولپنڈی: پاکستان میں 10 سال بعد انٹرنیشنل ٹیسٹ کرکٹ کی رونقیں بحال ہو گئی ہیں، سری لنکن ٹیم پریکٹس سیشن کے لیے راولپنڈی کرکٹ اسٹیڈیم میں موجود ہے، تاہم گراؤنڈ پر اس وقت گہرے بادلوں کے ڈیرے ہیں، اور بارش کا امکان ہے۔

دوسری طرف پاکستان کرکٹ بورڈ کے چیئرمین احسانی مانی نے بنگلا دیشی ٹیم کے پاکستان کے دورے کے لیے امید کا بھرپور اظہار کرتے ہوئے کہا ہے کہ اعلیٰ سطح رابطوں کے بعد بنگلا دیشی ٹیم پاکستان ضرور آئے گی۔

اس وقت کرکٹ اسٹیڈیم راولپنڈی میں سری لنکن ٹیسٹ ٹیم پریکٹس کے لیے موجود ہے، آئی سی سی میچ آفیشلز بھی اسٹیڈیم میں موجود ہیں، پاکستان، سری لنکن ٹیمیں کل پہلا ٹیسٹ اسی اسٹیڈیم میں کھیلیں گی، قبل ازیں پی سی بی کے چیف ایگزیکٹیو وسیم خان نے اسٹیڈیم میں پچ کا معائنہ کیا، ہیڈ کوچ مصباح الحق اور سری لنکن ٹیم ہیڈ کوچ مکی آرتھر بھی معائنے کے وقت ان کے ہم راہ تھے۔

دریں اثنا، چیئرمین پی سی بی احسان مانی نے کہا ہے کہ بنگلا دیش کے دورے سے متعلق مثبت جواب کا امکان ہے، وزیر اعظم عمران خان نے بنگلا دیشی وزیر اعظم کو فون کیا تھا، وزیر خارجہ شاہ محمود قریشی بھی بنگلا دیشی وزیر خارجہ سے مل چکے ہیں، بنگلا دیش نے دورے سے منع کیا تو وجہ بتانا ہوگی، بنگلا دیشی سیکورٹی وفد کی رپورٹ بھی مثبت ہے۔

احسان مانی کا کہنا تھا کہ وہ پُر امید ہیں کہ بنگلا دیش کی ٹیم ضرور پاکستان آئے گی، 2021 میں انگلینڈ، 2022 میں آسٹریلیا کے دورۂ پاکستان کے لیے بھی پُر امید ہوں، پاکستان آئی سی سی کے اضافی ٹورنامنٹس کے حق میں ہے، بھارت، آسٹریلیا اور انگلینڈ نے آئی سی سی کے 2 ٹورنامنٹس کی مخالفت کی، تاہم آئی سی سی کے اضافی ٹورنامنٹس سے ممبر ممالک کو 700 ملین ڈالرز کا فائدہ ہو سکتا ہے۔

 کولمبو: سری لنکا کی ٹیسٹ کرکٹ ٹیم کے کپتان دمتھ کرونارتنے کو شراب کے نشے میں گاڑی چلانے پر پولیس نے حراست میں لے لیا۔

غیرملکی خبررساں ادارے کی رپورٹ کے مطابق دمتھ کرونارتنے نشے کی حالت میں گاڑی چلا رہے تھے کہ اسی دوران اُن کی گاڑی کو حادثہ پیش آیا جس کے نتیجے مخالف سمت سے آنے والی کار کا ڈرائیور زخمی ہوا۔

پولیس کے مطابق متاثرہ گاڑی کے ڈرائیور کو معمولی چوٹیں آئیں جسے طبی امداد کے بعد اسپتال سے گھر بھیج دیا گیا۔ تفتیشی حکام کے مطابق انہوں نے سی سی ٹی وی فوٹیج کی مدد سے واقعے کی تحقیقات کا آغاز کیا۔

کیمرے میں نظر آنے والی گاڑی کا نمبر جب چیک کیا گیا تو یہ سرلنکن کپتان کے نام تھی اور جب فوٹیج کو غور سے دیکھا گیا تو کرونارتنے ہی اسے ڈرائیو کررہے تھے، پولیس نے صبح پانچ بجکر 40منٹ پر انہیں بوریلا میں گرفتار کیا۔

مزید پڑھیں: نشے میں دھت ہوکر جہاز اڑانے والا پائلٹ گرفتار

دوران حراست دمتھ نے اعتراف کیا کہ وہ نشے کی حالت میں تھے جس پر اُن کے خلاف مقدمہ درج کیا گیا، بعد ازاں پولیس نے انہیں ضمانت پر رہا کیا۔

پولیس حکام کے مطابق مقدمے کی سماعت کے لیے درخواست دائر کی جائے گی، قانونی شکنی کرنے پر دمتھ کرونارتنے کو  اب عدالت میں کا سامنا کرنا پڑے گا۔

دوسری جانب سری لنکن کرکٹ بورڈ نے واقعے پر افسوس کا اظہار کرتے ہوئے ٹیسٹ کرکٹ ٹیم کے کپتان کو طلب کرلیا تاکہ اُن کے خلاف کارروائی عمل میں لائی جائے۔

تجزیہ نگاروں کا کہنا ہے کہ مذکورہ واقعہ کے کرونارتنے کے پیشہ ورانہ کیریئر پر بھی اثرات مرتب ہو سکتے ہیں کیونکہ کرکٹ بورڈ رپورٹ کا انتظار کررہی ہے اور اگر عدالت نے انہیں سزا سنا دی تو پھر دمتھ سے نہ صرف کپتانی واپس لی جائے گی بلکہ اُن کے میچ کھیلنے پر بھی پابندی عائد کی جائے گی۔

یہ بھی پڑھیں: نشے میں‌ دھت بندر نے تباہی مچادی، ویڈیو وائرل

کرکٹ بورڈ نے اپنے بیان میں کہا ہے کہ کرونارتنے کنٹریکٹ کے حامل کھلاڑی ہیں، اُن کے خلاف ضابطے کے مطابق تحقیقات کے بعد ہر صورت کارروائی عمل میں لائی جائے گی۔