سعودی حکام کی جانب سے سعودی اسپتال میں صحت کی خدمات کو بہتر بنانے کے لیے پہلا روبوٹ متعارف کرادیا گیا ہے۔
بین الاقوامی خبر رساں ادارے کی رپورٹ کے مطابق سعودی عرب میں کنگ فیصل اسپیشلسٹ اسپتال اینڈ ریسرچ سینٹر نے عملے اور وزیٹرز کی مدد کے لیے پہلے روبوٹ ’نور آر ون‘ کو متعارف کرایا ہے۔جس کے باعث اسپتال میں موجود عملے اور وزیٹرز کو بہترین سہولتیں میسر آئیں گی۔
رپورٹ میں کہا گیا ہے کہ سعودی صحت کے ادارے ٹیکنالوجی کے معیاری استعمال کی پالیسی پر گامزن ہیں۔ تاکہ صحت کی خدمات کو بہتر سے بہتر بنایا جاسکے، صحت کی خدمات کے لیے روبوٹ کا تقرر بھی اسی لئے کیا گیا ہے۔
سعودی صحت کے ادارے کی جانب سے اس روبوٹ کو اسپتال کے ہیلتھ کیئر انفارمیشن ٹیکنالوجی افیئرز ونگ میں تعینات کیا گیا ہے، جو انگریزی اور عربی دونوں زبانوں میں تیکنیکی معاونت کے سوالات کے جواب فراہم کرتا ہے۔
اس روبوٹ کی خاص بات یہ ہے کہ یہ عملے کی شناخت ان کے چہروں کے ذریعے کرنے، اسپتال اور سینٹر آنے والوں کے ساتھ بات چیت کی بھرپور صلاحیت رکھتا ہے۔
یہ جدید ترین روبوٹ تکنیکی معاونت سے متعلق سوالات کے جواب درست اور موثر انداز میں دیتا ہے جبکہ اسے مصنوعی ذہانت کے جدید ترین سسٹم سے آراستہ کیا گیا ہے۔
ڈاکٹر اسامہ السویلم کے مطابق نئے ملازم روبوٹ کی کار کردگی سے عملے کو اپنی بنیادی ذمہ داریوں پر توجہ مرکوز کرنے میں مدد حاصل ہوگی، جبکہ جدید ٹیکنالوجی کے استعمال سے صحت کی خدمات میں اضافہ ہوگا۔
واضح رہے کہ کنگ فیصل سپیشلسٹ اسپتال اینڈ ریسرچ سینٹر خصوصی صحت نگہداشت کے شعبے میں دنیا کے بہترین اسپتالوں میں شمار ہوتا ہے۔
کنگ فیصل اسپیشلسٹ اسپتال اینڈ ریسرچ سینٹر کو حال ہی میں برانڈ فنانس نے مشرق وسطیٰ و افریقہ میں پہلے نمبر پر اور 2023 کے دوران دنیا کے 20 بہترین اسپتالوں کی فہرست میں شامل کرلیا گیا ہے۔
