مملکت سعودیہ میں مقیم غیر ملکیوں کے اقامے سے متعلق اہم خبر سامنے آگئی، سعودی محکمہ پاسپورٹ اینڈ امیگریشن جو وزارت داخلہ کا ذیلی ادارہ ہے، مملکت کے قوانین کے مطابق سعودیہ میں مقیم غیر ملکیوں کے اقامے، خروج وعودہ اور خروج نہائی کے اجرا کی ذمہ داری کے امور انجام دیتا ہے۔
بین الاقوامی خبر رساں ادارے کی رپورٹ کے مطابق سعودیہ میں سکونت اختیار کئے ہوئے غیر ملکی افراد جب مستقل طور پر اپنے ملک روانہ ہوتے ہیں تو انہیں فائنل ایگزٹ جسے عربی میں خروج نہائی کا نام دیا گیا ہے، حاصل کرنا ضروری ہوتا ہے جبکہ چھٹی پر جانے کے لیے خروج وعودہ کی شرط ہے۔
ایک شخص کی جانب سے جوازات کے ٹوئٹر پر دریافت کیا‘ کورونا لاک ڈاؤن کے دوران چھٹی پر وطن گیا تھا، اقامہ ایکسپائر ہوگیا، کیا دوبارہ نئے ویزے پر سعودی عرب کا سفر ممکن ہے؟
جوازات نے کہا کہ ’قانون کے مطابق وہ تارکین وطن جو خروج وعودہ پر جاکر مقررہ وقت پر واپس نہیں آتے ان پرخروج وعودہ کی خلاف ورزی‘ خرج ولم یعد ’عائد کردی جاتی ہے۔
جوازات کے مطابق خرج ولم یعد کی خلاف ورزی کے زمرے میں آنے والے افراد کو تین سال کے لئے بلیک لسٹ کردیا جاتا ہے۔
پابندی والی مدت کے دوران اگر ایسے افراد جو مملکت کے سفر کا ارادہ رکھتے ہیں تو وہ صرف اپنے سابق کفیل کی جانب سے جاری کرائے گئے نئے ویزے پر ہی سعودی عرب کا سفر کرسکتے ہیں۔ اس کے علاوہ وہ ممنوعہ مدت کے دوران کسی دوسرے ویزے پر مملکت میں داخل نہیں ہوسکتے۔
جوازات نے خروج وعودہ کے قانون کی خلاف ورزی پرعائد کی جانے والے پابندی کے حوالے سے بتایا کہ خروج وعودہ پرجانے والوں کے لیے لازمی ہے کہ وہ اس قانون سے اچھی طریقے سے واقفیت رکھتے ہوں۔
ایسے افراد جنہیں سعودیہ واپسی میں تاخیر ہوجاتی ہے ان کے لئے حل ہے کہ وہ اپنے خروج وعودہ کی مدت میں اضافہ کروالیں۔ تاکہ کسی بھی پریشانی سے بچ سکیں۔
