کراچی: بھارتی ایئر ٹریفک کنٹرول نے سعودی طیارے کو ایک مسافر کی طبیعت کی خرابی پر ایمرجنسی لینڈنگ دینے سے اس لیے انکار کر دیا تھا کیوں کہ وہ مسلمان تھا۔
تفصیلات کے مطابق سعودی ایئر لائن کی پرواز میں مسافر کی طبیعت کی خرابی اور کراچی میں ایمرجنسی لینڈنگ کے حوالے سے ایک انکشاف ہوا ہے، معلوم ہوا ہے کہ اس خالص انسانی معاملے میں بھی بھارتی ایئر ٹریفک کنٹرول نے شدید مذہبی تعصب کا مظاہرہ کرتے ہوئے انسانیت کو شرمایا۔
بھارت نے روایتی ہٹ دھرمی کا مظاہرہ کرتے ہوئے بنگالی مسافر کی وجہ سے طیارہ ممبئی میں اترنے نہیں دیا، ایئر لائن ذرائع کا کہنا ہے کہ سعودی ایئر لائن کی پرواز ایس وی 805 ڈھاکا سے ریاض جا رہی تھی، کہ بھارتی فضائی حدود میں بنگلادیشی شہری کی طبیعت خراب ہو گئی، جس پر پائلٹ نے قریبی ممبئی ایئر پورٹ پر لینڈنگ کے لیے طیارے کا رخ موڑ دیا اور لینڈنگ کی اجازت طلب کی۔
پائلٹ نے اے ٹی سی ممبئی سے انسانی ہمدردی کی بنا پر لینڈنگ کی اجازت مانگی تھی، ایئر ٹریفک کنٹرولر کی اجازت ملنے تک طیارہ بمبئی کی لینڈنگ اپروچ بھی لے چکا تھا، تاہم ایسے میں اے ٹی سی ممبئی نے متاثرہ مسافر کی قومیت اور دیگر تفصیلات مانگیں، اور پھر ممبئی حکام نے بنگلادیشی مسلمان مسافر کو آف لوڈ کرنے اور ایئر ٹریفک کنٹرول ممبئی نے سعودی طیارے کو لینڈنگ دینے سے صاف منع کر دیا۔
بنگلادیش سے سعودی عرب جانے والی پرواز کی کراچی میں ایمرجنسی لینڈنگ
بعد ازاں، پائلٹ نے لینڈنگ منسوخ کر کے اے ٹی سی کراچی سے لینڈنگ کی اجازت طلب کی، جس پر اے ٹی سی کراچی نے انسانی ہمدردی کی بنیاد پر لینڈنگ کی اجازت دے دی، اور ہنگامی صورت حال میں طیارہ دگنا سفر کر کے صبح 7:28 پر کراچی لینڈ کر گیا، جہاں سول ایوی ایشن میڈیکل ٹیم نے مسافر کو طیارے میں طبی فوری امداد دی۔
ایئر لائن ذرائع کے مطابق ہائی بلڈ پریشر کے 44 سالہ مسافر ابو طاہر کی حالت انتہائی خراب تھی، بنگلادیشی مسافر کو بلند فشار خون کی وجہ سے مسلسل قے آ رہی تھی، طبی امداد کے بعد سعودی طیارہ کراچی سے ریاض روانہ ہو گیا۔
