Tag: سعودی عرب

رمضان کا مہینہ تمام تر رحمتیں اور برکتیں نازل کرتا رخصت ہوا، دنیا بھر کے کئی ممالک میں مسلمان آج مذہبی جوش و جذبے کے ساتھ عید منا رہے ہیں، وزیراعظم نواز شریف نے مسجد نبوی میں نماز عید ادا کی۔

سعودی عرب ، خلیجی ریاستوں، متحدہ عرب امارات، مشرق وسطیٰ کے ممالک، جاپان، جرمنی، امریکہ، کینیڈا اور برطانیہ میں عیدالفطر آج منائی جا رہی ہے،  نماز عید کا سب سے بڑا اجتماع مکہ میں مسجد الحرام میں ہوا۔ لاکھوں فرزندان اسلام نے نماز عید الفطر کے روح پرور اجتماع میں شرکت کی۔

شام، مصر، کویت، عراق، ایران، اور اردن میں بھی آج عید منائی جا رہی ہے،  ساٹھ فیصد مسلمانوں کی آبادی پر مشتمل ملائیشیا کے عوام بھی آج عیدالفطر مذہبی جوش و خروش سے منارہے ہیں، لاکھوں افراد نے نماز عید ادا کرنے کے بعد مسلم امہ اور خصوصا غزہ کے لیے دعائیں کیں۔

امریکا میں زیادہ تر اسلامی تنظیموں اور مساجد نےآج عید منانے کا اعلان کیا ہے جبکہ برطانیہ میں اس بار بھی دو عیدیں منائی جائیں گی۔ آسٹریلیا سمیت مشرقی ایشیائی ممالک بھی آج ہی عید منا رہے ہیں۔