ریاض : سعودی فرماں روا شاہ سلمان بن عبدالعزیز نے مسلمانوں کوعیدالاضحیٰ کی مبارکباد دیتے ہوئے کہا اس وقت دنیا غیر معمولی اور مشکل حالات سے گزر رہی ہے، کورونا وبا کے دوران سعودی شہری ثابت قدم رہے۔
تفصیلات کے مطابق سعودی فرماں روا شاہ سلمان بن عبدالعزیز نے مسلمانوں کوعیدالاضحیٰ کی مبارکباد دیتے ہوئے پیغام میں کہا ہے کہ اس سال کورونا کے باعث حجاج کی تعداد کم رکھی گئی ، حج کے دوران غیر معمولی اقدمات کئےگئے اور حجاج کرام کو وبا سے بچانے کیلئے غیرمعمولی تدابیر اختیار کی گئیں۔
سعودی فرماں روا کا کہنا تھا کہ اس وقت دنیا غیر معمولی اور مشکل حالات سے گزر رہی ہے ، مشکل حالات نے بڑی تعداد میں لوگوں کو متاثر کیا ، کورونا وبا کے دوران سعودی شہری ثابت قدم رہے۔
خیال رہے کامیاب سرجری اور صحت یابی کے بعد شاہ سلمان کو اسپتال سے رخصت کردیا گیا، شاہ سلمان دو جولائی سے ریاض کے شاہ فیصل اسپتال میں زیرِعلاج تھے۔
یاد رہے سعود ی عرب، متحدہ عرب امارات، خلیجی ممالک، فلسطین، ترکی سمیت دیگرممالک میں آج عید الضحی منائی جارہی ہے۔۔۔ مسجد الحرام اور مسجد نبوی میں عید کی نماز ادا کی گئی، فرزندان اسلام سنت ابراہیمی کی پیروی کرتے ہوئے جانوروں کی قربانی کر رہے ہیں۔
