Tag: سعودی وزیر خزانہ

ریاض: کرونا وائرس بحران کے تناظر میں سعودی وزیر خزانہ نے ایک بیان میں کہا ہے کہ مملکت میں معاشی سرگرمیاں مرحلہ وار بحال کی جا رہی ہیں۔

تفصیلات کے مطابق سعودی وزیر خزانہ محمد الجدعان نے کہا ہے کہ کرونا بحران سے نمٹنے کے سلسلے میں ہماری نئی منزل معاشی سرگرمیوں کی مرحلہ وار بحالی ہے۔

انھوں نے اپنے بیان میں کہا اسکیم کے تحت سماجی اور صحت سے متعلق صورت حال کو بہتر کرنے کے لیے نئے اقدامات کیے جا رہے ہیں، جن کا فیصلہ وزارت صحت سمیت تمام متعلقہ اداروں کے ساتھ مل کر کیا گیا ہے۔

سعودی وزیر نے کہا کہ ترقیاتی اسکیمیں جاری رہیں گی، ذرایع آمدنی میں تنوع پیدا کرنے کے لیے نجی اداروں کا کردار مضبوط بنایا جائے گا، ملکی پیداوار کو فروغ دینے کی پالیسی جاری رہے گی، حکومت چاہتی ہے کہ صحت کے تحفظ کے ساتھ اقتصادی سرگرمیوں میں توازن ہو۔

محمد الجدعان کا کہنا تھا حکومت قومی بجٹ سے ترقیاتی منصوبوں کو فنڈ فراہم کرتی رہے گی، اور انفرا اسٹرکچر کے منصوبے بڑے پیمانے پر نجی اداروں کو دیے جائیں گے، ترقیاتی فنڈ اور پبلک انویسٹمنٹ فنڈ شرح نمو کو بہتر بنانے میں اہم کردارادا کریں گے۔

انھوں نے بتایا کہ مارچ اور اپریل کے مہینوں میں مانیٹری اتھارٹی (ساما) نے 150 ارب ریال استثنائی طور پر پبلک انویسٹمنٹ فنڈ کو دیے، یہ اقدام بہت سوچ سمجھ کر کیا گیا۔ الجدعان کا کہنا تھا کہ اقتصادی سرگرمیاں جلد بحال کرنے کے لیے عوام کو صحت سے متعلق حکومتی اقدامات کی زیادہ سے زیادہ پابندی کرنی چاہیے۔

ریاض: سعودی وزیر خزانہ نے اقتصادی اصلاحات کا سلسلہ جاری رکھنے کا اعلان کرتے ہوئے کہا ہے کہ سٹیزن اکاؤنٹ بند نہیں ہوگا۔

تفصیلات کے مطابق سعودی وزیر خزانہ محمد الجدعان نے اہم اعلان کرتے ہوئے کہا ہے کہ سٹیزن اکاؤنٹ (حساب المواطن) بند نہیں ہوگا، کرونا کی عالمگیر وبا کے اقتصادی اثرات سے نمٹنے کے لیے حکومت خصوصی اقدامات کر رہی ہے تاہم ان سے سٹیزن اکاؤنٹ کا سلسلہ متاثر نہیں ہوگا۔

گزشتہ روز سعودی وزیر خزانہ نے امریکی خبر رساں ادارے بلومبرگ کو انٹرویو میں سٹیزن اکاؤنٹ کے سلسلے کو جاری رکھنے کا عندیہ دیا، انھوں نے کہا کہ مہنگائی الاؤنس کو عارضی طور پر معطل کیا گیا ہے، محدود دورانیے کی وجہ سے اس سے عوام پر زیادہ اثر نہیں پڑے گا، دوسری طرف حکومت سبسڈی اور اقتصادی اصلاحات کا سلسلہ جاری رکھے گی۔

سعودی حکومت کا پیٹرول نرخوں کے حوالے سے انتباہ

ان کا مؤقف تھا کہ کرونا وبا سے پیدا شدہ بحران سے نجات حاصل کرنے تک معیشت کو سہارا دینے کے لیے عارضی اقدامات کیے گئے ہیں، حکومت معیشت، مالیاتی پوزیشن کے تحفظ اور صحت نگہداشت کو ترجیح دے رہی ہے۔

وزیر خزانہ نے کہا ہم اخراجات کو کم کرنے کی بجائے اسے صحیح فریم میں لا رہے ہیں، سٹیزن اکاؤنٹ میں 10 مئی 2020 کو 2.18 ارب ریال جمع کیے گئے ہیں، یہ رقم مقامی شہریوں کو مئی کی سبسڈی کے طور پر تقسیم کی جائے گی، اس کے تحت اب تک 30 قسطیں مقامی شہریوں کو دی جا چکی ہیں، اور مجموعی طور پر 12 ملین افراد اس سے فائدہ اٹھا رہے ہیں۔

سٹیزن اکاؤنٹ (حساب المواطن) سعودی حکومت کا کم آمدنی اور متوسط آمدنی والے خاندانوں کی مالی اعانت کے لیے شروع کیا جانے والا ایک فلاحی پروگرام ہے، جزوی سبسڈی ہٹنے سے مقامی شہریوں کو جو جزوی نقصان ہوا، اس پروگرام کے ذریعے اس کی تلافی ہوگی۔

واضح رہے کہ سعودی وزیر خزانہ نے کہا تھا کہ جون 2020 سے مہنگائی الاؤنس عارضی طور پر معطل کیا جا رہا ہے جب کہ ویلیو ایڈڈ ٹیکس 5 فی صد سے بڑھا کر15 فی صد کیا جا رہا ہے، اس پر عمل درآمد یکم جولائی 2020 سے ہوگا۔

ریاض: سعودی وزیر خزانہ نے کہا ہے کہ کرونا وائرس کے اثرات سے نمٹنے کے لیے مملکت کی جانب سے سخت اقدامات کیے جائیں گے جو تکلیف دہ ہو سکتے ہیں۔

تفصیلات کے مطابق سعودی وزیر خزانہ محمد الجدعان نے کرونا اثرات سے نمٹنے کے لیے سخت اقدامات کا عندیہ دے دیا ہے، انھوں نے کہا کہ کرونا بحران سے نمٹنے کے لیے مملکت کے سامنے تمام آپشنز کھلے ہیں، بجٹ اخراجات میں بھی کمی لانا ہوگی۔

ان کا کہنا تھا کہ اب تک مملکت کی جانب سے جو اہم اقدامات کیے گئے ہیں ان میں نجی شعبے کو امداد کی فراہم بھی شامل ہے، کیوں کہ سعودی ملازمین کا روزگار جاری رکھنا حکومت کی ترجیح ہے، سعودی عرب میں اب تک 180 ارب ریال کی امداد دی جا چکی ہے۔

ٹی وی العربیہ کو دیے گئے انٹرویو میں ان کا کہنا تھا سعودی عرب کرونا وبا سے متاثرہ عوام کی مدد کرنے کے حوالے سے پُر عزم ہے، ہمارے سامنے نجی سیکٹر میں سعودیوں کے روزگار کو تحفظ دینا اور بنیادی ضرورتوں کی فراہمی کو یقینی بنانا اہم ہدف تھا، جو اقدامات کیے گئے وہ مناسب اور بر وقت تھے۔

وزیر خزانہ نے کہا کہ حکومت نے عالمی منڈی سے بڑا قرض لینے کا فیصلہ کیا ہے تاہم یہ کافی نہیں، حکومت کو بجٹ اخراجات کو بھی دیکھنا ہوگا، شہریوں کو کم سے کم نقصان ہونے کو بھی مدنظر رکھنا ہوگا۔

انھوں نے یہ بھی کہا کہ پہلی سہ ماہی میں بجٹ کے اعداد و شمار کے اثرات بڑی سطح پر ظاہر نہیں ہوئے، کرونا وائرس سے ہونے والے حقیقی اثرات دوسری سہ ماہی میں ظاہر ہوں گے، دنیا اور سعودی عرب میں اقتصادی و معاشی حالات اب اس طرح نہیں ہو سکتے جیسا کہ کرونا وبا سے پہلے تھے، آمدنی میں بڑی حد تک ڈرامائی انداز میں کمی آئی ہے، خواہ وہ تیل کی آمدن ہو یا دیگر وسائل۔

محمد الجدعان نے انٹرویو میں بتایا کہ حکومت اب اس وبا سے نمٹنے کے لیے بڑے آپشنز پر غور کر رہی ہے، موجودہ صورت حال میں یہ ضروری ہے کہ بعض منصوبوں میں توسیع اور سفر کے اخراجات کو کم کیا جائے۔