Tag: سعودی وزیر داخلہ

اسلام آباد : سعودی وزیرداخلہ عبدالعزیزبن سعودبن نائف ایک روزہ دورےپرپاکستان پہنچ گئے ، دورے کے دوران سعودی جیلوں میں قید پاکستانیوں سے متعلق فیصلے ہوں گے۔

تفصیلات کے مطابق سعودی وزیرداخلہ عبدالعزیزبن سعودبن نائف ایک روزہ دورےپرپاکستان پہنچ گئے ، وزیر داخلہ شیخ رشید نے نور خان ائیربیس پرسعودی وزیرداخلہ اور وفد کا استقبال کیا، اس موقع پر سیکرٹری داخلہ یوسف نسیم کھوکھرسمیت دیگرحکام بھی موجود تھے۔

سعودی وزیر داخلہ کیساتھ 6رکنی اعلیٰ سعودی حکام کا وفدبھی پاکستان پہنچا ہے، سعودی وزیر داخلہ پاکستانی ہم منصب شیخ رشید کی خصوصی دعوت پر پاکستان کا دورہ کررہے ہیں۔

دورے کے دوران پاکستان ،سعودی عرب کے داخلہ امورکے وزرا کی اپنے وفد کے ہمراہ ملاقات ہوگی ، جس میں سعودی جیلوں میں قید پاکستانیوں سے متعلق تبادلہ خیال کیا جائے گا۔

ملاقات میں کورونا کے باعث پیدا ہونے والی صورت حال اور سفری پابندیوں میں نرمی پر بھی بات ہوگی جبکہ سعودی جیلوں میں قید پاکستانیوں سے متعلق اہم فیصلے متوقع ہیں۔

سعودی وزیر داخلہ دورے کے دوران صدرمملکت عارف علوی ، وزیراعظم عمران خان ، اہم حکومتی اور سیکیورٹی شخصیات سے ملاقاتیں کریں گے۔

یاد رہے دسمبر میں سعودی عرب کے وزیر خارجہ شہزادہ فیصل بن فرحان تنظیم اسلامی کانفرنس (او آئی سی) کے غیر معمولی اجلاس میں شرکت کے لیے اسلام آباد آئے تھے۔