Tag: سعودی ٹرانسپورٹ اتھارٹی

ریاض: سعودی عرب میں لوڈنگ ٹرک رکھنے سے متعلق نیا ضابطہ جاری کر دیا گیا۔

تفصیلات کے مطابق ٹرانسپورٹ اتھارٹی نے سعودیوں کے لیے ’نجی لوڈنگ ٹرک‘ رکھنے کی تعداد مقرر کر دی، قانون کے مطابق اب سعودی شہری ایک سے زیادہ ٹرک اپنے نام پر نہیں رکھ سکیں گے۔

نئے ضابطے کے مطابق نقل و حمل کے کاروبار سے منسلک ٹرانسپورٹ کمپنیوں کو زیادہ سے زیادہ 9 ٹرک رکھنے کی اجازت ہوگی۔

اس سلسلے میں ٹویٹر کے ذریعے سعودی ٹرانسپورٹ اتھارٹی نے نئے قواعد پر عمل کے لیے 2022 تک مہلت دیتے ہوئے ہدایت کی ہے کہ نقل و حمل سے متعلق تمام کمپنیاں اور افراد ان قواعد پر عمل کرنے کے پابند ہیں۔

ٹرانسپورٹ اتھارٹی کی جانب سے خبردار کیا گیا ہے کہ 2022 تک اپنے معاملات درست کیے جا سکتے ہیں، اس کے بعد زیادہ ٹرک رکھنے والوں کے خلاف کارروائی کی جائے گی۔

دوسری طرف سعودی عرب میں غیر قانونی معیشت کا راستہ روکنے کے لیے اینٹی ٹریڈ کَور اَپ کمیٹی مختلف شعبہ جات میں قانون سازی کر رہی ہے تاکہ ان ملکی اور غیر ملکیوں کے خلاف کارروائی ہو جو تجارتی پردہ پوشی میں ملوث ہیں۔

سعودی عرب میں مقامی شہریوں کے نام پر غیر ملکیوں کا کاروبار کرنا بھی خلاف قانون ہے، مرتکب افراد کو 5 برس تک قید اور 50 لاکھ ریال جرمانے کی سزائیں دی جائیں گی۔ تجارتی جعل سازی کی روک تھام کے لیے نئے ضابطے بھی لائے جا رہے ہیں۔