ایک سعودی سرجن نے اپنی مہارت کا بہترین استعمال کرتے ہوئے کینیڈا میں پیدائشی طور پر دل کے مرض میں مبتلا شیر خوار بچے کا پیچیدہ آپریشن کامیابی سے مکمل کر لیا۔
غیر ملکی ذرائع ابلاغ کے مطابق دو ماہ کا بچہ پیدائش کے بعد سے مصنوعی تنفس پر زندہ تھا۔ بچے کے دل میں قدرتی نقص ہونے کے باعث اس کے لئے درست طور پر سانس لینا ممکن نہیں تھا۔
سعودی سرجن محمد بن مناجی نے کینیڈا کے متعدد سرجنوں کی جانب سے آپریشن سے انکار پر کیس کو صحیح معنوں میں پرکھا اور آپریشن کرنے کا فیصلہ اصولی فیصلہ کرلیا۔
کینڈین میڈیا پر سعودی سرجن کی مہارت کے خبریں گردش کر رہی ہیں جن میں کہا جا رہا ہے کہ سعودی ڈاکٹر کی مہارت سے معصوم بچے کو نئی زندگی مل گئی۔
سعودی سرجن محمد نے اس حوالے سے بتاتے ہوئے کہا کہ ’بچے کے دل اور شریانوں میں قدرتی نقص تھا۔ دل کا پمپنگ سیکشن مناسب طریقے سے خون کو پمپ نہیں کر سکتا تھا۔‘
ڈاکٹر محمد المناجی نے بتایا کہ ’بچہ پہلے دن سے وینٹیلیٹر پر تھا کیونکہ دل کی شریانوں کی خرابی کے باعث نظام تنفس بھی درست نہیں تھا۔‘
سعودی ڈاکٹر کے مطابق ’انہوں نے بچے کی تمام رپورٹس کا تفصیلی مطالعہ کیا اور مزید ٹیسٹ کیے بعد ازاں یہ فیصلہ کیا کہ بچے کا آپریشن کیا جائے۔‘
بچے کے والدین نے بھی آپریشن کے لئے رضا مندی ظاہر کردی، کیونکہ انہیں اس بات کا علم تھا کہ بچے کی حالت ایسی نہیں کہ اسے زیادہ دیر تک وینٹیلیٹر پر رکھا جائے۔
سعودی ڈاکٹر نے کہا کہ اللہ رب العزت کا بہت شکر ہے کہ آپریشن کامیاب ہوگیا، بچے کو دو دن انتہائی نگہداشت کے یونٹ میں رکھنے کے بعد جنرل وارڈ میں منتقل کر دیا گیا جہاں ایک ہفتے کی نگرانی کی گئی۔‘
ڈینگی نے لاہور میں پنجے گاڑ لئے، نئے کیسز میں اضافہ
اُنہوں نے بتایا کہ اس دوران بچے کی صحت مکمل طور پر بہتر تھی اور وہ فطری طریقے سے فیڈ کر رہا تھا جبکہ وینٹیلٹر کی بھی ضرورت نہیں رہی۔ بچے کو اسپتال سے رخصت کر دیا گیا اب اس کی صحت مکمل طور پر بہتر ہوچکی ہے اور بچے کے والدین کی خوشی کا کوئی ٹھکانہ نہیں۔
