Tag: سعودی کابینہ اجلاس

جدہ: سعودی عرب میں غیرملکیوں کو میڈیا و پرنٹنگ کے کاروبار کی اجازت دے دی گئی ہے۔

عرب میڈیا کے مطابق سعودی فرمانروا شاہ سلمان بن عبدالعزیز کی سربراہی میں کابینہ کا خصوصی اجلاس منعقد ہوا جس میں سعودی کابینہ نے غیرملکیوں کو میڈیا و پرنٹنگ کے کاروبار کی اجازت دے دی۔

عرب میڈیا کے مطابق غیرملکی میڈیا کو سعودی عرب میں بیورو آفس کھولنے اور نمائندے مقرر کرنے کی بھی اجازت ہوگی۔

سعودی کابینہ کے اجلاس میں کہا گیا ہے کہ میڈیا اور پرنٹنگ میں کام کرنے والوں کو انویسٹمنٹ اتھارٹی کی شرائط پر عمل کرنا ہوگا۔

سعودی عریبین جنرل انویسٹمنٹ (ساجیا) اس حوالے سے مزید تفصیلات جاری کرے گا۔

مزید پڑھیں: سعودی سیاحتی ویزے پر آنیوالوں کو عمرہ ادائیگی کی بھی اجازت دیدی گئی

یاد رہے کہ چند روز قبل سعودی عرب میں سیاحتی ویزے پر آنے والوں کو عمرہ ادائیگی کی بھی اجازت دی گئی تھی۔

سعودی عرب کے محکمہ سیاحت و قومی ثقافتی ورثہ کے چیئرمین احمد ال خطیب کا کہنا تھا کہ مملکت دنیا بھر سے آنے والے تمام سیاحوں کے لیے سیاحتی ویزے جاری کرنا شروع کردیے ہیں۔

ان کا کہنا تھا کہ سیاحتی ویزوں کا اجرا ملک میں روزگار کے بے پناہ مواقع پیدا کرے گا۔سعودی سیاحتی ویزا کی ایک سب سے اہم خوبی یہ ہے کہ اسے بغیر کسی پیشگی شرط کے عمرہ کی ادائی کے لیے استعمال کیا جاسکتا ہے۔

ان کا کہنا تھا کہ خواتین کے لیے کسی محرم کا ساتھ ہونا ضروری نہیں، عمرہ کی سہولت حج سیزن کے علاوہ پورا سال میسر ہوگی۔