کراچی : انسداد دہشت گردی کی عدالت میں ایم کیو ایم کے کارکن سعید احمد عرف سعید بھرم کو پیش کیا گیا جس نے اعلیٰ قیادت کے حکم پر قتل کی وارداتوں کا اعتراف کر لیا۔
تفصیلات کے مطابق انسداد دہشت گردی کی عدالت میں ایم کیو ایم سے تعلق رکھنے والے ٹارگٹ کلرز سعید عرف سعید بھرم کو پیش کیا گیا اس موقع پر رینجرز کے اسپیشل پراسیکیوٹر محمد جواد اعوان نے عدالت کو بتایا کہ ملزم نے جے آئی ٹی کے رو برو قتل کا اعتراف کیا ہے، اور اپنے چار ساتھیوں کے نام اگل دیے ہیں جن میں حیدر لطیف، رشید عرف ڈاکٹر، طاہر لمبا اور وسیم عرف باس شامل ہیں۔
رینجرز پراسیکیوٹر کے مطابق ملزم سعید بھرم نے پولیس کے رو برو جائے وقوعہ کی نشاندہی کی بھی یقین دہانی کرائی ہے اس لیے معزز عدالت قتل میں ملوث ملزم کے دیگر ساتھیوں کے وارنٹ گرفتاری جاری کریں۔
انسداد دہشت گردی کی عدالت نے وکیل کے دلائل کے بعد مقدمہ میں مفرور ایم کیو ایم کے دو کارکنان کے وارنٹ جاری کردیے مفرور ملزمان میں، حیدر گدی اور را ایجینٹ طاہر لمبا شامل ہیں۔
واضح رہے ملزمان نے یکم اکتوبر 2009 کو رنچھوڑ لائن کے قریب اعلی قیادت کے حکم پر سیاسی حریف جماعت مہاجر قومی موومنٹ کے کارکن سید ابرار حسین کو قتل کیا تھا۔
