پاک افغان تعلقات مثبت سمت کی جانب گامزن ہونے کے بعد اب پاکستان نے کابل میں سفیر تعینات کرنے کا فیصلہ کیا ہے۔
اے آر وائی نیوز کے مطابق نائب وزیراعظم اور وزیر خارجہ اسحاق ڈار نے ہانگ کانگ میں ثالثی کی بین الاقوامی تنظیم کے لیے دستخط کی تقریب سے خطاب کرتے ہوئے کہا ہے کہ پاک افغان تعلقات مثبت سمت کی جانب گامزن ہیں اس لیے پاکستان نے کابل میں سفیر تعینات کرنے کا فیصلہ کیا ہے۔
اسحاق ڈار نے کہا کہ 19 اپریل کو کابل کے نہایت کامیاب دورے اور پاکستانی وفد سے ملاقاتوں سے یہ مثبت پیش رفت ظاہر ہے۔ پاکستان کابل میں ناظم الامور کے عہدے کو بڑھا کر سفیر کے درجے تک لے جائے گا۔
نائب وزیراعظم نے کہا کہ یقین ہے یہ قدم دونوں برادر ممالک کے روابط مزید مضبوط بنانے میں مددگار ہوگا۔ اس فیصلے سے معیشت، سلامتی، انسداد دہشتگردی، تجارت میں تعاون کو گہرا کرنے اور باہمی تبادلوں کو فروغ دینے میں مدد ملے گی۔
ان کا یہ بھی کہنا تھا کہ مقبوضہ کشمیر اور فلسطین پر غیر قانونی قبضے عالمی امن کے لیے خطرہ بن گئے ہیں۔ یہ دونوں دیرینہ تنازعات حل کرنا ہوں گے۔ پاکستان چین کی حمایت کو قدر کی نگاہ سے دیکھتا ہے۔
اسحاق ڈار نے آئی او ایم ای ڈی کے قیام سے متعلق کنونشن میں پاکستان کی شرکت کو باعث فخر قرار دیتے ہوئے کہا کہ اس تصور کوحقیقت میں تبدیل کرنے میں چینی قیادت کا اہم کردار ہے اور ہانگ کانگ کو نئی قائم شدہ تنظیم کے صدر دفتر کے طور پر منتخب کرنا قابل تعریف ہے۔
واضح رہے کہ گزشتہ دنوں بیجنگ میں پاکستان چین اور افغانستان کے وزرائے خارجہ کا سہ فریقی اجلاس ہوا تھا جس میں تینوں ممالک نے باہمی تعاون بڑھانے پر اتفاق کیا تھا۔
اجلاس میں پاکستان کا افغانستان سے قریبی تجارتی اور صحت روابط کے فروغ کے عزم کا اعادہ کیا گیا۔ چین اور پاکستان نے سی پیک کو افغانستان تک توسیع دینے کی حمایت کی تھی۔
https://urdu.arynews.tv/pakistan-china-afghanistan-foreign-ministers-meeting/
