عمان : سلطان قابوس ہائر سینٹر فار کلچر اینڈ سائنس نے تاریخی سلطان قابوس مسجد میں داخلے کیلیے انٹری فیس مقرر کرنے کا اعلان کردیا۔
غیر ملکی خبر رساں ادارے ٹائمز آف عمان کی رپورٹ کے مطابق عمان کے مشہور سیاحتی مقام، سلطان قابوس گرینڈ مسجد کی انتظامیہ نے وزیٹرز کے لیے داخلہ فیس متعارف کرائی ہے۔
انتظامیہ کا کہنا ہے کہ اس اقدام کا مقصد یہاں آنے والوں کی خدمات کو مزید بہتر بنایا جا سکے اور سیاحوں کی بڑھتی ہوئی تعداد کو منظم کیا جا سکے۔
رپورٹ کے مطابق گرینڈ مسجد اپنی شاندار تعمیرات اور خوبصورتی کے باعث دنیا بھر میں مشہور ہے، جن میں ایک 14 میٹر اونچائی کا شاندار جھومر اور دنیا کا سب سے بڑا نماز کا قالین شامل ہیں، جو اسے بین الاقوامی اور مقامی سیاحوں کے لیے ایک اہم مقام بناتا ہے۔
رپورٹ کے مطابق عمان حکومت کے اس فیصلے پر سوشل میڈیا پر خوب بحث و مباحثہ ہوا کئی صارفین نے سوال اٹھایا کہ کسی بھی مسجد کے لیے داخلہ فیس کیسے لی جا سکتی ہے؟۔
داخلہ فیس سے متعلق مسجد انتظامیہ کی وضاحت
سوشل میڈیا پر ہونے والے ان خدشات کے جواب میں سلطان قابوس ہائر سینٹر فار کلچر اینڈ سائنس نے ایک وضاحتی بیان جاری کیا ہے، جس میں بتایا گیا ہے کہ یہ فیس صرف وزیٹرز کے انتظام کے لیے ہے اور مسجد میں نماز کے اوقات میں داخلے کیلیے اس فیس کا اطلاق نہیں ہوگا۔
جاری بیان کے مطابق گرینڈ مسجد عمان کی سب سے بڑی سیاحتی کشش رکھنے والی مسجد ہے اور سیاحوں کی بڑھتی ہوئی تعداد کے پیش نظر اور مسجد کی سہولیات کی فراہمی کو برقرار رکھنے کے لیے ایک نظام متعارف کرانا ضروری ہو گیا تھا۔
بیان میں مزید کہا گیا ہے کہ معاہدہ کرنے والی کمپنی تنظیم، صفائی اور حفاظت کی ذمہ دار ہے اور اس نے وزیٹرز کو ان کی زبانوں میں رہنمائی فراہم کرنے کے لیے 35 عمانی گائیڈز کی خدمات حاصل کی ہیں۔
مسلمانوں کے لیے نماز کے اوقات میں مسجد کا داخلہ مفت رہے گا، تاہم اس کے بعد آنے والے لوگوں چاہے وہ مسلم ہوں یا غیر مسلم فیس کی ادائیگی کے بعد داخلے کی اجازت ہوگی۔
