اسلام آباد: لاپتہ بلاگر، پروفیسر اور سماجی کارکن سلمان حیدر اپنے گھر واپس پہنچ گئے ہیں۔ ان کے بھائی نے ان کی واپسی کی تصدیق کردی۔
تفصیلات کے مطابق پولیس کا کہنا ہے کہ رواں ماہ وفاقی درالحکومت سے لاپتہ ہونے والے بلاگر سلمان حیدر گذشتہ رات اپنے گھر واپس پہنچ گئے ہیں۔ اس خبر کی تصدیق سلمان حیدر کے بھائی ذیشان حیدر نے بھی کی۔
انہوں نے اپنے فیس بک اکاؤنٹ پر ان کے خیریت سے ہونے کی اطلاع دی۔
یاد رہے کہ رواں ماہ سلمان حیدر سمیت 5 بلاگرز وقاص گورایہ، عاصم سعید، احمد رضا نصیر اور ثمر عباس ملک کے مختلف شہروں سے لاپتہ ہوگئے تھے۔
بلاگرز کے لاپتہ ہونے کے بعد پاکستان پیپلز پارٹی نے قومی اسمبلی میں توجہ دلاؤ نوٹس بھی جمع کروایا تھا۔
بعد ازاں وفاقی وزیر داخلہ چوہدری نثار نے بھی سلمان حیدر کی گمشدگی کا نوٹس لیتے ہوئے ان کی جلد از جلد بحفاظت بازیابی کی ہدایت دی تھی۔
یاد رہے کہ سلمان حیدر رواں ماہ 6 جنوری کو بنی گالہ کے علاقے سے لاپتہ ہوئے تھے۔ ان کے بھائی ذیشان حیدر کے مطابق انہوں نے فون پر اپنی اہلیہ کو اطلاع دی تھی کہ وہ رات 8 بجے تک گھر پہنچ جائیں گے لیکن جب 10 بجے تک وہ گھر نہیں پہنچے تو ان کی اہلیہ نے انہیں فون کیا۔ فون کی گھنٹی بجتی رہی مگر سلمان حیدر یا کسی اور نے اسے ریسیو نہیں کیا۔
بعد ازاں پولیس کو ان کی گاڑی کورال چوک سے ملی۔
واضح رہے کہ پروفیسر سلمان حیدر گزشتہ 5 سال سے فاطمہ جناح یونیورسٹی میں تدریس کے فرائض انجام دے رہے تھے۔ وہ سوشل میڈیا پر نہایت متحرک تھے جبکہ اس کے ساتھ ساتھ قلمکار اور شاعر بھی ہیں۔
