کراچی: سنی اتحاد کونسل نے مخصوص نشستوں کے حصول کے لیے سندھ ہائیکورٹ سے رجوع کرتے ہوئے درخواست دائر کر دی ہے۔
تفصیلات کے مطابق سنی اتحاد کونسل نے الیکشن کمیشن کی جانب سے مخصوص نشستیں دیگر پارٹیوں کو دینے کا فیصلہ چیلنج کردیا، عدالت نے معاملے کی اہمیت کے پیش نظر آج ہی سماعت کی درخواست منظور کرلی۔
درخواست میں موقف اختیار کیا گیا ہے کہ سندھ اسمبلی میں ہماری اقلیت کی 1، خواتین کی 2 مخصوص نشستیں بنتی ہیں، الیکشن کمیشن نے غیر آئینی فیصلہ دے کر نشستوں سے محروم کردیا ہے۔
بیرسٹر علی طاہر نے کہا کہ الیکشن کمیشن پاکستان کا فیصلہ غیر آئینی و غیر قانونی قرار دیا جائے، درخواست میں کہا گیا ہے کہ سندھ اسمبلی میں اقلیتی اور خواتین کی تین مخصوص نشستیں سنی اتحاد کونسل کو الاٹ کرنے کی ہدایت کی جائے۔
درخواست میں وفاق، چیف الیکشن کمشنر، صوبائی الیکشن کمیشن پیپلز پارٹی، ایم کیوایم اور مخصوص نشستوں پر کامیاب امیدوار کو فریق بنایا ہے۔
واضح رہے کہ سنی اتحاد کونسل نے مخصوص نشستوں کے معاملے پر دیگر صوبوں میں بھی ہائی کورٹس سے رجوع کر رکھا ہے۔
