اسلام آباد: وزیر اعظم عمران خان کی زیر صدارت وفاقی کابینہ کا اجلاس ہوا، جس میں کشمیر کی حالیہ صورت حال پر غور کیا گیا.
تفصیلات کے مطابق وفاقی کابینہ نے اجلاس میں قومی سلامتی کمیٹی کے تمام فیصلوں کی توثیق کر دی۔
وزیراعظم نے فخرامام کی سربراہی میں خصوصی کمیٹی قائم کی ہے، جس میں اپوزیشن ارکان کو بھی شامل کرنے کی تجویز سامنے آئی ہے۔ْ
اجلاس میں سمجھوتا اور تھر ایکسپریس بند کرنے کے فیصلےکی توثیق کی گئی. کابینہ ارکان کی جانب سے وزیر ریلوے شیخ رشید کے حالیہ اقدامات کی مکمل حمایت کا اعلان کیا گیا۔ وفاقی کابینہ نے بھارت کے ساتھ تجارت بند کرنے کے فیصلےکی بھی توثیق کردی.
وفاقی کابینہ کو احساس پروگرام کے حوالے سے بھی تفصیلی بریفنگ دی گئی، وفاقی کابینہ نے پارلیمنٹ کے مشترکہ اجلاس کی متفقہ قرار داد کی بھی توثیق کی.
مزید پڑھیں: پاکستان نے بھارتی ہائی کمشنر اجے بساریہ کو ملک چھوڑنے کا حکم دے دیا
خیال رہے کہ گزشتہ دونوں وزیر اعظم کی زیر صدارت قومی سلامتی کمیٹی کا اجلاس ہوا تھا، جس میں مسلح افواج کے سربراہان، انٹیلی جنس حکام اور سول قیادت شریک ہوئی۔
اجلاس میں سول و عسکری قیادت نے کشمیر کی تازہ ترین صورت حال کا تفصیلی جائزہ لیا، پاکستان کے بھرپور رد عمل اور ممکنہ آپشنز پر مشاورت مکمل کر لی گئی، ملکی داخلی سلامتی اور سیکورٹی سے متعلق اہم فیصلے کیے گئے۔
مذکورہ اجلاس میں بھارت کے ساتھ سفارتی تعلقات محدود کرنے اور دو طرفہ تجارت معطل کرنے کا فیصلہ کیا گیا تھا.
