کراچی: سمندری طوفان وایو کا اثر کراچی کی ساحلی پٹی پر پڑنا شروع ہوگیا اور ہاکس بے، سینڈز پٹ پر سمندر کا پانی سڑک پر آگیا۔
تفصیلات کے مطابق سمندری طوفان وایو نے کراچی کی ساحلی پٹی پر اثر دکھانا شروع کردیا، ہاکس بے، سینڈزپٹ پر سمندر کا پانی سڑک پر آگیا، سمندری لہروں سے کئی ہٹس میں بھی پانی داخل ہوگیا۔
رپورٹ کے مطابق پانی دور تک آنے کے باعث سڑک پر کھڑی متعدد گاڑیاں بھی دھنس گئی ہیں۔
نمائندہ اے آر وائی نیوز انجم وہاب کے مطابق سمندر کا پانی سڑک پر آنے کے باعث تفریح پر جانے والے لوگوں کی گاڑیاں پانی میں پھنس گئیں اور کئی جگہوں پر گڑھے بھی پڑ گئے ہیں۔
تیز ہواؤں کا سلسلہ سمندر کے اطراف ابھی جاری ہے اور پانی بھی سڑکوں پر موجود ہے۔
واضح رہے کہ محمکہ موسمیات نے بھی پیش گوئی کی ہے کہ ابھی طوفان سمندر میں موجود ہے اس کے اثرات کراچی پر بھی رونما ہوتے رہیں گے تیز ہواؤں کا سلسلہ جاری رہے گا۔
مزید پڑھیں: سمندری طوفان وایو کے دوبارہ گجرات سے ٹکرانے کی پیش گوئی
یاد رہے کہ بھارتی محکمہ موسمیات نے سمندری طوفان وایو کے آئندہ 48 گھنٹوں میں ایک مرتبہ پھر گجرات سے ٹکرانے کا خدشہ ظاہر کیا ہے۔
بھارتی محکمہ موسمیات کا کہنا تھا کہ سمندری طوفان وایو ایک بار پھر سے ریاست گجرات کی جانب رخ کررہا ہے۔ آئندہ 48 گھنٹوں میں گجرات کے سمندر سے ٹکرائے جانے کا امکان ہے۔ 17 اور 18 جون کو گجرات کے ضلع کَچھ کے ساحل سے ٹکرائے گا۔
