گورکھپور: سوشل میڈیا پر ایک ویڈیو وائرل ہو رہی ہے، جس میں ایک چور آنٹی کو مہارت کے ساتھ سنار کا دھیان بھٹکا کر گولڈ سیٹ چراتے دیکھا جا سکتا ہے۔
بھارتی میڈیا کے مطابق بھارتی ریاست اترپردیش کے شہر گورکھپور میں ایک سنار کی دکان پر ایک خاتون نے ایسی ہاتھ کی صفائی دکھائی کہ سوشل میڈیا پر اس کی وائرل ہونے والی ویڈیو دیکھ کر دیکھنے والے دنگ رہ گئے۔
ویڈیو میں دیکھا جا سکتا ہے کہ ایک خاتون اور کچھ دوسرے لوگ ایک جیولری شاپ میں بیٹھے ہیں اور سیلز پرسنز کی طرف سے کچھ سونے کے زیورات دکھائے جا رہے ہیں، جو متعدد گاہکوں کے ساتھ مصروف ہیں۔
خاتون نے سیلز پرسنز کا دھیان اس طرح بھٹکایا کہ انھیں اندازہ بھی نہیں ہو سکا کہ ایک باکس خاتون نے ساڑھی کے نیچے ’غائب‘ کر دیا ہے۔
गोरखपुर में काले चश्मे वाली महिला ने जूलरी शॉप में ऐसे पार किया सोने का हार pic.twitter.com/rqpzQGkw1n
— Samir Abbas (@TheSamirAbbas) November 26, 2022
سی سی ٹی وی فوٹیج میں ’چور آنٹی‘ کو سبز رنگ کی ساڑھی اور دھوپ کا چشمہ پہنے دیکھا جا سکتا ہے، انھوں نے ماسک بھی پہن رکھا ہے، اور وہ سونے کے سیٹس دیکھ رہی ہیں۔
کئی گاہکوں کے ساتھ مصروف سیلز پرسنز پریشان ہو جاتے ہیں، اور عورت انھیں کچھ اور سیٹ دکھانے کو کہتی ہے، اس کے بعد وہ چالاکی سے ایک کھلے سیٹ کو اٹھا کر اپنے سامنے پڑے بند سیٹ پر رکھ دیتی ہے اور پھر موقع ملتے ہی وہ دونوں اٹھا کر اپنی گود میں رکھ لیتی ہے۔
فوٹیج کے مطابق خاتون نے کچھ دیر بعد کھلا سیٹ تو واپس کاؤنٹر پر رکھ دیا لیکن اس کے نیچے جو سیٹ تھا وہ ساڑھی کے اندر غائب ہو چکا تھا، اور کچھ دیر بعد وہ اٹھ کر دکان سے باہر چلی جاتی ہے۔
سوشل میڈیا پر یہ ویڈیو وائرل ہوتے ہی صارفین حیران رہ گئے کہ دکان دار کی توجہ بھٹکا کر خاتون نے کتنی چالاکی سے سونے کے زیورات کو اڑایا۔
