Tag: سندھ اسمبلی

کراچی: متحدہ قومی موومنٹ کے رکن صوبائی اسمبلی محمد حسین نے سوال اُٹھایا کہ سندھ حکومت نے 2014 اور2015 میں کراچی ترقیاتی فنڈ کے لیے رکھی گئی رقم کہاں خرچ ہوئی ؟

تفصیلات کے مطابق سندھ میں بجٹ تجاویزات پر بحث و مباحثہ جاری ہےجس میں حصہ لیتے ہوئے متحدہ قومی موومنٹ سے تعلق رکھنے والے رکن صوبائی اسمبلی محمد حسین نے سندھ حکومت سے پوچھا کہ 2014 میں کراچی کی ترقی اسکیموں کے لیے 42 ارب اور 2015 میں 47 ارب روپے مختص کیے گئے تھے، کیا سندھ حکومت بتانا پسند کرے گی کہ یہ رقم کہاں استعمال ہوئی اور کون سے بڑے پروجیکٹ ان رقوم سے پایہ تکمیل کو پہنچے؟

اس موقع پر رکن صوبائی اسمبلی محمد حسین نے خدشہ ظاہر کیا کہ کوئی گارنٹی نہیں حالیہ بجٹ میں مختص کی گئی رقم بھی استعمال ہو گی یا حکومتی کرپشن کے نظر ہو جائے گی،حکومت نے اس قبل بھی 53 ارب میں سے محض 12 ارب ہی استعمال کیے۔

محمد حسین کا کہنا تھا کہ اس مالی بے ضابطگی کی بنیادی وجہ کراچی کی ترقی کے لیے بلدیاتی اداروں کو اختیارات دینے کے بجائے بلدیاتی اداروں کو من مانے طریقے سے چلانا ہے، سندھ حکومت کی کار گذاری کے باعث بلدیاتی ادارے تباہی کے دہانے پر پہنچ گئے ہیں۔

محمد حسین نے اپنی بجٹ تقریر کے دوران اسپیکر اسمبلی کی توجہ مبذول کرواتے کہا کہ بیوروکریسی منتخب نمائندوں کی ترقیاتی اسکیموں کو نظر انداز کر دیتی ہے، جس کے باعث رکن اسمبلی کو ملنے والے بجٹ استعمال ہی نہیں ہو پا تے،اس معاملے پر کئی بار بیوروکریسی سے رابطہ کیا گیا مگر کوئی خاطر خواہ جواب نہیں ملا۔

محمد حسین نے بیوروکریسی کی جانب سے اراکین اسمبلی کی اسکیموں کو ختم کرنے پرسخت احتجاج کیا، انہوں نے کہا کہ ہم نے بیوروکریسی کے ناروا سلوک کے باعث اُن سے ملنا ہی چھوڑ دیا ہے۔

آخر میں محمد حسین کا کہنا تھا کہ حکومت سندھ کراچی کو کربلا نہ بنائے، بلدیاتی نمائندے منتخب ہو چکے ہیں انہیں اختیارات دے کر اپنے اپنے علاقون میں بھیجا جائے تا کہ وہ عوام کی خدمت کر سکیں۔

کراچی : پیپلزپارٹی کی رہنما شرمیلا فاروقی نے کہا ہے کہ لیڈر شپ کی ماں باپ جیسی اہمیت ہے اس کے خلاف کوئی بات نہیں سنیں گے۔

سندھ اسمبلی میں اراکین کی ہاتھا پائی پر تبصرہ کرتے ہوئے شرمیلا فاروقی نے کہا کہ ’’قیادت پر انگلی اٹھے تو جذبات رُوکنا مشکل ہوتا ہے‘‘۔

متحدہ قومی موومنٹ سے تعلق رکھنے والے قائد حزب اختلاف خواجہ اظہار الحسن نے شرمیلا فاروقی کی بات کا جواب دیتے ہوئے کہا کہ ’’اپوزیشن کا کام تنقید کرنا ہے اور وہ ہم کرتے رہیں گے، حکومت تنقید کا جواب کارکردگی سے دے‘‘۔

واضح رہے کہ آج اسپیکر آغا سراج درانی کی سربراہی میں سندھ اسمبلی کا اجلاس شروع ہوا تو بجٹ پر بات کرتے ہوئے ایم کیو ایم کے رکن عبداللہ نے پیپلزپارٹی کی قیادت کو تنقید کا نشانہ بنایا تھا۔

تنقید پر پی پی کی خاتون رکن اسمبلی شمیم ممتاز نے کہا کہ کچھ لوگ عظیم ہوتے ہیں اور کچھ لوگ محنت سے عظیم بنتے ہیں اور کچھ لوگ ایسے بھی ہوتے ہیں کہ عظمت کو خود پرطاری کرلیتے ہیں، اگر دبئی کی بات نکلی تو ہم لندن کی بات کریں گے۔

ایم کیو ایم کے رکن اسمبلی عظیم فاروقی نے پیپلز پارٹی کے ایم پی اے مکیش کمار چاؤلہ پر تنقید شروع کردی جس کے بعد دونوں اراکین نے اسپیکر ڈائس کے سامنے جھگڑا شروع کردیا۔

یاد رہے کہ سندھ اسمبلی میں ایم کیو ایم پیپلز پارٹی جھڑپیں ہوتی رہتی ہیں، لیکن ہاتھا پائی کی نوبت پہلی بار آئی ہے۔

دیگر اراکین اسمبلی نے ایوان میں ہاتھا پائی کو افسوس ناک قرار دیتے ہوئے ایوان کے تقدس کی پامالی قرار دیا ہے۔