کراچی: پاکستان کے سب سے بڑے شہر کراچی کا ایڈمنسٹریٹر تبدیل ہوگا یا نہیں؟حتمی فیصلہ وزیر اعلیٰ ہاؤس سے کچھ دیربعد جاری ہوگا۔
اے آر وائی نیوز کے مطابق وزیراعلیٰ ہاؤس میں پیپلزپارٹی کا اہم مشاورتی اجلاس شروع جاری ہے، اجلاس کی صدارت وزیر اعلیٰ سندھ مراد علی شاہ کررہے ہیں۔
اجلاس میں ناصر حسین شاہ، وزیر اطلاعات سندھ شرجیل میمن، وزیر محنت سعید غنی، وزیر خوراک مکیش چاولہ سمیت ایڈمنسٹریٹر کراچی مرتضیٰ وہاب بھی شریک ہیں۔
اجلاس میں پیپلز پارٹی ایم کیو ایم کے مطالبات پرغور کررہی ہے، اس کے علاوہ مرتضیٰ وہاب کا استعفیٰ منظوری کیا جائے یا نہیں اس پر بھی غور کیا جارہا ہے۔
ذرائع کے مطابق سندھ حکومت ایم کیو ایم کے نامزد کردہ سیاسی یا سرکاری ایڈمنسٹریٹر کی تعیناتی کی منظوری دے گی، سیاسی ایڈمنسٹریٹر کے طور پر رہنماء ایم کیو ایم عبد الوسیم کا نام پیپلز پارٹی کو بھجوادیا گیا ہے۔
ذرائع کا بتانا ہے کہ سرکاری افسر کو ایڈمنسٹریٹر بنانے کی صورت میں ڈاکٹر سیف الرحمان کا انتخاب ہو سکتا ہے۔
ذرائع کا کہنا ہے کہ ایم کیو ایم پاکستان کے مطالبے پر ایک ضلعی میونسپل ایڈمنسٹریٹر کو بھی آج تبدیل کیے جانے کا امکان ہے، ڈسٹرکٹ میونسپل کارپوریشن ایسٹ میں ایم کیو ایم کا نامزد کردہ افسر ایڈمنسٹریٹر مقرر ہو گا۔
واضح رہے کہ گزشتہ روز پاکستان پیپلز پارٹی کے رہنما اور سندھ کے صوبائی وزیر سعید غنی نے کہا تھا کہ کراچی کا اگلا ایڈمنسٹریٹر ایم کیو ایم سے مشاورت کے بعد ہی تعینات کیا جائے گا۔
یاد رہے کہ ایڈمنسٹریٹر کراچی مرتضیٰ وہاب 2 ماہ قبل وزیر اعلیٰ سندھ مراد علی شاہ کو استعفیٰ دے چکے ہیں، مرتضیٰ وہاب نے دیا ہوا استعفیٰ واپس نہیں لیا ہے۔
