ARYNews.tv | Urdu – Har Lamha Bakhabar

Tag: سندھ فوڈ اتھارٹی

  • عید پر غیر معیاری مٹھائی یا ہوٹل کے کھانوں کی شکایت اس واٹس ایپ نمبر پر کریں

    عید پر غیر معیاری مٹھائی یا ہوٹل کے کھانوں کی شکایت اس واٹس ایپ نمبر پر کریں

    کراچی: ڈی جی سندھ فوڈ اتھارٹی نے عید الفطر پر غیر معیاری اشیائے خورد و نوش بیچنے والوں کے خلاف سخت کارروائی کا اعلان کیا ہے۔

    تفصیلات کے مطابق سندھ فوڈ اتھارٹی نے عید الفطر کے موقع پر خصوصی ٹیمیں تشکیل دے دی ہیں، جو عید کے دنوں میں پکوان سینٹرز، ریستوران، ہوٹلز اور کھانے پینے کی دکانوں پر چھاپے ماریں گی۔

    وزیر اعلیٰ سندھ کے معاون خصوصی برائے خوراک عبدالجبار خان کی ہداہت پر نوٹیفیکیشن جاری کر دیا گیا، جس کے مطابق ڈی جی سندھ فوڈ اتھارٹی آصف جان صدیقی نے خبردار کیا ہے کہ عید کے دوران غیر معیاری خوراک کی فروخت پر سخت کارروائی ہوگی۔

    سندھ فوڈ اتھارٹی نے عوامی شکایات کے لیے 24/7 ہیلپ لائن نمبر بھی جاری کر دیا ہے، ڈی جی سنڈھ فوڈ اتھارٹی کے مطابق شہری کسی بھی وقت غیر معیاری خوراک کی شکایت واٹس ایپ نمبر 03300116553 پر درج کرا سکتے ہیں۔

    ‘میری زندگی کی یادگار عید’

    عید کے دوران سندھ فوڈ اتھارٹی کی ٹیمیں بازاروں، ہوٹلوں اور مٹھائی کی دکانوں کا شکایات پر معائنہ کریں گی، ترجمان سندھ فوڈ اتھارٹی کے مطابق سندھ فوڈ اتھارٹی نے کراچی، حیدرآباد، میرپورخاص، سکھر، شہید بینظیرآباد اور لاڑکانہ میں ٹیمیں مقرر کی ہیں۔

    ڈی جی کا کہنا ہے کہ عید الفطر کے موقع پر خوراک کے معیار پر کوئی سمجھوتہ نہیں ہوگا، سندھ فوڈ اتھارٹی کی ٹیمیں صفائی کے معیارات پر عمل درآمد کا بھی جائزہ لیں گی، اور عید کے دوران عوام کو محفوظ اور معیاری خوراک کی فراہمی یقینی بنائی جائے گی۔

  • کراچی : دودھ میں ملاوٹ کرنے والے ہوشیار ہوجائیں

    کراچی : دودھ میں ملاوٹ کرنے والے ہوشیار ہوجائیں

    کراچی : سندھ فوڈ اتھارٹی نے دودھ میں ملاوٹ کرنے والوں کے خلاف کارروائی کا فیصلہ کرلیا، آل ملک ریٹیلرزعہدیداران نے   مکمل تعاون کی یقین دہائی کرادی ہے۔

    تفصیلات کے مطابق ڈائریکٹرجنرل سندھ فوڈاتھارٹی آغا فخر حسین کی زیرصدارت اجلاس ہوا، اجلاس آل ملک ریٹیلرزایسوسی ایشن کے عہدیداران کے ساتھ ہوا۔

    اجلاس میں ملاوٹ سے پاک دودھ کی فراہمی کویقینی بنانے پر اتفاق کرتے ہوئے دودھ میں ملاوٹ کرنے والوں کے خلاف کارروائی کا متفقہ فیصلہ کرلیا گیا۔

    آل ملک ریٹیلرزعہدیداران نے سندھ فوڈ اتھارٹی کیساتھ مکمل تعاون کی یقین دہائی کرائی ، ڈی جی فوڈسندھ نے کہا کہ ملاوٹ سےپاک کھانےپینےکی اشیاکی فراہمی کویقینی بنارہےہیں۔

    آغا فخر حسین کا کہنا تھا کہ دودھ کے ٹیسٹ کیلئے5لیب بھی قائم کررہے ہیں، ایک لیب سندھ فوڈاتھارٹی کےدفترمیں قائم کردی گئی ہے جبکہ دودھ کی بڑی دکانوں پر دودھ ٹیسٹنگ کٹس بھی فراہم کی جارہی ہیں۔

  • رمضان میں ملاوٹ سے پاک اشیا کی فراہمی کے لیے فوڈ اتھارٹی کی بڑی کارروائی

    رمضان میں ملاوٹ سے پاک اشیا کی فراہمی کے لیے فوڈ اتھارٹی کی بڑی کارروائی

    کراچی: رمضان میں ملاوٹ سے پاک اشیا کی فراہمی کے لیے سندھ فوڈ اتھارٹی نے کارروائیاں شروع کر دیں، اس سلسلے میں کورنگی میں جعلی جوس اور منرل واٹر بنانے والی ایک فیکٹری سیل کر دی گئی ہے۔

    تفصیلات کے مطابق سندھ فوڈ اتھارٹی کی ٹیم نے ڈائریکٹر جنرل آغا فخر حسین کی سربراہی میں کراچی کے علاقے کورنگی میں ایک فیکٹری پر چھاپا مارا جس میں جعلی جوس اور جعلی منرل واٹر تیار کیا جا رہا تھا۔

    اتھارٹی کی ٹیم نے فیکٹری سے بڑی تعداد میں جعلی جوس کے ڈبے اور جعلی منرل واٹر کی بوتلیں برآمد کیں، ٹیم نے تمام جعلی مشروبات اور پانی کو ضائع کر دیا، اس کارروائی کے موقع پر مقامی پولیس بھی ایس ایف اے کی ٹیم کے ہمراہ تھی۔

    ڈائریکٹر جنرل سندھ فوڈ اتھارٹی آغا فخر حسین نے میڈیا سے گفتگو میں کہا کہ ہم رمضان المبارک میں ملاوٹ سے پاک کھانے پینے کی اشیا کی فراہمی کو یقینی بنانے کی کوشش کر رہے ہیں، ملاوٹ شدہ اشیا فروخت کرنے والوں کے خلاف بلا امتیاز کارروائی کی جا رہی ہے، انھوں نے تنبیہہ کی کہ ملاوٹ شدہ کھانے پینے کی اشیا فروخت کرنے والے اپنی حرکتوں سے باز آ جائیں۔

  • سندھ فوڈ اتھارٹی نے کراچی یونیورسٹی کے گندے کینٹینز بند کرا دیے، بھاری جرمانہ عائد

    سندھ فوڈ اتھارٹی نے کراچی یونیورسٹی کے گندے کینٹینز بند کرا دیے، بھاری جرمانہ عائد

    کراچی: سندھ فوڈ اتھارٹی نے کراچی یونیورسٹی کے گندے کینٹینز بند کرا دیے، بھاری جرمانہ بھی عائد کر دیا۔

    تفصیلات کے مطابق سندھ فوڈ اتھارٹی کی ٹیم اچانک کراچی یونیورسٹی میں قائم کینٹینز کا معائنہ کرنے پہنچ گئی، ڈائریکٹر جنرل سندھ فوڈ اتھارٹی آغا فخر حسین بھی ٹیم کے ہمراہ تھے۔

    جامعہ کراچی کے کینٹینز کا جب معائنہ کیا گیا تو صفائی ستھرائی کی صورت حال ناقص پائی گئی، جس پر اندر قائم متعدد کینٹینوں پر جرمانے عائد کیے گئے، اور مجموعی طور پر 2 لاکھ روپے کے جرمانے عائد کیے گئے، گندے کینٹینوں کو سندھ فوڈ اتھارٹی کی ٹیم نے سر بمہر بھی کر دیا ہے جو صفائی ستھرائی کی صورت حال بہتر نہ ہونے تک بند رہیں گی۔

    اس موقع پر ڈائریکٹر جنرل سندھ فوڈ اتھارٹی نے وائس چانسلر کراچی یونیورسٹی سے ملاقات بھی کی، جس میں فیصلہ کیا گیا کہ کراچی یونیورسٹی میں قائم کینٹینز سندھ فوڈ اتھارٹی کے قوانین پر عمل کریں گی، اور معروف فوڈ چینز کو بھی جامعہ کراچی میں کینٹینز قائم کرنے کی جگہ فراہم کی جائے گی۔

    فیصلے کے مطابق فوڈ چینز کی جانب سے اعلیٰ معیار کی حفظان صحت کے اصولوں کے مطابق کینٹینز قائم کیے جائیں گے، اور اس سلسلے میں سندھ فوڈ اتھارٹی کراچی یونیورسٹی کے ساتھ مکمل تعاون کرے گی۔

  • پی ٹی آئی رہنما کا ریسٹورنٹ سیل کردیا گیا

    پی ٹی آئی رہنما کا ریسٹورنٹ سیل کردیا گیا

    کراچی: سندھ فوڈ اتھارٹی نے پی ٹی آئی رہنما خرم شیر زمان کا ریسٹورنٹ سیل کردیا۔

    تفصیلات کے مطابق خرم شیر زمان نے میڈیا کو بتایا کہ آج سندھ حکومت نے انتقامی کارروائی کرتے ہوئے میرے ریسٹورنٹ کو سیل کردیا ہے۔

    پی ٹی آئی رہنما کا کہنا تھا کہ بغیر جواز کے ریسٹورنٹ سیل کیا گیا کسی قسم کا کوئی نوٹس نہیں دیا گیا۔

    ادھر پی ٹی ۤآئی رہنما خرم شیر زمان کے بیان پر سندھ فوڈ اتھارٹی کا بیان بھی سامنے آگیا ہے۔

    یہ بھی پڑھیں: پی ٹی آئی رہنما علی زیدی کی رہائشگاہ سب جیل قرار

    بیان میں کہا گیا کہ سندھ فوڈ اتھارٹی نے صدرمیں ریسٹورنٹ کوسیل کیا، یہاں صفائی کاناقص انتظام تھا اور ورکرزکا میڈیکل سرٹیفکیٹ بھی نہیں تھا ساتھ یہ بھی بتایا گیا کہ ریسٹورنٹ پاکستان تحریک انصاف کےرہنما خرم شیرزمان کی ملکیت ہے۔

  • کراچی: زہریلے بن فروخت کرنے والی فیکٹریاں سیل

    کراچی: زہریلے بن فروخت کرنے والی فیکٹریاں سیل

    کراچی: صوبہ سندھ کے دارالحکومت کراچی میں زہریلے بن فروخت کرنے والی 3 فیکٹریوں کو سیل کردیا گیا، فیکٹریوں میں گندے پانی اور ناقص اجزا سے بن بنائے جارہے تھے۔

    اے آر وائی نیوز کے پروگرام ذمہ دار کون کی ٹیم نے سندھ فوڈ اتھارٹی کے ساتھ مل کر زہریلے بن فروخت کرنے والوں کو بے نقاب کردیا۔

    کراچی کے علاقے اولڈ سٹی ایریا میں سالوں سے قائم بن بنانے والی 3 فیکٹریوں کو سیل کردیا گیا، یہ بن ٹھیلوں پر بکنے والے بن کباب وغیرہ کے لیے سپلائی کیے جاتے تھے۔

    فیکٹریاں نہایت غلیظ حالت میں تھی جہاں گندگی کے ڈھیر لگے تھے، بن بنانے کے لیے استعمال ہونے والے اجزا بھی ناقص اور غیر معیاری تھے جبکہ گندا پانی استعمال کیا جارہا تھا۔

    بن بنانے کے عمل میں استعمال ہونے برتن وغیرہ بھی گندگی و غلاظت سے بھرپور تھے۔ ان فیکٹریوں سے یومیہ 10 ہزار بن فروخت کیے جاتے ہیں۔

    فیکٹریوں کے ملازم بغیر ماسک اور دیگر حفاظتی سامان کے زہریلے بن بنانے میں مصروف تھے، فیکٹری مالکان کا دعویٰ تھا کہ ان کے ملازم حفظان صحت کے اصولوں کو مدنظر رکھتے ہیں تاہم آج ہی وہ اس سے غفلت برتتے پائے گئے۔

    فیکٹری مالکان کا یہ بھی شکوہ تھا کہ حکام بغیر اطلاع دیے ان کے پاس پہنچے۔

    سندھ فوڈ اتھارٹی کے حکام کی جانب سے فیکٹری مالکان کو 2 آپشنز دیے گئے، یا تو وہ 2 لاکھ روپے کا جرمانہ ادا کریں یا پھر اسی رقم سے فیکٹریوں کی حالت درست کر کے انہیں بین الاقوامی معیار کے مطابق بنائیں۔

    مالکان نے کوئی جائے فرار نہ پا کر فیکٹریوں کی حالت درست کرنے کا وعدہ کیا۔

    حکام نے عارضی طور پر فیکٹریوں کو سیل کر کے مالکان کو اپنے دفتر رپورٹ کرنے کا حکم دیا اور ساتھ ہی وارننگ بھی دی کہ اگر حکام کی اجازت اور معاملات درست کیے بغیر فیکٹریوں کو کھولا گیا تو انہیں مستقل بنیادوں پر سیل کردیا جائے گا۔

  • تمام دودھ فروشوں کے لیے اہم سرکاری ہدایت نامہ جاری

    تمام دودھ فروشوں کے لیے اہم سرکاری ہدایت نامہ جاری

    کراچی: سندھ فوڈ اتھارٹی نے دودھ فروشوں کے لیے اہم ہدایت نامہ جاری کر دیا۔

    اے آر وائی نیوز کے مطابق سندھ فوڈ اتھارٹی نے دودھ فروشوں کے لیے ہدایت نامہ جاری کرتے ہوئے کہا ہے کہ حفظان صحت کے مطابق دودھ کی فراہمی یقینی بنائی جائے, دودھ کی ٹرانسپورٹ حفظان صحت کے اصولوں کے مطابق ہو، دودھ ٹرانسپورٹ کرنے والی گاڑیوں کا لائسنس ہونا بھی لازمی ہے۔

    ہدایت نامے کے مطابق دودھ کے تمام برتن اسٹیل فوڈگریڈ کے ہونا لازمی قرار دیا گیا ہے، دودھ کے استعمال کے برتن دن میں 2 بار دھونا لازمی ہوں گے، برتن صرف فوڈگریڈ صابن ہی سے دھونے کی اجازت ہوگی۔

    باڑے، کیٹل فارمز سے دودھ 1 گھنٹے میں دکانوں پر پہنچانا ہوگا، دودھ کی ہینڈلنگ کرنے والے کا دستانے پہننا لازمی ہوگا، دودھ ہینڈلر کے لیے ماسک پہننا، داڑھی اور سر کا ڈھکا ہونا بھی لازمی قرار دیا گیا ہے۔

    دودھ کا درجہ حرارت 4 ڈگری ہوگا، پانی یا برف ملانے پر پابندی ہوگی، ملازمین کے کپڑے صاف، میڈیکل ریکارڈ ہونا لازمی ہے، دودھ کی گاڑیوں پر جراثیم کش اسپرے کرنا لازمی ہوگا اور ریکارڈ بھی رکھنا ہوگا۔

    دودھ کی دکانوں کا سندھ فوڈ اتھارٹی سے لائسنس شدہ ہونا لازمی ہے، یہ دکانیں صاف ستھری، جراثیم سے پاک ہوں، دکان پر صاف پانی موجود ہونا لازمی ہوگا، دودھ سپلائر کا شناختی کارڈ، تمام ریکارڈ دکان دار کے پاس لازمی ہو۔

    ہدایت نامے کے مطابق دکانوں پر تمام اشیا سندھ فوڈ اتھارٹی ریگولیشن کے مطابق ہونا ضروی ہے۔

  • کرونا وائرس: سندھ میں فوڈ سینٹرز کے لیے کڑی ہدایات جاری

    کرونا وائرس: سندھ میں فوڈ سینٹرز کے لیے کڑی ہدایات جاری

    کراچی: سندھ فوڈ اتھارٹی نے کھانے پینے کے کاروبار سے منسلک افراد کے لیے کڑی ہدایات جاری کردیں، تمام افراد کا یومیہ چیک اپ کیا جائے گا۔

    تفصیلات کے مطابق سندھ فوڈ اتھارٹی نے کرونا وائرس سے بچاؤ کے لیے کھانے پینے کے کاروبار سے منسلک احتیاطی تدابیر کا ہدایت نامہ جاری کر دیا، ہدایت نامہ سندھ فوڈ اتھارٹی کے سائنٹفک پینل نے جاری کیا ہے۔

    سندھ فوڈ اتھارٹی نے کرونا کے حوالے سے ہوٹل مالکان، ریستوران، فوڈ آپریٹرز، ملازمین اور مالکان کے لیے ہدایت نامہ جاری کیا ہے جس میں کہا گیا ہے کہ تمام فوڈ پوائنٹس، ہوٹل، اور دکانداروں کے ملازمین کے لیے ماسک،جراثیم کش صابن، سینی ٹائزر اور ڈرائر فراہم کیا جائے۔

    ہدایت نامے میں کہا گیا ہے کہ باورچی اور فوڈ ہینڈلرز دوران کام تمام احتیاطی تدابیر پر عمل درآمد کریں۔ داخلے کے دروازے، فوڈ سے منسلک کاؤنٹرز اور کھانے کے استعمال ہونے والے بورڈز کو ہر استعمال پر جراثیم سے پاک کیا جائے۔

    فوڈ اتھارٹی کے مطابق تمام ملازمین نزلہ، زکام، کھانسی، ٹائی فائیڈ یا ہیپاٹائٹس وغیرہ سے متعلق اپنے فوڈ سپروائزر کو اطلاع دیں۔ تمام فوڈ آپریٹرز انفرا تھرمامیٹر کا استعمال کریں اور ملازمین کا جسمانی درجہ حرارت یومیہ چیک کیا جائے۔

    ہدایت نامے میں کہا گیا ہے کہ ملازمین میں بخار اور کھانسی یا دیگر ابتدائی علامات کی صورت میں فوری حکومت سندھ سے رجوع کیا جائے۔

  • مصالحوں میں ٹیکسٹائل کلر، برادہ، چاول کا چھلکا ملانے کا انکشاف

    مصالحوں میں ٹیکسٹائل کلر، برادہ، چاول کا چھلکا ملانے کا انکشاف

    کراچی: شہر قائد کے مختلف علاقوں میں تیار ہونے والے مصالحوں میں ٹیکسٹائل کلر، برادہ اور چاول کے چھلکے کے استعمال کا انکشاف ہوا ہے۔

    تفصیلات کے مطابق سندھ فوڈ اتھارٹی نے ضلع غربی کے علاقے پیر آباد اور ضلع وسطی کے علاقے لیاقت آباد میں مختلف مصالحہ فیکٹریوں پر چھاپے مارے، انکشاف ہوا کہ ان فیکٹریوں میں بنائے جانے والے مصالحوں میں ٹیکسٹائل میں استعمال ہونے والا رنگ، برادہ اور چاول کے چھلکے کی ملاوٹ کی جا رہی ہے۔

    چھاپے کے دوران یہ بھی معلوم ہوا کہ جس جگہ مصالحے تیار کیے جا رہے تھے وہاں گندگی اور کیڑے مکوڑوں کی بھرمار تھی، مصالحوں میں مضر صحت اجزا ملے ہونے کا بھی انکشاف ہوا۔

    ملاوٹ کرنے والے عوام کی زندگیوں سےکھیل رہے ہیں، وزیراعظم

    اے آر وائی نیوز کے مطابق سندھ فوڈ اتھارٹی نے ڈپٹی ڈائریکٹر سمیرا حسین کی سربراہی میں کارروائی کرتے ہوئے پیر آباد کی فیکٹری کو سیل کر دیا، اور 4000 کلو گرام کے لگ بھگ ملاوٹ شدہ مال ضبط کر لیا، فیکٹری پر 50 ہزار روپے جرمانہ بھی عائد کیا گیا۔

    ضلع وسطی میں قائم فیکٹری کو وارننگ دے دی گئی، ترجمان سندھ فوڈ اتھارٹی کا کہنا تھا کہ فیکٹری کے تمام موجود غیر معیاری مصالحوں کو ضبط کر کے تلف کر دیا گیا ہے۔

  • ہائی کورٹ اور سندھ سیکریٹریٹ کے اطراف گندے ہوٹل سیل

    ہائی کورٹ اور سندھ سیکریٹریٹ کے اطراف گندے ہوٹل سیل

    کراچی: ضلع ساؤتھ ریڈ زون کے ہوٹل اور چائے خانے سندھ فوڈ اتھارٹی کے نشانے پر آ گئے، ہائی کورٹ اور سندھ سیکریٹریٹ کے اطراف موجود ہوٹلوں پر سندھ فوڈ اتھارٹی نے چھاپے مارے۔

    تفصیلات کے مطابق سندھ فوڈ اتھارٹی نے ہائی کورٹ کے آس پاس بنے گندے ہوٹلوں اور چائے خانوں کے خلاف کارروائی کے دوران متعدد ہوٹلوں کو سیل کر دیا جب کہ متعدد پر جرمانے عاید کیے گئے۔

    ایس ایف اے حکام کے مطابق ہوٹلوں کے کچن میں کیمیکل کے ڈرم پائے گئے، آٹے اورکھانے پینے کی اشیا پر مکھیوں کی بھرمار دیکھی گئی، کچن گندے اور صفائی کا کوئی انتظام نہ تھا۔

    گندے پانی اور ناقص چائے کو ایک پیپر کے ذریعے چیک کیا جا رہا ہے

    ایس ایف اے حکام کے چھاپوں کے دوران معلوم ہوا کہ غذائی اجناس اور مختلف کھانوں کی تیاری میں استعمال ہونے والی اشیا کو کیمیکل کے ڈرم میں رکھا جا رہا تھا، پکوان کی تیاری میں غیر معیاری تیل اور مصالحے استعمال کیے جا رہے تھے۔

    مزید خبریں پڑھیں:  سندھ فوڈ اتھارٹی نے ڈبل روٹی بنا نے والی فیکٹری کو سیل کر دیا

    حکام کا کہنا ہے کہ متعدد ہوٹلوں میں سینٹری کا ناقص انتظام تھا، چائے کے ہوٹلوں میں ناقص چائے کی پتی استعمال کی جا رہی تھی، جب کہ چائے کے لیے پانی بھی گندا استعمال ہو رہا تھا۔

    ہوٹل کو سیل کیا جا رہا ہے

    حکام کے مطابق متعدد ہوٹلوں پر 30000 روپے تک کے جرمانے کیے گئے ہیں۔

    یاد رہے کہ اکیس اگست کو سندھ فوڈ اتھارٹی نے ڈسٹرکٹ سینٹرل ایف بی انڈسٹریل ایریا میں صفائی کی ناقص صورت حال پر کارروائی کرتے ہوئے ڈبل روٹی بنانے والی ایک فیکٹری کو سیل اور دو دیگر فیکٹریوں پر 3 لاکھ روپے جرمانہ کر دیا تھا۔