کراچی: سندھ پولیس کے 163 اہل کاروں کے نام اقوام متحدہ کے امن مشن کے لیے فائنل کرلیے گئے ہیں، جن میں کانسٹیبل سے لے کر ایس ایس پی رینک تک کے افسران شامل ہیں۔
تفصیلات کے مطابق یو این مشن کے لیے سندھ پولیس کی جانب سے خواہش مند امیداروں کو طلب کیا گیا تھا، جن 163 اہل کاروں کو منتخب کیا گیا ہے ان میں کانسٹیبل سے لے کر ایس ایس پی رینک تک کے امیدوار شامل ہیں۔
ذرایع کا کہنا ہے کہ یو این مشن پر جانے کے لیے خواتین اور مرد امیدواروں نے مختلف مقامات پر تربیت کا عملی مظاہرہ کیا۔
امیدواروں نے ریٹرن اسکریننگ اور نشانہ بازی سمیت دیگر ٹیسٹ دیے، 3 اور 4 مئی کو امیداروں کا مختلف سینٹرز پر ریٹرن ٹیسٹ لیا گیا۔
یہ بھی پڑھیں: اقوام متحدہ امن مشن نے پاکستان سے دوبارہ اہلکار مانگ لیے
ذرایع نے بتایا کہ 5 مئی کو رزاق آباد میں شوٹنگ اور ڈرائیونگ ٹیسٹ بھی لیا گیا، مشن پر جانے کے لیے سندھ پولیس کے 249 امیدواروں نے حصہ لیا، تاہم 61 امیدوار کسی امتحان میں شامل ہونے کے لیے نہ پہنچ سکے۔
25 امیدوار شوٹنگ رینج میں قابلیت دکھانے میں فیل ہوئے، مجموعی طور پر 163 امیدواروں کے نام یو این مشن کے لیے فائنل کیے گئے۔
ذرایع کے مطابق امیداروں کے نام اسلام آباد متعلقہ حکام کو بھجوائے جائیں گے، کام یاب امیداروں کو مختلف مراحل میں یو این مشن کے لیے بھیجا جائے گا۔
خیال رہے کہ اقوام متحدہ امن مشن نے پاکستان سے دوبارہ اہل کار مانگ لیے تھے، مشن کے لیے منتخب اہل کاروں میں 20 فی صد خواتین اہل کار شامل ہوں گی، منتخب کیے گئے 500 جوانوں کی تربیت جولائی اور اگست میں ہوگی۔