کراچی : آئی جی سندھ اے ڈی خواجہ نے اپنا عہدہ دوبارہ سنبھال لیا ہے جس کے بعد وہ وزیراعلیٰ سندھ کی سربراہی میں ہونے والے ایپکس کمیٹی کے 18 ویں اجلاس میں بھی شریک ہوئے۔

تفصیلات کے مطابق 19 دسمبر کو رخصت پر گئے آئی جی سندھ اے ڈی خواجہ نے دوبارہ چارج سنبھال لیا ہے اور آج وزیراعلیٰ سندھ سید مراد علی شاہ کی سربراہی میں ہونے والے سندھ اپیکس کمیٹی کے اجلاس میں بھی شرکت کی، اُن کی غیر موجودگی میں کراچی پولیس چیف مشتاق مہر کو قائم مقام انسپکٹر جنرل تعینات کردیا گیا تھا۔

*یہ پڑھیں : آئی جی سندھ اے ڈی خواجہ رخصت پر چلے گئے

ذرائع کا کہنا ہے کہ اللہ ڈنو خواجہ 19 دسمبر کو وزیراعلیٰ سندھ سے ملاقات کے بعد رخصت پر چلے گئے تھے جس کے بعد سندھ اور وفاقی حکومت کے درمیان اختلافات کی خبریں گردش کرنے لگیں اور ساتھ ہی یہ تاثر ابھرنے لگا کہ آئی جی اے ڈی خواجہ اور سندھ حکومت کے درمیان بعض معاملات پر اختلافات پائے جاتے تھے جس کے باعث انہیں جبری رخصت پر بھیج دیاگیا ہے۔

*یہ بھی پڑھیں : آئی جی سندھ کوعہدے پر رہنے کا حکم امتناع 

اس حوالے سے سندھ ہائی کورٹ میں اے ڈی خواجہ کی جبری رخصت کے خلاف درخواست بھی دائر کی گئی تھی جس پر عدالت نے آئی جی سندھ کو عہدے پر رہنے کا حکم امتناعی بھی جاری کردیا تھا۔

کراچی : وفاقی اور سندھ حکومت نے متفقہ طور پر اے ڈی خواجہ کو بہ طور آئی جی سندھ برقرار رکھنے کا فیصلہ کیا گیا ہے۔

اے آر وائی نیوز کے رپورٹر ارباب چانڈیو کے مطابق سندھ میں آئی جی کے عہدے پر کے لیے وفاقی اور صوبائی حکومتوں نے اتفاق رائے سے موجودہ آئی جی سندھ اللہ ڈنو خواجہ کو برقرار رکھنے کا فیصلہ کیا ہے۔

وفاقی اور صوبائی حکومت نے آئی جی اے ڈی خواجہ کی کارکردگی کو سراہتے ہوئے اتفاق کیا کہ پولیس میں میرٹ پر بھرتیاں کیں جب کہ تقرر و تبادلوں میں بھی میرٹ کو ہی مد نظر رکھا گیا ہے اس لیے ان کے تبادلے سے سفارش کلچر دوبارہ اٹھنے کا خدشہ ہے۔

کراچی آپریشن کے دوران آئی جی سندھ اے ڈی خواجہ کی کارکردگی بھی قابلِ ستائش ہے اور ان کو ہٹائے جانے سے کراچی آپریشن کی رفتار اور سمت میں اثر پڑ سکتا ہے وفاقی اور سندھ حکومت میں اے ڈی خواجہ کو نہ ہٹانے پر اتفاق کرلیا گیا ہے۔

واضح رہے کہ کچھ روز پہلے خبریں گردش میں تھیں کہ سندھ پولیس کے اعلیٰ عہدوں پر تبدیلیان کی جا رہی ہیں اور آئی جی سندھ اے ڈی خواجہ کو اُن کے عہدے سے ہٹائے جانے کا امکان ہے ۔