کراچی : وزیراعلیٰ سندھ سید قائم علی شاہ نے کہا ہے کہ ملک حالت جنگ میں ہے اور ہم قومی جوش و جذبے کے ساتھ دہشت گردی کے خلاف لڑ رہے ہیں۔
اس حوالے سے سندھ پولیس اور بالخصوص اسپیشل برانچ اور محکمہ انسداد دہشت گردی کی کارکردگی قابل ذکر ہے اور ضرورت اس بات کی ہے کہ ان دونوں محکموں کو مزید مستحکم اور موثر بنانے کے لئے نئے سرے سے پالیسی مرتب کی جائے۔
ان خیالات کا اظہار انہوں نے وزیراعلیٰ ہاوٴس میں اسپیشل برانچ اور محکمہ انسداد دہشت گردی کو نئے سرے سے مستحکم کرنے کے حوالے سے منعقدہ اجلاس سے خطاب کرتے ہوئے کیا۔
اجلاس میں ایڈیشنل آئی جی اسپیشل برانچ اے ڈی خواجہ، آئی جی پولیس سندھ غلام حیدر جمالی، ایڈیشنل آئی جی کاوٴنٹر ٹیررزم ڈیپارٹمنٹ (سی ٹی ڈی)ڈاکٹر ثناء اللہ عباسی ودیگر نے وزیر اعلیٰ سندھ کو بریفنگ دی۔
