Tag: سندھ کی خبریں

کراچی: پاکستان پیپلز پارٹی نے احتساب کے سلسلے میں وفاقی حکومت سے یکساں پیمانے کا مطالبہ کر دیا ہے، وزیر اطلاعات سندھ نے کہا کہ ہمارا احتساب بھی اسی پیمانے سے کیا جائے جس سے حکومتی لوگوں کا ہوتا ہے۔

تفصیلات کے مطابق وزیر اطلاعات سندھ سعید غنی نے کراچی میں نیوز کانفرنس کرتے ہوئے کہا کہ تاریخ میں پہلی بار مبینہ جرم کا ٹرائل کسی اور صوبے میں کیا جا رہا ہے، پیپلز پارٹی قیادت کو تنگ کرنے کی نئی روایات کے اچھے اثرات نہیں ہوں گے۔

سعید غنی کا کہنا تھا کہ پیپلز پارٹی کے خلاف کارروائیوں میں آئین اور قانون پر عمل نہیں ہوتا، آئین اور قانون کے بنیادی حقوق کا خیال نہیں کیا جاتا، کس آئین میں لکھا ہے کراچی میں جرم پر ٹرائل راولپنڈی میں ہوگا۔

انھوں نے کہا آصف زرداری اور فریال تالپور پر الزامات کا تعلق سندھ سے ہے، جن اداروں کو ملوث کیا جا رہا ہے ان کا تعلق سندھ سے ہے، جب کہ ٹرائل دوسرے صوبے میں کیا جا رہا ہے، ہمیں ڈیل کرنی ہوتی تو اتنی مشکلات برداشت نہیں کرتے، آصف زرداری اور فریال تالپور جیل ہیں، ریمانڈ بھی ختم ہو گیا الزام ثابت نہ ہوا۔

وزیر اطلاعات سندھ نے کہا کہ ہم یہ نہیں کہہ رہے کہ ملک سے باہر بھجوا دیں یا جیل سے آزاد کر دیں، سیکڑوں لوگوں کو کیسز کی بنیاد پر پنڈی کی جیلوں میں بند کر دیا گیا، ہم احسان نہیں بلکہ اپنا حق مانگ رہے ہیں، سندھ کی جیلوں اور اداروں پر اعتماد نہ کرنا بہت غلط بات ہے، ہم صرف ملک میں آئین و قانون پر عمل درآمد کی بات کر رہے ہیں، کسی قسم کی مہربانی حکومت سے نہیں لیں گے، اس بار بھی الزامات لگانے والے پیر پکڑ کر معافی مانگیں گے۔

انھوں نے مزید کہا کہ ہم کئی دنوں سے میڈیکل بورڈ میں ذاتی معالج کو شامل کرنے کا مطالبہ کر رہے ہیں، یہ کسی ریلیف کے لیے نہیں، ذاتی معالج تک رسائی کسی بھی قیدی کا بنیادی حق ہے۔

سعید غنی نے وفاقی کی جانب سے قیدیوں کی رہائی کے اقدام پر کہا کہ جس چیز کا کریڈٹ وفاقی حکومت لینے جا رہی ہے وہ ہم پہلے سے کر رہے ہیں، ایسے قیدیوں کو سندھ سے رہا کیا گیا جو جرمانے ادا نہیں کر سکتے تھے، ایسے کئی لوگوں کو بھی رہا کیا گیا جو کوئی اور جرم کرنے کے قابل نہیں تھے۔

لاڑکانہ: میاں بیوی کے معمولی گھریلو تنازعے کا انجام بہت برا نکلا جب ناراض داماد کو سسرال والوں نے پکڑ کر واشنگ پاؤڈر گھول کر پلا دیا۔

تفصیلات کے مطابق سندھ کے ضلع لاڑکانہ میں ایک شخص طارق چنہ نے بیوی کے ساتھ اس بات پر جھگڑا کیا تھا کہ وہ میکے سے دیر سے کیوں آئی، شوہر کے غصہ کرنے پر سسرال والوں نے اسے تشدد کا نشانہ بنا دیا۔

رپورٹ کے مطابق سسرال والوں نے داماد طارق چنہ کو گھر بلا کر اس پر مبینہ طور پر تشدد کیا، اسے واشنگ پاؤڈر گھول کر پلا دیا، اور پھر پولیس کے حوالے کر دیا، جب کہ پولیس نے بھی سسر اور اس کے بیٹوں کی شکایت پر داماد ہی کو حراست میں لے لیا۔

اے ایس پی نے میڈیا کو بتایا کہ طارق چنہ کی حالت پولیس کی حراست میں غیر ہو گئی،جس پر اسے فوراً چانڈکا اسپتال منتقل کیا گیا۔ دوسری طرف طارق چنہ نے کہا کہ اس کے سسر علی احمد اور سالوں نے مل کر اس پر تشدد کیا اور پولیس کے حوالے کر دیا۔

جب کہ پولیس کا کہنا ہے کہ نوجوان طارق چنہ نے ناراض بیوی کو منانے میں ناکامی پر خود محلول پیا تھا۔

خیال رہے کہ گھریلو جھگڑوں کے باعث اس طرح کے واقعات بھی رونما ہوتے ہیں، رواں برس جنوری میں بھی ہربنس پورہ میں سسرالیوں نے داماد کو زنجیروں میں جکڑ کر تشدد کا نشانہ بنایا تھا، میاں بیوی کے جھگڑے پر سسرالی آپے سے باہر ہو گئے اور پہلے داماد کبیر کو اغوا کیا پھر زنجیروں میں جکڑ دیا، دل نہ بھرا تو سر کے بال بھی مونڈ دیے، اس واقعے کی ویڈیو بھی وائرل ہو گئی تھی۔

سانگھڑ: سندھ کے شہر سانگھڑ کے ایک ہوٹل کے بیرے کو چائے لانے میں تاخیر پر الیکشن کمیشن آفس کے چوکیدار نے گولی مار دی۔

تفصیلات کے مطابق سانگھڑ میں ہوٹل کے بیرے کو اس وقت عجیب صورت حال سے واسطہ پڑا جب وہ سانگھڑ کے الیکشن کمیشن آفس میں چائے لے کر گیا۔

ریسکیو ذرایع نے کہا ہے کہ بیرے کو اس وقت گولی ماری گئی جب بیرا چائے لے کر الیکشن کمیشن آفس پہنچا، چوکیدار تاخیر پر غصے میں آیا، اس نے گن سیدھی کی اور بیرے پر فائر کر دیا۔

سانگھڑ پولیس کا کہنا ہے کہ فائرنگ کرنے والا الیکشن کمیشن ضلعی آفس کا چوکیدار ہے، زخمی کے والد نے میڈیا کو بتایا کہ اس کے بیٹے کو الیکشن آفس کے چوکیدار نے یہ کہہ کر گولی ماری کہ وہ چائے تاخیر سے کیوں لایا۔

یہ بھی پڑھیں:  تھرپارکر اور سانگھڑ میں آسمانی بجلی نے تباہی مچا دی، 11 افراد جاں بحق

پولیس کے مطابق فائرنگ کا یہ واقعہ الیکشن کمیشن کے دفتر میں پیش آیا، بیرے کو گولی لگنے کے بعد لوگوں نے اپنی مدد آپ کے تحت اسے سول اسپتال پہنچایا جہاں ابتدائی طبی امداد دے کر زخمی کو نوابشاہ اسپتال منتقل کر دیا گیا۔

پولیس نے ملزم کو، جو الیکشن کمیشن آفس کا چوکیدار ہے، حراست میں لے لیا ہے۔

یاد رہے کہ گزشتہ ماہ ضلع سانگھڑ کے مختلف علاقوں میں بارش کے دوران آسمانی بجلی کی صورت میں آسمانی آفت نازل ہوئی تھی جس میں متعدد افراد جاں بحق ہو گئے تھے، سانگھڑ کی تحصیل کھپرو کے علاقے اچھڑو تھر میں بھی آسمانی بجلی سے 3 خواتین سمیت 4 افراد جاں بحق ہوئے تھے۔

سکھر: صالح پٹ میں نابالغ لڑکی کی شادی کرانے کے معاملے میں میڈیکل بورڈ کی رپورٹ نے اے آر وائی نیوز کی رپورٹ درست ثابت کر دی۔

تفصیلات کے مطابق 11 روز قبل صالح پٹ میں بچی ضمیراں کلہوڑو کی شادی کرائی جا رہی تھی، تاہم اے آر وائی نیوز کی ٹیم نے پولیس کے ہم راہ کارروائی کرتے ہوئے شادی رکوا دی تھی۔

آج سِول اسپتال سکھر کے میڈیکل بورڈ نے رپورٹ جاری کرتے ہوئے کہا کہ ضمیراں کلہوڑو کی عمر 15 سال ہے، شادی کے لیےعمر 18 سال ہونا لازمی ہے۔

سکھر میڈیکل بورڈ نے اپنی رپورٹ میں بچی کو نا بالغ قرار دے دیا، بچی کی والدہ کوڑی نے اسے 2 لاکھ 60 ہزار میں شادی کے لیے فروخت کیا تھا، تاہم کارروائی کے دوران پولیس نے دولہا حبدار علی کے ساتھ بچی کی والدہ کو بھی گرفتار کر لیا تھا۔

یہ بھی پڑھیں:  شقی القلب ماں نے 2 بچے پانی کی ٹینکی میں ڈبو دیے

واضح رہے کہ آج لاہور کے علاقے رائیونڈ میں ایک شقی القلب ماں نے اپنے ہی ہاتھوں اپنے دو بچوں کو شوہر کے ساتھ جھگڑے کے بعد پانی کی ٹینکی میں پھینک کر جان سے مار دیا ہے، بچوں کے قتل کے بعد اس نے اپنی گردن پر بھی چھری ماری، تاہم وہ بچ گئی۔

ادھر آج راولپنڈی میں بھی 7 سال کی ایک معصوم بچی مبینہ زیادتی کے بعد قتل کر دی گئی، ملزم گھر کا فرد نکلا، پولیس نے زیادتی کے شبہے میں بچی سدرہ کے چچا کو حراست میں لے لیا ہے۔