Tag: سندھ کی خبریں

کراچی: سندھ ہائی کورٹ نے آمدن سے زائد اثاثوں کے کیس میں پی پی رہنما خورشید شاہ کی 2 بیویوں، بیٹے، داماد کی عبوری ضمانت میں 16 جنوری تک توسیع کر دی۔

تفصیلات کے مطابق آج سندھ ہائی کورٹ میں آمدن سے زائد اثاثہ جات کے کیس میں ضمانتوں کی درخواستوں پر سماعت ہوئی، عدالت نے ایک بار پھر خورشید شاہ کے خاندان کے افراد کی ضمانت میں توسیع کر دی۔

عدالت نے صوبائی وزیر اویس شاہ اور دیگر ملزمان کی بھی ضمانت میں 16 جنوری تک توسیع کی ہے۔

نیب حکام نے عدالت سے استدعا کی کہ ملزمان کے خلاف انکوائری جاری ہے، مزید مہلت درکار ہے، جس پر عدالت نے نیب حکام کو انکوائری مکمل کرنے کے لیے 16 جنوری تک مہلت دے دی۔

یہ بھی پڑھیں:  خورشید شاہ این آئی سی وی ڈی سے سول اسپتال منتقل

16 اکتوبر کی گزشتہ سماعت پر سندھ ہائی کورٹ نے خورشید شاہ کی فیملی اور دیگر ملزمان کی ضمانت میں 15 نومبر تک توسیع کی تھی، جس کی مدت آج ختم ہو گئی تھی۔

قومی احتساب بیورو کی جانب سے خورشید شاہ کے خلاف آمدن سے زائد اثاثہ جات کیس کی تحقیقات کی جا رہی ہیں، جس میں انھیں 18 ستمبر کو گرفتار کیا گیا تھا، کرپشن کے اس کیس میں 16 ملزمان نے ضمانت کی درخواستیں دائر کر رکھی ہیں۔

نیب نے عدالت سے کہا تھا کہ پی پی رہنما کے خلاف اسے بینک اکاؤنٹس سمیت اہم ثبوت مل چکا ہے۔ واضح رہے کہ احتساب عدالت نے خورشید شاہ کا آمدن سے زائد اثاثہ جات کیس میں 23 نومبر تک جوڈیشل ریمانڈ منظور کر کے انھیں جیل بھیج دیا تھا، گزشتہ روز انھیں طبیعت کی خرابی پر ایم آر آئی کرانے کے لیے سول اسپتال سکھر منتقل کیا گیا تھا۔

تھرپارکر: صوبہ سندھ کے ضلع تھرپارکر اور سانگھڑ میں تیز بارش کے دوران آسمانی بجلی گرنے سے 11 افراد جاں بحق ہو گئے ہیں۔

تفصیلات کے مطابق آج ضلع تھرپارکر اور سانگھڑ کے مختلف علاقوں میں گرج چمک کے ساتھ بارش اور ژالہ باری شروع ہوئی ہے، تیز بارش کے دوران مختلف علاقوں میں آسمانی بجلی گرنے کے واقعات بھی رونما ہوئے۔

موصولہ اطلاعات کے مطابق تھرپارکر کے مختلف مقامات پر آسمانی بجلی گرنے کے واقعات میں 7 افراد جاں بحق ہو گئے ہیں، جب کہ آسمانی بجلی کی زد میں آکر 10 افراد شدید زخمی ہو گئے، جنھیں اسپتال منتقل کر دیا گیا ہے۔

ادھر ضلع سانگھڑ کی تحصیل کھپرو کے علاقے اچھڑو تھر میں بھی آسمانی بجلی گرنے کے دو مختلف واقعات میں 3 خواتین سمیت 4 افراد جاں بحق ہو گئے، جب کہ تین خواتین زخمی ہوئی ہیں، تاہم کھپرو پولیس نے دو خواتین کی موت کی تصدیق کی، پولیس کے مطابق آسمانی بجلی گرنے کا واقعہ گاؤں موکریا میں پیش آیا جہاں پر ایک ہی گھر کی 55 سالہ سنگھار اور 37 سالہ ماریت موقع پر جاں بحق ہوگئیں۔

یہ بھی پڑھیں:  اسکردو میں آسمانی بجلی گرنے سے 5 افراد جاں بحق

دوسرا واقعہ گاؤں جھواڑ میں پیش آیا جہاں پر تیس سالہ سلیمت اور ان کا دس سالہ بیٹا جاں بحق ہوئے، زخمیوں کو عمر کوٹ کے اسپتال لے جایا گیا۔

واضح رہے کہ آج ملک کے مختلف علاقوں میں بارشوں کا سلسلہ شروع ہو گیا ہے، اندرون سندھ بھی بارشیں شروع ہو گئی ہیں، کہیں کہیں ژالہ باری بھی ہو رہی ہے۔ اس دوران تھرپارکر میں آسمانی بجلی گرنے کے واقعات بھی رونما ہوئے۔

یاد رہے رواں سال جون میں گلگت بلتستان کے شہر اسکردو میں آسمانی بجلی گرنے سے 5 افراد جاں بحق جب کہ 7 سے زائد مکانات جل گئے تھے، یہ واقعہ اسکردو کے ضلع شگر کے نواحی گاؤں میں پیش آیا تھا جس میں جاں بحق ہونے والوں میں 3 بچے بھی شامل تھے۔

کراچی: سندھ ہائی کورٹ نے صوبائی سیکریٹری صحت کو حکم دیا ہے کہ صوبے کے تمام اسپتالوں میں اینٹی رے بیز ویکسین کی دستیابی کو یقینی بنایا جائے۔

تفصیلات کے مطابق آج سندھ ہائی کورٹ میں آوارہ کتوں کی روک تھام اور ویکسین کی عدم دستیابی کے کیس کی سماعت ہوئی، عدالت نے صوبائی انتظامیہ کو حکم دیا کہ آوارہ کتوں کی روک تھام کے لیے پی سی ون 15 دن میں منظور کرایا جائے۔

قبل ازیں، کیس کی پیروی کے لیے ایڈیشنل سیکریٹری بلدیات، کے ایم سی، ڈی ایم سیز کے نمایندے اور وکلا پیش ہوئے، سیکریٹری بلدیات نے کتوں کی روک تھام سے متعلق رپورٹ پیش کی، ایڈیشنل سیکریٹری نے کہا کہ کتوں کی روک تھام سے متعلق پلان ترتیب دے دیا گیا ہے، پی سی ون بھی بنا لیا گیا ہے۔ عدالت نے استفسار کیا کہ پی سی ون پر عمل درآمد کیسے ہوگا اور ٹاسک فورس کب بنے گی۔

ایڈیشنل سیکریٹری بلدیات نے عدالت کو بتایا کہ 2 دن میں ٹاسک فورس بنا دی جائے گی، سرکاری وکیل نے کہا کہ پی سی ون بھی ایک ماہ میں منظور کرا لیا جائے گا۔

تازہ ترین:  کراچی: کتے کے کاٹے سے 11 سال کا ایک اور بچہ انتقال کر گیا

عدالت میں درخواست دی گئی تھی کہ عباسی شہید اسپتال میں ویکسین نہ ہونے سے ایک شہری انتقال کر گیا، عدالت نے استفسار کیا کہ کیا عباسی شہید اسپتال میں ویکسین موجود نہیں ہے، نمایندہ کے ایم سی نے کہا کہ ہمارے پاس ویکسین ہے، جب کہ اسپتال کے نمایندے نے کہا وہ پرانا مریض تھا جو فالو اپ نہ کرانے کی وجہ سے انتقال کر گیا، کے ایم سی کے چاروں اسپتالوں میں ویکسین دستیاب ہے۔

کے ایم سی کے وکیل نے عدالت کو بتایا کہ کے ایم سی کے پاس فنڈز کی اب بھی کمی ہے، ہمارے پاس کتوں کو مارنے کے لیے زہر دستیاب نہیں، اس پر عدالت نے استفسار کیا کہ اگر زہر نہیں ہے تو پھر کیا کام کر رہے ہیں۔

دریں اثنا، عدالت میں وکیل ڈی ایم سی شرقی، ملیر، غربی، وسطی اور دیگر نے بھی رپورٹس جمع کرائیں، کلفٹن، شاہ فیصل اور کورنگی کنٹونمنٹ بورڈ کی جانب سے وکیل پیش ہوئے، جب کہ کراچی کنٹونمنٹ بورڈ کی جانب سے بھی وکالت نامہ جمع کرایا گیا، عدالت نے پوچھا کہ ملیر اور منوڑہ کنٹونمنٹ بورڈ کی طرف سے کوئی کیوں نہیں آیا، آیندہ سماعت پر تمام کنٹونمنٹ بورڈز اپنے جوابات جمع کرائیں، کنٹونمنٹ بورڈز بتائیں وہ کتوں کی روک تھام کے لیے کیا کر رہے ہیں۔

عدالت نے کہا کہ ٹاسک فورس کے ٹی او آرز دیکھنے کے بعد مزید کارروائی کریں گے، امید ہے فریقین اس مسئلے سے نکلنے کے لیے کوششیں کریں گے، عوام کو محفوظ بنانے کے لیے اقدامات کرنا پڑیں گے، 15 دن میں پیش رفت نہ ہوئی تو ذمہ دار کے خلاف کارروائی کریں گے۔

بدین: صوبہ سندھ کے علاقے پنگریو کے قریب ذوالفقار مرزا کی زرعی زمینوں پر مسلح افراد نے قبضہ کر لیا ہے، رکن صوبائی اسمبلی حسنین مرزا نے قبضے کی تصدیق کر دی۔

تفصیلات کے مطابق رکن سندھ اسمبلی حسنین مرزا نے کہا ہے کہ 1050 ایکڑ زرعی زمین ان کے بھائیوں، بہنوں اور والدہ کے نام پر ہے، مسلح افراد نے اس پر قبضہ کر لیا ہے۔

ذرایع کا کہنا ہے کہ زمین پر قبضہ کرنے والے ہتھیار بند افراد کی تعداد 100 کے قریب ہے، حسنین مرزا کا کہنا ہے کہ زرعی زمین پر قبضے کے خلاف پولیس کارروائی سے گریزاں ہے، قبضے کی سازش سندھ حکومت کی مرضی سے تیار کی گئی ہے، انتظامیہ نوٹس لے، رکن اسمبلی کا کہنا تھا کہ اپنی زمینوں پر بینک سے قرضہ بھی لے چکے ہیں۔

ادھر بدین پولیس کی بھاری نفری بکتر بند گاڑیوں کے ساتھ علاقے میں پہنچ گئی ہے، ذرایع کا کہنا ہے کہ مسلح ہتھیار بندوں سے تا حال کوئی مذاکرات نہیں ہوئے۔

جی ڈی اے کی وفاقی وزیر فہمیدہ مرزا کا بھی کہنا تھا کہ انھوں نے زرعی زمین کو آباد کر کے مقامی افراد کو کو روزگار فراہم کیا تھا، تاہم کچھ لوگوں نے زمین پر قبضہ جما لیا ہے اور سندھ حکومت صورت حال پر قابو نہیں پا رہی۔

موصولہ اطلاعات کے مطابق مسلح افراد نے مقامی پولیس کو بھی دھمکیاں دیں، مرزا فیملی کا کہنا ہے کہ قانون نافذ کرنے والے ادارے صورت حال کا نوٹس لیں۔