Tag: سندھ کی خبریں

کراچی: شہر قائد میں پتنگ کی قاتل ڈور سے ایک ہفتے میں دو افراد جان سے ہاتھ دھو بیٹھے ہیں، گزشتہ روز اورنگی جاتے ہوئے اے آر وائی نیوز سے وابستہ صحافی خیراللہ عزیز بھی ڈور پھرنے سے زخمی ہو گئے۔

تفصیلات کے مطابق کراچی میں پتنگ بازی کے دوران قاتل ڈور سے شہریوں کی ہلاکتوں اور زخمی ہونے کے واقعات میں اضافہ ہو گیا ہے، گزشتہ روز اے آر وائی سے وابستہ صحافی بھی نشانہ بن گئے۔

ایک کے بعد ایک واقعات سے پولیس کو آخر کار ہوش آ گیا، اورنگی میں کارروائیاں کر کے پتنگ اور ڈور بیچنے والوں اور اڑانے والوں کی پکڑ دھکڑ شروع کر دی گئی ہے۔

دوسری طرف گرفتار ملزمان معصوم بن گئے ہیں، ایک ملزم کا کہنا تھا کہ میری پتنگ کٹ کر گری، دوسرے نے بتایا میں کٹی پتنگ پکڑ رہا تھا کہ پولیس نے پکڑ لیا۔

یہ بھی پڑھیں:  کراچی: بنارس پل پر پتنگ کی ڈور پھرنے سے شہری کا گلا کٹ گیا

یاد رہے کہ 23 اکتوبر کو کراچی کے علاقے بنارس چوک کے پل پر پتنگ کی ڈور پھرنے سے اورنگی ٹاؤن کا رہایشی شہروز جان زندگی کی بازی ہار گیا تھا، متوفی موٹر سائیکل پر بھائی کے ساتھ جا رہا تھا جب یہ حادثہ پیش آیا، متوفی کے بھائی نے بتایا کہ بنارس پل پر عبداللہ کالج کے قریب اچانک ڈور گلے پر پھر گئی، بھائی نے ڈور کو کھینچا تو گردن سے خون بہنا شروع ہو گیا۔

گزشتہ روز 6 سالہ بچہ بھی قاتل ڈور کی وجہ سے جان سے ہاتھ دھو بیٹھا، بچہ موٹر سائیکل پر اپنے والدین کے ہم راہ جا رہا تھا کہ پتنگ کی ڈور سے گلا کٹ گیا، اور اس نے والدین کے ہاتھوں ہی میں دم توڑ دیا۔

رواں برس فروری میں بھی کراچی میں پتنگ کی ڈور سے دو گلے کٹ گئے تھے، جن میں سے سعدی ٹاؤن کا رہائشی ایک شخص جاں بحق ہو گیا تھا، جب کہ جہانگیر روڈ کے واقعے میں ایک شخص شدید زخمی ہو گیا تھا۔

کراچی: سندھ ہائی کورٹ نے کراچی میں دودھ کی قیمت فی لیٹر 94 روپے یقینی بنانے کا حکم جاری کر دیا ہے۔

تفصیلات کے مطابق سندھ ہائی کورٹ میں دودھ فروشوں کی جانب سے من مانی قیمت وصولی کے خلاف درخواست پر سماعت ہوئی، عدالت نے کمشنر کراچی کو زائد قیمت وصول کرنے والوں کے خلاف کارروائی کا حکم دے دیا۔

سماعت کے دوران ڈپٹی ڈائریکٹر پلاننگ کے ایم سی نے استفسار پر عدالت کو بتایا کہ کراچی میں دودھ کی قیمت فی لیٹر 94 روپے مقرر ہے، عدالت نے سرزنش کی کہ صرف باتوں سے کیا ہوتا ہے، آپ طے شدہ قیمت پر عمل در آمد کیوں نہیں کراتے؟

جسٹس علی مظہر نے کہا دودھ والے من مانی قیمتوں پر دودھ فروخت کر رہے ہیں، کمشنر کراچی کیا کر رہے ہیں، دودھ 94 روپے فی لیٹر کیوں نہیں ملتا؟ ڈپٹی ڈائریکٹر نے کہا کہ ہم چھاپے بھی مارتے ہیں اور جرمانہ بھی عائد کر رہے ہیں۔

دریں اثنا، عدالت نے کمشنر کراچی سے 12 نومبر کو جامع رپورٹ طلب کر لی۔

واضح رہے کہ شہر قائد کے مختلف علاقوں میں اس وقت مختلف قیمتوں پر دودھ کی فروخت جاری ہے، دودھ فروشوں نے اپنی طرف سے 110 سے لے کر 140 روپے فی لیٹر قیمت مقرر کر رکھی ہے۔

کمشنر کراچی کئی بار اس صورت حال کا نوٹس لے چکے ہیں، چھاپوں میں متعدد دودھ فروشوں کو بھی گرفتار کیا گیا ہے، تاہم کوئی ٹھوس حل نہیں نکالا گیا ہے۔ دودھ فروش دکان داروں کا کہنا ہے کہ جب انھیں دودھ مہنگا ملے گا تو وہ سستا کیسے بیچیں گے۔

کراچی: پاکستان پیپلز پارٹی کے چیئرمین بلاول بھٹو زرداری نے کہا ہے کہ سیاسی جماعتیں اور ہر طبقہ احتجاج پر مجبور ہے، مجھے نہیں لگتا موجودہ حکومت اپنی مدت پوری کر پائے گی۔

ان خیالات کا اظہار بلاول بھٹو نے آج کراچی میں جناح اسپتال کا دورہ کرتے وقت میڈیا سے گفتگو میں کیا، انھوں نے کہا سندھ میں مفت اسپتال چل رہے ہیں، غریب کا علاج ہو رہا ہے، کم وسائل کے باوجود نجی سیکٹرز سے مل کر سہولتیں مہیا کر رہے ہیں۔

پی پی چیئرمین کا کہنا تھا ہم سب نے مل کر عوام کے مسائل حل کرنے ہیں، سیاسی جماعتیں عوام کے مسائل پارلیمان سے حل کرنا چاہتی ہیں، وفاقی حکومت کو سمجھنا چاہیے یہ کرکٹ کا میچ نہیں، وزیر اعظم پر فرض ہے کہ عوام میں اتحاد پیدا کریں۔

بلاول بھٹو نے مزید کہا ہم منتخب لوگ انتہائی قدم اٹھانے پر مجبور ہیں، ہم پارلیمان کو غیر سیاسی بنائیں گے، پاکستان میں پیپلز پارٹی نے ذمہ دارانہ کردار ادا کیا، اس حکومت کو مزید نہیں چلنے دیں گے، ملک میں مارشل لا لگا تو پی پی ماضی کی طرح کردار ادا کرے گی، جمہوریت واحد طریقہ ہے جس میں عوام کا اسٹیک ہوتا ہے۔

یہ بھی پڑھیں:  شہبازشریف نے آزادی مارچ میں شرکت بلاول بھٹو کی شمولیت سے مشروط کردی

قبل ازیں، پی پی چیئرمین نے جناح اسپتال کے سائبر نائف ڈیپارٹمنٹ اور سرجیکل کمپلکس سمیت مختلف شعبہ جات کا دورہ کیا، ان کو ریڈیالوجی ڈیپارٹمنٹ کی جانب سے پریزنٹیشن بھی دکھائی گئی۔

خیال رہے کہ ملک میں اس وقت اپوزیشن کی جانب سے حکومت مخالف آزادی کے سلسلے میں سرگرمیاں تیزی سے بڑھ رہی ہیں، حکومت نے جے یو آئی ف سے مذاکرات کے لیے ٹیم بھی تشکیل دی ہے، تاہم فضل الرحمان کا مطالبہ ہے کہ وزیر اعظم مستعفی ہوں۔

گزشتہ روز مسلم لیگ ن کے صدر شہباز شریف نے آزادی مارچ میں شرکت بلاول بھٹو کی شمولیت سے مشروط کر دی تھی، شہباز شریف نے واضح کر دیا کہ بلاول بھٹو کے نہ ہونے پر احسن اقبال قیادت کریں گے، پیپلز پارٹی کی دوسرے درجے کی قیادت کے ساتھ کھڑا نہیں ہو سکتا۔