Tag: سندھ کی خبریں

کراچی: سندھ حکومت نے صدر مملکت کے نوٹیفکیشن کو مسترد کرتے ہوئے قائم مقام گورنر کی حیثیت سے آغا سراج درانی سے خط و خطابت کا فیصلہ کر لیا ہے۔

تفصیلات کے مطابق صوبہ سندھ کے قائم مقام گورنر کی تقرری کے سلسلے میں صوبائی حکومت نے صدر عارف علوی کے نوٹیفکیشن کو مسترد کر دیا ہے۔

سندھ حکومت نے فیصلہ کیا ہے کہ آغا سراج درانی سے سندھ کے قائم مقام گورنر کی حیثیت سے خط و خطابت کی جائے گی۔

سندھ حکومت کے ترجمان مرتضیٰ وہاب نے اس سلسلے میں کہا کہ حکومت آغا سراج کو قائم مقائم گورنر تسلیم کرتی ہے، گورنر سندھ جب تک نہیں آتے ہمارے قائم مقام گورنر آغا سراج ہیں۔

دوسری طرف ڈپٹی اسپیکر سندھ اسمبلی ریحانہ لغاری نے قائم مقام گورنر کا حلف لینے سے انکار کر دیا ہے، انھوں نے صدر مملکت کے نوٹی فکیشن پر عمل سے معذرت کر لی، ان کا کہنا تھا کہ اسپیکر کی موجودگی میں قائم مقام گورنر کا حلف نہیں اٹھا سکتی۔

یہ بھی پڑھیں:  وزیراعلیٰ سندھ کی نااہلی سے متعلق نظرثانی درخواست سماعت کیلئے منظور

ذرایع کا کہنا ہے کہ ڈپٹی اسپیکر کے انکار کے بعد چیف جسٹس سندھ ہائی کورٹ کو قائم مقام گورنر بنائے جانے کا امکان ہے۔

خیال رہے کہ گورنر سندھ عمران اسماعیل اس وقت بیرون ملک نجی دورے پر ہیں، وہ آج فریضہ حج کی ادائی کے لیے سعودی عرب روانہ ہوئے ہیں، وہ فریضہ حج کی ادائی کے 2 ہفتے بعد وطن واپس آئیں گے۔

ادھر ڈپٹی اسپیکر ریحانہ لغاری نے اے آر وائی سے خصوصی گفتگو کرتے ہوئے کہا کہ میں آئین سے ہٹ کر کوئی کام نہیں کر سکتی، اس لیے حلف لینے سے انکار کیا، بال اب صدر مملکت کی کورٹ میں ہے، وہ چاہیں تو نوٹیفکیشن معطل کر دیں یا نیا نوٹیفکیشن جاری کر دیں۔

دریں اثنا، مرتضیٰ وہاب نے میڈیا سے بات کرتے ہوئے کہا کہ آغا سراج درانی ملک میں ہی موجود ہیں، ان کی موجودی میں صدر کو اختیار نہیں کہ قائم مقام گورنر کی ذمہ داری کسی اور کو دیں، آرٹیکل 104 بتاتا ہے گورنر نہ ہو تو اسپیکر قائم مقام گورنر ہوتا ہے، وفاق کا نوٹیفکیشن آئین کے آرٹیکل 104 کے منافی ہے۔

انھوں نے کہا کہ لگتا ہے صدر کو آرٹیکل 104 سے متعلق سمجھایا نہیں گیا، جرم ثابت نہ ہونے تک آغا سراج درانی اسپیکر ہی رہیں گے، گورنر نہ ہوں تو آغا سراج درانی قائم مقام گورنر بن جائیں گے، صدر کا فیصلہ آئین کے آرٹیکل 104 کے مطابق ہونا چاہیے۔

کراچی: پاکستان پیپلز پارٹی کی ایم پی اے کلثوم اختر چانڈیو نے محکمۂ صحت کے افسر کو دھمکیاں دے دیں، فون کال سوشل میڈیا پر وائرل ہو گئی۔

تفصیلات کے مطابق ایم پی اے کلثوم چانڈیو نے دادو کے سِول سرجن حمید میرانی کو فون پر دھمکیاں دے کر کسی کا تبادلہ کروانا چاہا لیکن ناکام رہیں۔

ایم پی اے کلثوم چانڈیو کی دھمکیوں کی فون کال سوشل میڈیا پر وائرل ہوگئی، محکمہ صحت نے کلثوم چانڈیو کی فون کال کا نوٹس لے کر سول سرجن سے تفصیل طلب کر لی۔

ادھر کلثوم چانڈیو نے مکرتے ہوئے کہا ہے کہ انھوں نے کسی کو دھمکی نہیں دی۔

یہ بھی پڑھیں:  سندھ کابینہ میں توسیع، چار وزرا نے حلف اٹھا لیا

فون کال میں ایم پی اے کلثوم کہتی سنائی دیتی ہیں کہ بار بار کہنے کے باوجود تم نے میرے حکم پر تبادلہ کیوں نہیں کیا؟ میں تمہیں اسمبلی میں طلب کرسکتی ہوں، تم سرکاری نوکر ہو ہماری بات ماننی پڑے گی۔

دوسری طرف سول سرجن حمید میرانی نے انھیں جواب دیا کہ تبادلہ میں نہیں کر سکتا، ڈی ایچ او کرتا ہے۔

محکمہ صحت نے فون کال سوشل میڈیا پر وائرل ہونے کے بعد معاملے کا فوری نوٹس لے لیا ہے اور اس سلسلے میں سول سرجن سے بھی معلومات لی جا رہی ہیں۔

پیپلز پارٹی کی رکن سندھ اسمبلی نے دھمکی دینے کے الزام سے انکار کیا، ان کا کہنا تھا کہ انھوں نے ایسی کوئی دھمکی نہیں دی۔

کراچی: سندھ کابینہ نے صوبے میں گاڑیوں کی رجسٹریشن بکس کی بہ جائے ایم وی آر اسمارٹ کارڈ جاری کرنے کی منظوری دے دی ہے۔

تفصیلات کے مطابق سندھ میں موٹر وہیکل رجسٹریشن بکس کی جگہ خصوصی سیکورٹی فیچرز کے حامل اسمارٹ MVR کارڈز متعارف کرانے کا آغاز کر دیا گیا ہے۔

وزیر اعلیٰ سندھ مراد علی شاہ کی زیر صدارت کابینہ اجلاس میں سندھ موٹر وہیکل رولز 1969 میں ترمیم پر بحث کی گئی، بعد ازاں کابینہ نے اس اہم منصوبے کی منظوری دے دی۔

مذکورہ اہم ترمیم کا مقصد گاڑیوں کے لیے رجسٹریشن بُک جاری کرنے کی بہ جائے ایم وی آر اسمارٹ کارڈ جاری کیا جانا ہے جس میں خصوصی سیکورٹی فیچرز ہوں گے۔

یہ بھی پڑھیں:  گاڑیوں کی رجسٹریشن پر 10 ہزار روپے ٹوکن ٹیکس کی تجویز منظور

اسمارٹ کارڈ کی فیس 750 روپے ہوگی جب کہ کارڈ گم ہونے کی صورت میں ڈپلیکیٹ کارڈ کی فیس 800 روپے ہوگی، واضح رہے کہ گاڑیوں کی رجسٹریشن بُک کی فیس 1000 روپے تھی۔

کابینہ اجلاس میں شہر کے 253 مقامات پر سی سی ٹی وی کیمرے لگانے کی بھی منظوری دی گئی، اس سلسلے میں عبادت گاہوں کو خصوصی طور پر مدِ نظر رکھا گیا، اور کہا گیا کہ مندر، چرچ، گوردواروں پر سی سی ٹی وی کیمرے لگائے جائیں گے۔

اس سلسلے میں اجلاس میں این آر ٹی سی کو کنٹریکٹ دینے کے لیے سیپرا رولز میں رعایت کی بھی منظوری دی گئی۔

کابینہ میں گرین لائن کو سرجانی ٹاؤن اور نمایش کے بی آرٹی ایس پروجیکٹ کے لیے مختص کرنے کی منظوری بھی دی گئی، جس کے لیے اب محکمہ بلدیات کے قانون میں ترمیم کی جائے گی۔

کراچی: حکومتِ سندھ نے ٹڈی دَل کے خاتمے کے لیے 31 کروڑ 90 لاکھ جاری کر دیے، ٹڈی دل سے بچاؤ کے لیے کمیٹیاں بھی بنا لی گئی ہیں۔

تفصیلات کے مطابق وزیر زراعت سندھ اسماعیل راہو نے کہا ہے کہ ٹڈی دل کے خاتمے کے لیے فنڈ جاری کر دیا گیا ہے، کمیٹیاں بھی تشکیل دے دی گئی ہیں۔

صوبائی وزیر کا کہنا تھا کہ کمیٹیاں روز کے بنیاد پر سندھ حکومت کو رپورٹ دے رہی ہیں، سندھ حکومت کی جانب سے جاری فنڈ کے ذریعے اسپرے، گاڑیاں اور دیگر سامان خریدا جائے گا۔

قبل ازیں، وزیر اعلیٰ سندھ سید مراد علی شاہ نے سینٹ پیٹرکس کیتھڈرل کی اندرونی آرایش کے لیے 250 ملین روپے کی منظوری دے دی ہے۔

انھوں نے یہ منظوری ہفتے کو وزیر اعلیٰ ہاؤس میں سینٹ پیٹرکس کیتھولک کے فادر ریکٹر فادر ماریو روڈریگس کی قیادت میں ایک وفد سے ملاقات کے دوران دی۔

چرچ کی آرایش کے لیے اعلان شدہ فنڈ چرچ کے اندر گلاس، سٹون اور لکڑی کے کام کی بحالی کے لیے استعمال ہوگا، سندھ کا یہ قدیم چرچ 1845 میں تعمیر ہوا تھا۔

چرچ کے اندر ایک وقت میں 1500 افراد عبادت کر سکتے ہیں۔ وزیر اعلیٰ سندھ نے کہا کہ چرچ کی بیرونی سجاوٹ خاص نہیں تاہم چرچ میں پتھر اور شیشے کا کام انتہائی نفیس ہے اور اہمیت کا حامل اور قدیم فن سازی کا شاہ کار نمونہ ہے۔

مراد علی شاہ کا کہنا تھا کہ حکومت سندھ چرچ کی بحالی کے لیے تین سالوں میں 25 کروڑ روپے فراہم کرے گی، تمام دستاویزی کام کے مکمل ہوتے ہی بحالی کا کام شروع ہو جانے پر جلد ہی 50 ملین روپے ادا کیے جائیں گے۔

کراچی: وزیر بلدیات سندھ سعید غنی نے کہا ہے کہ پر امن احتجاج ہر کسی کا حق ہے لیکن فکس اِٹ کا احتجاج کا رویہ درست نہیں ہے۔

تفصیلات کے مطابق آج فکس اٹ کے بانی اور پی ٹی آئی رکن اسمبلی کی گرفتاری کے بعد میڈیا سے بات کرتے ہوئے صوبائی وزیر نے کہا کہ فکس اٹ والے جس طرح احتجاج کر رہے ہیں وہ کسی بھی طور درست نہیں ہے۔

سعید غنی کا کہنا تھا کہ فکس اٹ والوں نے وزیر اعلی ہاؤس کے اندر گٹر کا پانی پھینکا، آج عالمگیر خان نے میرے دفتر کے باہر بھی احتجاج کی کال دی۔

سعید غنی نے کہا کہ پی ٹی آئی قیادت واضح کرے کیا فکس اٹ ان کی ذیلی تنظیم ہے، احتجاج کرنے فکس اٹ آ رہی ہے تو رد عمل پی ٹی آئی کیوں دے رہی ہے، خرم شیر زمان کا فون آیا میں نے کہا کہ جو ہوا غلط ہوا، ہم شہر کے حالات خراب کرنا نہیں چاہتے۔

صوبائی وزیر نے مزید کہا کہ ہمارے 8 کارکن گرفتار ہیں، افسوس کہ کئی لوگ اس واقعے میں زخمی بھی ہوئے، احتجاج کا یہ رویہ ہرگز درست نہیں۔

یہ بھی پڑھیں:  کراچی، فکس اٹ کے بانی اور پی ٹی آئی کے ایم این اے عالمگیر خان گرفتار

واضح رہے کہ آج فکس اٹ کے کارکن تین تلوار پر وزیر بلدیات سعید غنی کے کیمپ آفس کے باہر پانی کی قلت اور صفائی نہ ہونے پر احتجاج کر رہے تھے، جن پر پی پی کارکنوں نے دھاوا بول دیا۔

دونوں جانب سے ہاتھا پائی ہوئی، جس میں 2 پولیس افسران سمیت متعدد افراد زخمی ہو گئے، پولیس نے 20 سے 25 کارکنوں کو حراست میں لے لیا، رکن قومی اسمبلی عالمگیر خان تین تلوار پر پریس کانفرنس کے لیے پہنچے تو پولیس نے انھیں بھی گرفتار کر لیا۔