Tag: سندھ ہائیکورٹ

کراچی : شہر قائد غیر اعلانیہ لوڈشیڈنگ پر سندھ ہائیکورٹ نے برہمی کا اظہار کرتے ہوئے کے الیکٹرک سے تفصیلی رپورٹ طلب کرلی۔

تفصیلات کے مطابق سندھ ہائی کورٹ میں کراچی میں غیر اعلانیہ لوڈشیڈنگ سے متعلق درخواست پر سماعت ہوئی۔

عدالت نے شہر میں غیر اعلانیہ لوڈشیڈنگ پر برہمی کا اظہار کرتے ہوئے شہری کی درخواست پر کے الیکٹرک سے تفصیلی رپورٹ طلب کرلی۔

جسٹس آغا فیصل نے ریمارکس دیئے جو بھی کرنا ہے کریں مگرغیر اعلانیہ لوڈشیڈنگ پررپورٹ دیں۔

درخواست گزار نے موقف اختیار کیا کہ بل وقت پر ادا کرتے ہیں، کوئی لائن لاسز بھی نہیں پھر بھی بجلی بندکردی جاتی ہے، علاقے میں کوئی ڈیفالٹر نہیں، بروقت بل ادا کرنے کے باوجود طویل لوڈشیڈنگ ہے۔

جس پر کے الیکٹرک نے عدالت کو یقین دہانی کرائی کہ درخواست گزار کا مسئلہ چند روز میں حل ہو جائے گا۔

یاد رہے جماعت اسلامی نے ہیٹ ویو کی صورتحال کے دوران کراچی میں کے الیکٹرک کی جانب سے طویل اور غیر اعلانیہ لوڈشیڈنگ کے خلاف سندھ ہائی کورٹ سے رجوع کیا تھا۔

مزید پڑھیں : میڈیکل سپرنٹنڈنٹ کے عہدے کیلئے جعلی تجربہ اور جعلی ڈگریاں دینے کا انکشاف

سٹی کونسل کے اپوزیشن لیڈر ایڈووکیٹ سیف الدین کی طرف سے جمع کرائی گئی درخواست میں فوری سماعت کا مطالبہ کیا گیا تھا او کے الیکٹرک کو شہر بھر میں ‘غیر منصفانہ’ بجلی کی بندش سے روکنے کی ضرورت پر زور دیا گیا تھا۔

ایڈووکیٹ سیف الدین نے کہا تھا کہ کراچی کو شدید گرمی کا سامنا ہے، جس سے ہیٹ ویو کا سنگین خطرہ ہے، اور مزید کہا کہ بجلی کی کٹوتی طلباء کو بری طرح متاثر کر رہی ہے۔

مزید پڑھیں: نیپرا نے کراچی لوڈشیڈنگ پر کے الیکٹرک کا جواب مسترد کردیا۔

واضح رہے 22 مئی کو نیشنل الیکٹرک پاور ریگولیٹری اتھارٹی (نیپرا) نے کے الیکٹرک کے سی ای او مونس عبداللہ علوی کی کراچی میں بجلی کی لوڈشیڈنگ کے بدترین بحران سے متعلق وضاحت کو مسترد کردیا تھا۔

نیپرا نے مارچ 2025 کے لیے فیول چارج ایڈجسٹمنٹ (ایف سی اے) سے متعلق کے الیکٹرک کی درخواست پر سماعت مکمل کرنے کے بعد فیصلہ محفوظ کرلیا۔

کراچی: شہر قائد میں ایک ریچھ کی آزادی کے لیے عدالت میں درخواست دی گئی ہے، کراچی چڑیا گھر میں رانو نامی ریچھ کی غیر قانونی قید اور ابتر حالت کے خلاف اس درخواست کی سماعت سندھ ہائیکورٹ میں ہوئی۔

کیس کی سماعت کرتے ہوئے سندھ ہائیکورٹ نے کے ایم سی، ڈائریکٹر کراچی زو اور سیکریٹری کنزرویٹو وائلڈ لائف کو نوٹس جاری کر دیے، عدالت نے آئندہ سماعت پر فریقین سے ریچھ کی قید اور حالت زار سے متعلق جواب طلب کیا ہے۔

وکیل درخواست گزار جبران ناصر نے عدالت کو بتایا کہ سینئر ڈائریکٹر زو کی جانب سے رانو ریچھ کی صحت سے متعلق ایک کمیٹی تشکیل دی گئی تھی، اس کمیٹی نے 17 جنوری 2025 کو اپنی سفارشات میں کہا کہ رانو ذہنی دباؤ میں ہے، اور اسے کسی دوسری جگہ منتقل کیا جائے۔

درخواست گزار نے مؤقف پیش کیا کہ رانو کو کراچی زو میں قید کرنا وائلڈ لائف ایکٹ کی سیکشن 47 کی خلاف ورزی ہے، جب کہ سندھ ہائیکورٹ ایسی ہی ایک درخواست میں رانو کے لیے ایئر کولر پول کی صفائی اور دیگر احکامات بھی جاری کر چکا ہے۔

درخواست گزار نے کہا رانو کو کراچی زو میں رکھنا آرٹیکل 9 اور 9 اے کی خلاف ورزی ہے، اس لیے کمیٹی کی سفارشات کے مطابق رانو کی قدرتی ماحول میں منتقلی کا حکم دیا جائے۔

کراچی: سرکاری املاک اور عوامی مقامات پر سائن بورڈز، سیاسی بینرز اور اشتہارات لگانے کے کیس میں پیش رفت ہوئی ہے۔

تفصیلات کے مطابق سائن بورڈ لگانے والی ایک نجی کمپنی نے ’سرکاری املاک اور عوامی مقامات پر سائن بورڈز، سیاسی بینرز اور اشتہارات لگانے‘ کے کیس میں فریق بننے کے لیے عدالت سے رجوع کر لیا۔

عدالت نے نجی کمپنی کی درخواست پر فریقین کو نوٹس جاری کر دیے، جمشید قاضی ایڈووکیٹ نے عدالت کو بتایا کہ کمپنی نے معاہدے کے بعد ہی سائن بورڈز لیے تھے، کمپنی کو سنے بغیر کی آپریشن کر کے سائن بورڈ ہٹا دیے گئے۔

واضح رہے کہ سپریم کورٹ کے احکامات پر عمل درآمد نہ کرنے پر سندھ ہائیکورٹ نے میئر کراچی کو شہر بھر سے سائن بورڈز ہٹانے کا حکم دیا تھا، عدالت نے کے ایم سی، کے ڈی اے، ڈی ایچ اے، کنٹونمنٹ بورڈز اور دیگر کو شہر بھر سے سائن بورڈز ہٹانے کا حکم دیا تھا۔

سندھ ہائیکورٹ نے سپریم کورٹ کے حکم کی روشنی میں احکامات پر عمل درآمد کر کے رپورٹ پیش کرنے کا بھی حکم دیا تھا، عدالتی حکم ہے کہ غیر قانونی سائن بورڈز لگانے والوں کے خلاف مقدمات درج کرائے جائیں۔ عدالت نے کہا ہے کہ جس نے بھی غیر قانونی سائن بورڈز لگائے ہوئے ہیں، ان کے خلاف مقدمات درج کرکے رپورٹ پیش کی جائے۔

وکیل درخواست گزار نے مؤقف پیش کیا کہ سپریم کورٹ نے سرکاری املاک پر سے سائن بورڈ ہٹانے کا حکم دیا تھا۔

کراچی: سندھ ہائیکورٹ کی جانب سے کرمنل مقدمات میں ملزمان کی شناخت پریڈ کے لیے گائیڈ لائنز جاری کی گئی ہیں۔

تفصیلات کے مطابق ایم آئی ٹی نے ملزمان کی شناخت پریڈ کے لیے ماتحت عدالتوں کو نئی گائیڈ لائنز جاری کر دی ہیں، ممبر انسپیکشن ٹیم کا کہنا ہے کہ منتظم جج نے سپریم کورٹ کے اصولوں کے مطابق گائیڈ لائنز تیار کی ہیں۔

گائیڈ لائنز کے مطابق جوڈیشل مجسٹریٹ مقدمے میں بتائے گئے ملزم کے حلیے کو میچ کریں گے، شناخت پریڈ بیان کردہ ملزم کے حلیے سے مماثلت کے بعد شروع ہوگی۔

سندھ حکومت کا پولیس کی تفتیشی صلاحیت مزید بہتر بنانے کا فیصلہ

گائیڈ لائنز میں کہا گیا ہے کہ ملزم کے ساتھ اسی حلیے سے ملتے جلتے ڈمی ملزمان کو پیش کیا جائے، پریڈ میں ایک ملزم سے زائد کو ایک ساتھ پیش نہ کیا جائے، اور گواہ سے پریڈ سے قبل ملزمان کے کردار کی معلومات لی جائیں۔

گائیڈ لائنز کے مطابق پولیس یقینی بنائے پریڈ سے قبل ملزم کی شناخت نامعلوم رہے، کیوں کہ اگر ملزم کی شناخت سے متعلق گواہ کو معلومات ہوئی تو شناخت پریڈ کا فائدہ نہیں ہوگا۔