جامشورو: انڈس ہائی وے پر ٹریلر اور ایمبولینس میں تصادم کے سبب چھ افراد جاں بحق اور چار زخمی ہوگئے۔
تفصیلات کے مطابق ہفتے اور اتوار کی درمیانی شب جام شورو کے قریب انڈس ہائی وے پر مانجھند کے مقام پر تیز رفتار ٹریلر اور ایمبولینس میں تصادم ہوگیا جس کے نتیجے میں چھ افراد موقع پر ہی جاں بحق ہوگئے ۔
حادثے میں چار افراد زخمی بھی ہوئے جنہیں طبی امداد کے لیے فوری طور پر حیدرآباد کے اسپتال میں منتقل کردیا گیا۔
وزیر داخلہ سندھ سہیل انور سیال نے حادثے کا فوری نوٹس لیتے ہوئے ایس ایس پی جام شورو سے حادثے کی رپورٹ طلب کرلی۔
یاد رہے 24 مئی کو بھی انڈس ہائی وے پر ٹریفک حادثہ ہوا تھا جس میں کراچی جانے والی بس تیز رفتاری سے موڑ کاٹتے ہوئے الٹ گئی تھی جس کے سبب آٹھ افراد ہلاک ہوئے ان میں تین بچے بھی شامل تھے۔
