اوہایو :سابق عالمی نمبر ایک سوئٹزرلینڈ کے راجر فیڈرر نے برطانیہ کے اینڈی مرے کو شکست دے کر سنسناٹی ماسٹرز ٹینس ٹورنامنٹ کے سیمی فائنل کے لئے کوالیفائی کرلیا۔ اوہایو میں جاری ٹورنامنٹ کے کوارٹرفائنل مرحلے میں دنیائے ٹینس کے دو بہترین کھلاڑی ایکشن میں تھے۔
سوئٹزرلینڈ کے راجرفیڈرر نے غیر معمولی کارکردگی دکھاتے ہوئے برطانیہ کے اینڈی مرے کو اسٹریٹ سیٹس میں شکست دی۔۔ سوئس کھلاڑی کی فتح کا اسکور چھ تین اور سات پانچ رہا۔ سیمی فائنل میں فیڈرر کا مقابلہ کینیڈا کے میلاس راؤنچ سے ہوگا۔
راؤنچ نے دوسرے کوارٹرفائنل میں اٹلی کے فیبیو فوگنینی کو باآسانی زیر کیا۔ کینیڈین کھلاڑی نے چھ ایک اور چھ صفر سے میچ اپنے نام کیا۔ اسپین کے ڈیوڈ فیررر اور فرانس کے جولین بیناٹو نے بھی فتوحات کا سلسلہ جاری رکھتے ہوئے آخری چار کھلاڑیوں میں جگہ بنالی ہے۔
