Tag: سنگاپور

سنگاپور: 6 سال سے خواتین کی نامناسب ویڈیوز بنانے والا چینی ریسرچر آخر کار پکڑا گیا، عدالت نے اسے 10 ماہ کی قید کی سزا سنا دی۔

تفصیلات کے مطابق سنگاپور میں خواتین کی نامناسب تصویریں اور ویڈیوز بنانے پر ایک چینی محقق کو 10 ماہ کی قید دی گئی ہے، ننیانگ ٹیکنالوجی یونیورسٹی کے 30 سالہ ملازم گوو زیہونگ اپنے موبائل سے خواتین کی نامناسب تصویریں کھینچتا اور ویڈیو بناتا تھا۔

رپورٹ کے مطابق گوو زیادہ تر ان خواتین کا پیچھا کرتا تھا جنھوں نے اسکرٹ یا ٹائٹس پہن رکھی ہوتی تھیں اور ورزش یا وہ یوگا کر رہی ہوتی تھیں، اور یونیورسٹی کے مختلف حصوں میں اس نے ہزاروں کی تعداد میں تصویریں بنائیں۔

پراسیکیوشن کی جانب سے گوو کو ’پروفیلک سیریل اپ سکرٹر‘ قرار دیتے ہوئے کہا گیا ہے کہ اس نے ہر سال سینکڑوں نامناسب تصویریں بنائیں اور تقریباً 4 سو سے زائد خواتین اس کا نشانہ بنیں۔

گوو کو جرم ثابت ہونے اور خواتین کی توہین کرنے پر 10 ماہ کی قید کی سزا سنائی گئی، گوو کا تعلق چین سے ہے، اس نے 2015 میں خواتین کی نامناسب تصویریں کھینچنے اور ویڈیو بنانے کا سلسلہ شروع کیا۔ عدالتی ریکارڈ کے مطابق ملزم تصویریں اور ویڈیوز بنانے کے بعد پہلے ہارڈ ڈسک اور پھر اپنے لیپ ٹاپ میں منتقل کر دیتا تھا۔

اس نے یونیورسٹی سے باہر بھی خواتین کو نشانہ بنایا، اور مارکیٹوں، سڑکوں اور شاپنگ مالوں میں خواتین کی تصویریں کھینچیں اور ویڈیوز بنائیں۔

11 اپریل 2021 کو تصویریں کھینچتے ہوئے وہ رنگے ہاتھوں پکڑا گیا تھا، وہ اس وقت لوگوں کی نظروں میں آیا جب ایک مال میں سیڑھیاں چڑھتی لڑکیوں کے پیچھے انتہائی قریب چلتے ہوئے ہاتھ میں موبائل تھامے ہوئے تھا اور کیمرہ اوپن تھا۔

سنگاپور: سنگاپور میں اخلاقی جرائم کا مقابلہ کرنے کے لیے اب روبوٹ پولیس اہل کاروں کو میدان میں اتارا گیا ہے۔

تفصیلات کے مطابق سنگاپور میں اخلاقی جرائم کی روک تھام کے لیے کارروائی اب روبوٹ کرے گا، اس سلسلے میں سنگاپور گشت کرنے والے روبوٹس کی آزمائش کر رہا ہے جو کسی ‘ناپسندیدہ سماجی رویے’ میں ملوث لوگوں کو فوری وارننگ دیں گے۔

ایک دو نہیں اس روبوٹ کی پوری 7 آنکھیں ہیں، جن کی مدد سے یہ روبوٹ اہل کار ہر طرف سے ماحول پر نظر رکھے گا۔

یہ روبوٹ سماجی فاصلے کی کمی، سگریٹ نوشی اور غلط پارکنگ پر فوری جرمانہ کرے گا، اس سے سخت کنٹرول والے اس شہر میں نگرانی والی ٹیکنالوجی کے ہتھیاروں میں اضافہ ہو جائے گا، جس سے پرائیویسی کے خدشات کو بھی ہوا مل رہی ہے۔

بڑی تعداد میں سی سی ٹی وی کیمروں سے لے کر چہرے کی پہچان کی ٹیکنالوجی سے لیس لیمپ پوسٹس کے ٹرائلز تک، سنگاپور اپنے باشندوں پر ہر لمحے نظر رکھنے کے لیے آلات کی بھرمار کر رہا ہے۔

اور اب ستمبر میں تین ہفتوں کی آزمائش کے لیے ایک ہاؤسنگ اسٹیٹ اور ایک شاپنگ سینٹر میں گشت کے لیے 2 روبوٹس تعینات کیے گئے تھے۔

حکام طویل عرصے سے ایک انتہائی مؤثر، ٹیکنالوجی سے چلنے والی ‘اسمارٹ قوم’ کے وژن کو آگے بڑھا رہے ہیں، تاہم ایکٹویسٹس کا کہنا ہے کہ اس سارے سلسلے میں لوگوں کی رازداری کو قربان کر دیا گیا ہے، اور لوگوں کا ان کے اپنے ڈیٹا پر بہت کم کنٹرول باقی رہ گیا ہے۔

حکومت نے اب تازہ ترین نگرانی کے آلے کے طور پر روبوٹ پہیے متعارف کرا دیے ہیں، جو سات کیمروں سے لیس ہیں، اور جو عوام کو انتباہ جاری کرتے ہیں اور ‘ناپسندیدہ معاشرتی رویے’ کا پتا لگاتے ہیں۔

ایک حالیہ گشت کے دوران ایک ‘زاویئر’ روبوٹ ایک ہاؤسنگ اسٹیٹ سے گزرتے ہوئے شطرنج کا میچ دیکھنے والے بزرگ باشندوں کے ایک گروپ کے سامنے رک گیا۔ پھر اچانک ایک روبوٹک آواز نے سب کو چونکایا جو کہہ رہی تھی کہ براہ کرم ایک میٹر کا فاصلہ رکھیں، براہ کرم ہر گروپ میں پانچ افراد رکھیں۔

مقامی لوگوں کا کہنا تھا کہ اس روبوٹ کو دیکھ کر انھیں ‘روبو کوپ’ فلم یاد آ گئی۔

سنگاپور: نئے کرونا وائرس سے پھیلنے والی نہایت ہلاکت خیز وبا نے جہاں زندگی کے دیگر شعبوں کو حد درجے متاثر کیا، وہاں ورکنگ ماحول بھی اس سے متاثر ہوا، اور پہلی بار دنیا بھر میں وسیع سطح پر ملازمین کو گھر سے کام کرنے کی اجازت دی گئی۔

جہاں لوگوں نے اس پر خوشی کا اظہار کیا، کہ وہ گھر بیٹھ کر مزے سے کام کر پا رہے ہیں، وہاں جلد ہی لوگوں کو اس سے اُکتاہٹ بھی ہونے لگی، کیوں کہ گھر سے کام کرنے کے اپنے مسائل ہوتے ہیں۔

لیکن انسان سے وابستہ مسائل کا حل نکالنے کے لیے سرمایہ دار ہر وقت مستعد رہتے ہیں، اس مسئلے کا حل بھی انھوں نے نکال لیا ہے، اور سنگاپور کی ایک کمپنی نے ایسے ورکنگ بوتھ بنا دیے ہیں، جہاں ملازمین آرام سے بیٹھ کر گھر کے ماحول سے دور اطمینان سے آفس کا کام کر سکتے ہیں۔

سنگاپور کی کمپنی سوئچ نے کرونا وبا کے سبب گھر میں کام کرنے سے اُکتاہٹ محسوس ہونے کی شکایت پر یہ نیا حل نکالا ہے، ان ورکنگ بوتھس میں اب وہ فی منٹ ادائیگی کے حساب سے بیٹھ کر دفتر کا کام کر سکتے ہیں۔

سنگاپور کی کمپنی نے ابتدائی طور پر 60 کے آس پاس ورکنگ بوتھس بنائے ہیں، یہ ورکنگ بوتھس مختلف شاپنگ سینٹرز، کافی شاپس اور عوامی مقامات پر رکھے گئے ہیں، جن میں ایک گھنٹہ کام کرنے کی قیمت 4 سنگاپورین ڈالر سے کم ہے۔

ایک بوتھ میں ایک شخص بیٹھ کر کام کر سکتا ہے اور سماجی فاصلے کے ساتھ اردگرد کے ماحول سے لطف بھی اٹھا سکتا ہے، بوتھ میں وائی فائی، ایک میز، کرسی، پنکھا اور بجلی کا انتظام ہے۔

ورکنگ بوتھ میں سینیٹائزر کا بھی التزام کیا گیا ہے، جب کہ بوتھ میں بیٹھنے والے کے لیے ماسک پہننا بھی لازمی ہے۔سوئچ نامی اس کمپنی نے ایسے بوتھ بھی بنائے ہیں جو تھوڑے سے بڑے ہیں اور جہاں دو افراد بیٹھ کر آفس میٹنگ کر سکتے ہیں۔

سنگاپورین کمپنی کی جانب سے یہ حل سامنے آنے کا ایک مطلب یہ بھی ہے کہ مستقبل میں آفس ورک کے حوالے سے ایسے آپشنز کو بھی مد نظر رکھا جا سکتا ہے۔