Tag: سنگا پور

سنگا پور کے علاقے مرینا بے میں واقع ہیلکس برج کی انفرادیت اس کا ڈھانچہ ہے جو انسان کے ڈی این اے (Deoxyribonucleic acid) سے متاثر ہو کر بنایا گیا ہے۔

اس برج کو انسانی ڈی این اے کی چار بنیادوں سائٹوسن، گوانائن، ایڈنائن اور تھائمین کے مانند چار حصّوں میں تقسیم کیا گیا ہے اور یہ تقسیم برقی قمقموں سے نمایاں‌ کی گئی ہے۔ شام ڈھلتے ہی ہیلکس برج پر ایل ای ڈی لائٹس روشن ہو جاتی ہیں جو اس برج کا حُسن اور اس کی خوب صورتی بڑھاتی ہیں۔

اس مشہور پُل کے ایک جانب بینجمن شائرس پُل ہے جسے سنگاپور کا طویل ترین پُل مانا جاتا ہے جب کہ اس کے دوسری جانب مرینا بے ہے۔ سیر و تفریح کی غرض سے ہیلکس برج کا رخ کرنے والے اس پُل سے اطراف کے مناظر کا نظّارہ کرتے ہیں‌ جو اس بلندی اور دور تک پھیلی ہوئی روشنیوں کی وجہ سے خاصا دل کش معلوم ہوتا ہے۔

مقامی لوگوں‌ کے علاوہ غیر ملکی سیّاح بھی اس پُل کو دیکھنے کے لیے یہاں آتے ہیں۔ یہاں سے قریب بنی ہوئی بلند و بالا اور خوب صورت ڈیزائن کی مختلف عمارتیں اور پُل کے نیچے موجود پانی پر قمقموں کی روشنی گویا تیرتی ہوئی معلوم ہوتی ہے اور یہ منظر آنکھوں‌ کو بہت بھلا لگتا ہے۔

اس پُل کو دنیا کا پہلا ’’آرکیٹیکچرئل اینڈ انجینئرنگ ڈیزائن‘‘ کہا جاتا ہے۔ ہیلکس برج دس سال قبل عوامی آمدورفت اور سیر و تفریح‌ کے لیے کھولا گیا تھا۔ اس پُل نے اپنے طرزِ تعمیر اور بہترین ذرایع آمدورفت کے زمرے میں ’’عالمی آرکیٹیکچر فیسٹیول ایوارڈ‘‘ اور’’بلڈنگ اینڈ اتھارٹی ایکسیلینسی ایوارڈ‘‘ بھی اپنے نام کیا تھا۔

ہیلکس برج ایک عوامی گزر گاہ ہے جس سے لوگ مرینا بے کے ایک کنارے سے دوسرے تک پہنچتے ہیں۔ اسے ڈیزائن کرنے میں‌ مقامی کمپنی کے ساتھ آسٹریلوی انجینئروں سے بھی مدد لی گئی تھی۔

یہ عوامی گزر گاہ پہلے ڈبل ہیلکس برج کے نام سے مشہور ہوئی، لیکن آج اسے صرف ہیلکس برج کہا جاتا ہے۔

سنگا پور استوائی خطے میں واقع ہے لہٰذا اس کی آب و ہوا گرم مرطوب ہے۔ اس چھوٹے سے ملک میں بارشیں خوب ہوتی ہیں۔ ہر یا لی خوب ہے۔

سنگاپور میں کئی قومیتوں اور رنگ و نسل کے لوگ بستے ہیں۔ سب سے زیادہ چینی نژاد ہیں، باقی مالے، ہندوستانی، پاکستانی، سری لنکن وغیرہ ہیں۔ یہاں‌ بڑی بڑی عمارتیں جدید طرز تعمیر کا نمونہ ہیں۔

بڑے مذاہب میں بدھ ازم، ہندومت اور عیسائیت شامل ہیں ۔ حکومت کا انداز جمہوری ہے اور ملک سیاحت کے لیے مشہور ہے۔ ایک وقت تھا جب اس کے نظامِ تعلیم کی دنیا میں مثال دی جاتی تھی ۔

سیاحت یہاں ایک انڈسٹری کی حیثیت رکھتی ہے۔ سیاحوں کی دل چسپی کی ہر شے سنگاپور میں موجود ہے اور سنگاپور سیاحت سے زرِ مبادلہ کمانے والے ملکوں میں سے ایک ہے۔

سنگاپور کا جو انداز سب سے پہلے آنکھوں کو بھاتا ہے وہ یہاں صفائی ستھرائی کا نظام ہے۔ یہ چھوٹا سا ملک ہے لیکن صاف، شفاف، چمکتی ہوئی سڑکیں، عمارتیں اور پارک سیاحوں کی توجہ حاصل کرلیتے ہیں۔ یہاں پر کوڑا کرکٹ پھیلانے پر سخت سزا اور جرمانے کا رواج ہے۔

سنگاپور میں سگریٹ اور چیونگم پر بھی پابندی عائد رہی ہے اور تفریحی و پبلک مقامات پر اس پر سختی سے عمل کروایا جاتا ہے۔

دراصل ایم آر ٹی(ریل سروس) کے چلنے کے بعد سنا گیاکہ ایک ٹرین کے آٹو میٹک دروازے میں کسی نے شرارت کرتے ہوئے چیونگم چپکا دی تھی جس کے باعث دروازہ کھلنے میں تاخیرہوئی۔

حکام نے یہ پسند نہ کیا کہ لوگ ایک بڑی اور اہم سفری سروس کے دوران ایسی مشکل اور تکلیف اٹھائیں جس کی وجہ سے ان کا وقت برباد ہو اور کوئی بھی شہری اپنے ضروری کام کو وقت پر انجام دینے سے محروم ہوجائے، لہٰذا انھوں نے چیونگم پر پابندی عائد کردی۔