ریاض: سعودی عرب میں ایک اور سینما گھر کا افتتاح کردیا گیا، مملکت کے بیشتر علاقوں میں سینما گھر کھولنے پر کام جاری ہے۔
سعودی ویب سائٹ کے مطابق سعودی عرب کی حفر الباطن کمشنری میں ترقیاتی امور کے نگران اعلی ماجد القرینی نے المکان مال کمپلیکس میں پہلے سینما کا افتتاح کیا ہے۔
تقریب میں سرکاری اداروں کے عہدیدار کثیر تعداد میں موجود تھے، اس موقع پر القرینی نے سینما گھر اور اس کے ہالز کا دورہ کیا جبکہ انہیں نئے سینما گھر سے متعلق تمام تفصیلات بتائی گئیں۔
پروگرام معیاری زندگی کے ترجمان مزروع بن صلاح کے مطابق مملکت کے دیگر علاقوں کی طرح حفر الباطن میں بھی سینما گھر کھولا گیا ہے، مملکت کے بیشتر علاقوں میں سینما گھر کھولنے پر کام جاری ہے۔
اس سے قبل تبوک میں بھی سینما گھر کا افتتاح کیا جا چکا ہے۔
ترجمان کا مزید کہنا تھا کہ لوگوں کو تفریح کا سامان مہیا کرنے کے لیے دیگر علاقوں میں بھی سینما گھر کھولے جائیں گے۔
معیاری زندگی پروگرام کا بنیادی مقصد زندگی کے معیار کو بلند کرنا اور مملکت کے تمام علاقوں میں سعودی شہریوں اور مقیم غیرملکیوں کو سیر و سیاحت اور تفریح کے متوازن مواقع فراہم کرنا ہے۔
