بیسل : سوئس انڈور ٹینس میں سابق عالمی نمبر ایک اسپین کے رافیل نڈال اپ سیٹ شکست کے بعد ایونٹ سے باہر ہوگئے۔ سوئیٹزرلینڈ کے راجر فیڈرر نے سیمی فائنل میں جگہ بنالی۔
بیسل میں جاری ٹورنامنٹ کے کوارٹر فائنل میں سترہ سال نوجوان ٹینس اسٹار کروشیا کے بورنا کوریک نے تجربہ کار رافیل نڈال کی ایک نہ چلنے دی۔
بے بی ڈوکوچ کے نام سے مشہور نوجوان کھلاڑی نے پہلے سیٹ میں اسپینش کھلاڑی کو چھ دو سے آپ سیٹ کیا۔ دوسرے سیٹ میں نڈال نے کچھ مزاحمت کی تاہم کوریک نے اپنی پھرتی اور مہارت سے ٹائی بریکر پر سات چھ سے کامیابی حاصل کرکے میچ اپنے نام کرلیا۔
دوسرے کوارٹر فائنل میں عالمی نمبر دو راجر فیڈرر نے بلغاریہ کے گریگور دیمتروو کو دلچسپ مقابلے کے بعد مات دی۔ فیڈرر نے پہلا سیٹ ٹائی بریکر پر سات چھ جبکہ دوسرے سیٹ چھ دو سے اپنے نام کیا۔
ادھر سنگاپور میں جاری ڈبیلو ٹی اے فائنلز ایونٹ میں ڈینمارک کی کیرولین وزنیاکی نے چیک رپی پبلک کی پیٹرا کویٹوا کو آسان مقابلے کے بعد اسٹریٹ سیٹس میں شکست دی۔
ڈینش کھلاڑی کی فتح کا اسکور چھ دو اور چھ تین رہا۔ دوسرے میچ میں سربیا کی اینا ایوانوک نے رومانیہ کی سیمونا ہیلپ کو تین سیٹ کے سنسنی خیز مقابلے کے بعد مات دی۔ سرب کھلاڑی نے سات چھ ،تین چھ اور چھ تین کے اسکور سے مقابلہ جیتا۔
