سوات کے اسکول میں چوکیدارسے اتفاقیہ بندوق چلنے سےچارطالبات زخمی ہوگئیں۔
پولیس کےمطابق واقعہ سوات کے علاقے مدین کےسرکاری اسکول میں پیش آیا, جہاں چوکیدارسے بندوق چلنے پر طالبات گولی کی زد میں آگئیں۔
طالبات کو فوری طور پرطبی امداد کے لئے قریبی اسپتال منتقل کیا گیا،اسپتال ذرائع کے مطابق چاروں کی حالت خطرے سے باہر ہے۔پولیس نے واقعے کی تحقیقات شروع کردی۔
لاہور / سرگودھا / سوات : لاہور سرگودھا اور سوات میں ٹریفک حادثات نے باپ بیٹے سمیت گیارہ افراد کی جان لے لی۔
تفصیلات کے مطابق لاہور کے فیصل ٹاؤن میں ٹریفک حادثہ تین دوستوں کی جان لے گیا ۔ پولیس کے مطابق فیصل ٹاؤن کے رہائشی آفتاب، عثمان اور نعمان گاڑی میں جارہے تھے کہ بیدیاں روڈ پر مخالف سمت سے آنے والی گاڑی سے ٹکر ہوگئی۔
تینوں افراد موقع پر ہی جاں بحق ہوگئے، پولیس نے واقعے میں ملوث ملزم کو گرفتار کر کے مقدمہ درج کرلیا ہے۔ سرگودھا میں تیزرفتار مسافر بس نے موٹر سائیکل کو ٹکر دے ماری جس سے باپ بیٹا جاں بحق اور خاتون شدید زخمی ہوگئی.
سوات میں بھی ٹریفک حادثہ چھ افراد کو موت کی نیند سلاگیا۔ جاں بحق ہونے والوں میں دو افراد کا تعلق ایک ہی خاندان سے تھا۔
سوات: باڑا بانڈی میں ویلیج کمیٹی کے چئیرمیں محمد خان اور ان کی حفاظت پر مامور پولیس اہلکارکو فائرنگ کر کے ہلاک کردیا گیا۔
تفصیلات کے مطابق سوات کے علاقے باڑا بانڈی میں ویلیج کمیٹی کے چئیرمین اور علاقے کی معروف شخصیت محمد خان اور ان کے محافظ پولیس اہلکار کو آج نا معلوم اسلحہ برداروں نے فائرنگ سے شدید زخمی کردیا تھا،جنہیں فوری طبی امداد دینے کے لیے قریبی ہسپتال منتقل کیا گیا تھا،جہاں دونوں زخموں کی تاب نہ لاتے ہوئے خالقِ حقیقی سے جا ملے۔
ہسپتال انتظامیہ نے چئیرمین ویلیج کمیٹی اوراُن کی حفاظت پر مامور پولیس اہلکار کے جاں بحق ہونے کی تصدیق کرتے ہوئے،ضروری کاروائی کی انجام دہی کے بعد میت اہلِ خانہ کے حوالے کردی، جب کہ ایک شخص کے زخمی ہونے کی بھی اطلاعات ہیں۔
دہرے قتل کی اطلاع ملتے ہی مقامی پولیس نے علاقہ کا گھیراؤ کر کے سرچ آپریشن شروع کردیا،جاری آپریشن کے نتیجے میں تاحال کسی گرفتاری کی کوئی اطلاع موصول نہیں ہوئی ہے۔
مقتول چئیرمین ویلیج کمیٹی محمد خان کے اہلِ خانہ کے مطابق وہ علاقہ کی معروف شخصیت تھے،اُن کی کسی سے ذاتی دشمنی نہیں تھی،تاہم گذشتہ کئی ماہ سے انہیں شدت پسندوں کی جانب سے دھمکیوں کا سامنا تھا۔
سوات : تحریک انصاف آج سوات میں عوامی طاقت کا مظاہرہ کرے گی،عمران خان جلسے دھواں دھار خطاب کریں گے.
تفصیلات کے مطابق تحریک انصاف آج سوات میں عوامی طاقت کا مظاہرہ کرنے جارہی ہے،جس کی تمام تر تیاریاں مکمل کرلی گئی ہیں،ہر طرف پی ٹی آئی کے پرچموں کی بہار اور جگہ جگہ بینرز اور پوسٹرز آویزاں کردئیے گئے ہیں.
پنڈال میں کرسیاں بھی لگا دی گئی ہیں اور اسٹیج بھی سج گیاہے،جلسے میں موسیقی کے سر بکھیرنے کیلئے درجنوں اسپیکرز بھی لگا دیے گئے ہیں.
پی ٹی آئی کے پرجوش کارکنان کے مطابق سوات کی عوام آج ثابت کردے گی ان کا جلسہ وزیراعظم کے جلسے سے زیادہ بڑا ہوگا.
یاد رہے اس سے قبل جمعے کے روز عمران خان نے فیصل آباد میں جلسے سے خطاب کرتے ہوئے کہا تھاکہ پاکستان میں اقلیتوں اور اکثریت کے لیے ایک ہی قانون ہونا چاہیے تاکہ سب کو یکساں انصاف فراہم کیا جائے.
واضح رہے کہ فیصل آباد جلسے کے آخر میں چیئرمین تحریک انصاف نے 23 مئی کو لاہور میں ہونے والے کسانوں کے مظاہرے میں شرکت کرنے کا اعلان کرتے ہوئے کہا کہ تحریک انصاف آپ کے حقوق کی جدوجہد میں آپ کے ساتھ کھڑی ہوگی.
سوات : وزیر اعظم نوا شریف نے کہا ہے کہ لوگ کہتے ہیں ہم سڑکوں پر آئیں گے، میں کہتا ہوں ہوں اگر تم نے سڑکیں بنائیں ہوتیں تو تم سڑکوں پر آتے، ہم سڑکیں بناتے جائیں گے تم سڑکوں پر آتے رہنا یہ اپنا اپنا مقدر ہے۔
ان خیالات کا اظہار انہوں نے سوات میں ایک بڑے جلسہ عام سے خطاب کرتے ہوئے کیا، وزیر اعظم نے کہا کہ جس تبدیلی کا خواب مینگورہ اور سوات کے لوگ دیکھ رہے تھے بدقسمتی سے وہ تبدیلی نہیں آئی، وہ تبدیلی اب ہم لائیں گے۔
انہوں نے کہا کہ میں نے پورے علاقے کا فضائی دورہ کیا مجھے کہیں بھی تبدیلی نظر نہیں آئی، وہی ٹوٹی پھوٹی سڑکیں، وہی اسپتال نظرآئے، یہ مجمع بتا رہا ہے کہ 2013 کے انتخابات میں کی جانے والی غلطی پر آپ لوگ پچھتا رہے ہیں، سوات والے جھانسے میں نہ آتے تو تبدیلی اب تک آ چکی ہوتی۔
انہوں نے کہا کہ میں مینگورہ اورسوات کے عوام کوخوشخبری سناتا ہوں اورآپ لوگوں کو یقین دلاتا ہوں کہ حقیقی تبدیلی اب آئے گی۔
انہوں نے بتایا کہ میں یہاں کڈنی سینٹر کا افتتاح کرنے آیا تھا یہ کڈنی سینٹر بین الاقوامی طرز کا جدید اسپتال ہے اور یہ جدید اسپتال پنجاب کی جانب سے خیبر پختونخواہ کی عوام کیلئے تحفہ ہے۔
پشاور کے ضمنی الیکشن کے حوالے سے ان کا کہناتھا کہ انتخابات میں صوبائی حکمران جماعت چوتھے نمبر پر آئی۔ ہم پشاور جیتیں گے نہیں جیت چکے ہیں۔
وزیراعظم نے مینگورہ میں سیدو شریف ایئر پورٹ کو دوبارہ فعال کرنے کا اعلان بھی کیا، انہوں نے کہا کہ خواتین کی یونیورسٹی کے سب کیمپس بھی بنائے جائیں گے، انہوں نے انتظامیہ کو چکدرہ کالام روڈ کو ایکسپریس وے بنانے بھی ہدایت کی۔
اس سے قبل وزیراعظم نواز شریف نے سنگھوٹہ میں کڈنی سینٹر کا افتتاح کیا۔ 110 بستروں پر مشتمل اس اسپتال کی تعمیر پر 80 کروڑ روپے لاگت آئی ہے۔
وزیراعظم نے کڈنی ہسپتال کے ساتھ ہی اس میں موجود شہباز شریف آپریشن تھیٹر کمپلیکس کا افتتاح بھی کیا۔ وزیراعظم نے افتتاح کے بعد مریضوں سے ملاقات کر کے ان کی خیریت بھی دریافت کی۔
اسپتال کو پنجاب اسپتال ٹرسٹ نے تعمیر کیا ہے۔ اسپتال میں 14 ڈائیلیسز مشینیں، دو آپریشن تھیٹر، ایک سی ٹی اسکین مشین ، ایکس رے مشین اور دیگر جدید آلات موجود ہیں۔
پشاور: خیبر پختونخواہ میں معذور افراد کی ایک تعداد ایک لاکھ سے زائد ہوگئی، جبکہ ضلع سوات میں معذوری کی شرح سب سے ذیادہ ہے.
تفصیلات کے مطابق صوبائی ڈیزاسٹر مینجمنٹ اتھارٹی کی جانب سے اعداوشمار جاری کئے گئے ہیں جس میں معذور افراد کی تعداد ایک لاکھ بارہ ہزار تیرہ ہے جن میں54623 مرداور 29409 خواتین سمیت 27981 بچے شامل ہیں۔
محمکمہ ڈیزاسٹر مینجمنٹ کے مطابق صوبہ خیبرپخونخواہ میں 66090 افراد جسمانی معذور جبکہ 14890 افراد اندھے پن کا شکار ہیں، گونگے افراد کی تعداد15200 اور 15839 افراد ذہنی معذوری کاشکار ہے۔
خیبرپختونخواہ کے شہر سوات میں معذور افراد کی تعداد سب سے ذیادہ ہے، مجموعی طور پر سوات میں16192 افراد مختلف ذینی بیماریوں کا شکار ہیں، معذروں کی دوسری بڑی شرح لوئردیر اور اس کے بعد بٹ گرام میں معذور افراد موجود ہیں۔
پی ڈی ایم اے کے مطابق زلزلے اور سیلاب جیسی قدرتی آفات میں سب سے ذیادہ معذور افراد کو مشکلات کا سامنا کرناپڑتا ہے، ادارے کی جانب سے ان کی حوصلہ افزائی کے لئے خصوصی سرٹیفیکیٹ دیئے جاتے ہیں تاکہ ان کو عام شہریوں کی طرح قومی دھارے میں شامل کیاجا سکے۔
محمکہ چائلڈ اینڈ جنڈر پروٹیکشن سیل کے مطابق معذور افراد کی تعلیمی وتربیت پر خصوصی توجہ دی جارہی ہے، معذور افراد کی تعداد میں اضافے کی وجوہات میں دہشتگردی اور قدرتی آفات دو اہم وجوہات ہیں جس کی وجہ سے شہری زندگی بھر کے لئے معذور ہوجاتے ہیں۔
ایبٹ آباد: نواحی علاقے مکول کی رہائشی عنبرین کو زندہ جلانے کے الزام میں پولیس نے جرگہ عمائدین سمیت دس افراد کو گرفتار کرلیا۔
گزشتہ ہفتے ایبٹ آباد کے نواحی علاقے مکول میں ایک لڑکی کو گاڑی کے اندر باندھ کر زندہ جلا دینے کا واقعہ پیش آیا تھا۔ سوشل میڈیا میں زیرِ بحث رہنے والےاس واقعہ پر وزیر اعلیٰ خیبر پختونخواہ پرویزخٹک اور قومی اسمبلی کی قائمہ کمیٹی برائے انسانی حقوق نے نوٹس لیتے ہوئے تحقیقات کا حکم جاری کیا تھا۔
تفصیلات کے مطابق چند ماہ قبل عنبرین کی سہیلی صائمہ کو بھی قتل کردیا گیا۔صائمہ کا جرم بس اتنا تھا کہ وہ ایک لڑکے کو پسند کرتی تھی اور اپنی مرضی سے شادی کرنے کی خواہش مند تھی۔ بات صائمہ کی قتل تک ہی نہ رکی بلکہ حال ہی میں ہونے والے جرگہ نے صائمہ کی معاونت کرنے پر اس کی سہیلی 15 سالہ عنبرین کو بھی زندہ جلانے کا حکم دیا تھا۔
فیصلے کی تعمیل میں عنبرین کو سوزوکی کیری کی پچھلی نشست پہ باندھ کر گاڑی کو آگ لگا دی۔یوں عنبرین زندہ جلا دی گئی۔قریب ہی دو اور گاڑیوں کو بھی آگ لگائی گئی تاکہ واقعہ کو حادثہ کا رنگ دیا جاسکے۔
واقعہ کے سات روز بعد پولیس ملزمان کا سراغ لگانے میں کامیاب ہوسکی اورجرگہ عمائدین سمیت دس ملزمان کو گرفتار کرلیا گیا ہے۔ پولیس کے مطابق مزید پانچ لوگوں کی گرفتاری کے چھاپے مارے جارے ہیں جن پہ قتل میں معاونت کاالزام ہے۔
اگر چند ماہ قبل پسند کی شادی کرنے کی خواہ صائمہ کے قتل پہ فوری ایکشن لے کر ملزمان کو گرفتار کرلیاجاتا تو شاید عنبرین کو بچایاجاسکتاتھا.
سوات : جمعیت علمائے اسلام کے مرکزی امیر مولانا فضل الرحمن نے کہا ہے کہ ہمارا پانامہ لیکس سے کوئی سرو کار نہیں، ہم اس ملک میں اللہ کا قانون اور امن چاہتے ہیں، دھرنا دینے والے خود پانامہ لیکس کی فہرست میں شامل ہیں۔
ان خیالات کا اظہار انہوں نے گراسی گراؤنڈ مینگورہ میں دستار فضیلت جلسہ سے خطاب کرتے ہوئے کیا، مولانا فضل الرحمن نے کہا کہ اسلام کو انتہاپسندی اور دہشت گردی کے نام پر بدنام کیا جارہا ہے حالانکہ اسلام اعتدال پسند اور امن پسند مذہب ہے۔
اسلام کی اصولوں کے مطابق زندگی گزار نے والوں کو انتہا پسند جبکہ جہالت کی زندگی گزارنے والوں کو روشن خیال کہا جاتا ہے، لیکن جمعیت علمائے اسلام نے ہمیشہ کفری اور لادینی قوتوں کا مقابلہ کیا ہے۔
اس موقع پر جے یو آئی کے صوبائی امیر مولانا گل نصیب خان ،مفتی غلام الرحمن ، مولانا شجاع الملک ، ایم پی اے مفتی فضل غفور ، مولانا محمد عزیز الرحمن ہزار وی ، ضلعی امیر قاری محمود ، جنرل سیکرٹری اسحاق زاہد اور دیگر علماء کرام نے بھی خطاب کیا ۔
جلسہ کے دوران سوات کے مختلف دینی مدارس سے فارغ التحصیل 500 طالب علموں کو اسناد سے نوازا گیا ، مولانا فضل الرحمن نے خود سٹیج کی فرش پر بیٹھ کر اسناد حاصل کرنے والے علمائے کرام کو داد دی ، مولا نا فضل الرحمن نے کہا کہ خیبر پختونخوا میں مذہب اسلام کی مضبوط جڑے کاٹنے کیلئے صوبے کی عوام پر یہودی لابی کو مسلط کردیا گیا ہے ، لیکن جے یو آئی کے ہوتے ہوئے یہودی لابی کبھی بھی اپنے مذموم مقاصد میں کامیاب نہیں ہوسکتی۔
انہوں نے کہا کہ دھرنا دینے والے برطانیہ میں پاکستانی نژاد مسلمان کی بجائے اپنے یہودی سالے کی مئیر شپ پر کامیابی کیلئے کمپین چلا رہے ہیں جس پرہم نے دھرنے کے وقت کہا تھا کہ یہ یہودیوں کے ایجنٹ ہیں اور آج بھی انہیں یہودیوں کا ایجنٹ کہتے ہیں ۔
انہوں نے کہا کہ دہشت گردی کے نام پر جنگ شروع کرکے مسلمانوں کا قتل عام کیا گیا، اسلام کو بے حد نقصان پہنچایا گیا ، انہوں نے کہا کہ آج یوم مزدور ہے اور ہم نے ہمیشہ مزدوروں کے حقوق کیلئے آواز بلند کی ہے ، انہوں نے کہا کہ دنیا بدل رہی ہے آج امریکہ کے عوام بھی اسلام معیشت اور اسلامی انصاف چاہتے ہیں۔
سرمایہ دار طبقہ اپنی مرضی کے مطابق پاکستانی عوام پر حکمران مسلط کرتے ہیں ، معین قریشی جیسے لوگوں کو پاکستان لاکر حکمران بنا یا جا تا ہے ، جے یو آئی کے کارکن سرمایہ دار طبقے سے نجات دلانے کیلئے جے یو آئی کا پیغام گھر گھر پہنچائیں۔
جلسہ کے دوران عریانی و فحاشی ختم کرنے ، کسٹم ایکٹ واپس لینے ، سوات کو ٹورازم زون قرار دینے ، سڑکوں اور سوات جیل کو تعمیر کرنے سمیت 50 بستروں پر مشتمل ہسپتال کو جلد از جلد مکمل کرانے کی قرار دادیں متفقہ طور پر منظور کرلی گئیں ۔
سوات /چترال /مالاکنڈ : زمین ایک با ر لرز اٹھی، سوات، چترال، مالاکنڈ شہر اور گردو نواح میں زلزلے کے جھٹکے محسوس کئے گئے ۔ریکٹر اسکیل پر زلزلے کے شدت پانچ ریکارڈ کی گئی۔
شہری کلمہ طیبہ کا ورد کرتے ہوئے گھروں سے باہر نکل آئے،زلزلہ کے نتیجے میں تاحال کسی جانی و مالی نقصان کی اطلاعات موصول نہیں ہوئی ہیں.
زلزلہ پیما مرکز کے مطابق زلزلےکےجھٹکوں کی گہرائی بہتر کلو میٹر تھی جبکہ مرکز ہندو کش ریجن افغانستان تھا ۔ ریکٹر اسکیل پر زلزلے کے شدت پانچ ریکارڈ کی گئی۔
ڈائریکٹرزلزلہ پیما مرکز زاہد رفیع کا کہنا ہے گزشتہ سال کے دوران زلزلے کے جھٹکوں سے زمین کے کھسکنے کے باعث زلزلے کے مزید جھٹکوں کا امکان ہے.
پچیس اکتو برکے زلزلے کے بعد سوات اور گرد نواح میں زلزلے کے آفٹر شاکس کا سلسلہ جاری ہے جس سے لوگوں خوف و ہراس میں مبتلا ہیں۔
راولپنڈی: اسلام آباد اورگردونواح میں وقفے وقفے سے بارش کاسلسلہ جاری ہے،مختلف مقامات پر گرد آلود تیزہوائیں چلنےاور گرج چمک کیساتھ بارش کا امکان ہے۔ملک کے دیگرعلاقوں میں موسم گرم اور خشک رہے گا۔
رات گئے راولپنڈی ،اسلام آباد میں بارش کا سلسلہ شروع ہوتے ہی موسم میں خنکی پیدا ہو گئی،موسم کی تبدیلی سے جڑواں شہر میں خنک ہوائیں چلنے لگیں۔
اس کے علاوہ محکمہ موسمیات نے آئندہ 2روزکےدوران ملک کےبالائی علاقوں میں مزید بارش کی پیشنگوئی کی ہے جبکہ اتوار اور سوموار کے روز اسلام آباد، بالائی/وسطی پنجاب خیبرپختونخواہ، گلگت بلتستان اور کشمیر میں کہیں کہیں گرج چمک اور تیز ہواؤں کے ساتھ بارش جبکہ بعض مقامات پر ژالہ باری کا بھی امکان ہے۔
گزشتہ روز گرم ترین مقامات کے درجہ حرارت یوں رہے۔لاڑکانہ،موہنجوداڑو،شہید بینظیرآباد47، پڈعیدن ،سکھر 46، تربت، رحیم یار خان، روہڑی،سبی، جبکہ جیکب آباد 45 ڈگری سینٹی گریڈ درجہ حرارت ریکارڈ کیاگیا۔