Tag: سوشل میڈیا

آج کل کے دور میں فیس بک ایک نہایت ہی ضروری شے بن گیا ہے جسے کاروباری تعلقات بڑھانے اور تجارتی مقاصد سے لے کر دوست بنانے اور قریبی عزیزوں سے تعلق رکھنے تک کے لیے استعمال کیا جاتا ہے۔

ماہرین کا کہنا کہ جس طرح کسی انسان کی گفتگو اس کی شخصیت کی عکاس ہوتی ہے، اسی طرح ہماری فیس بک پروفائل بھی ہماری شخصیت، مزاج اور عادات کو ظاہر کرتی ہے۔

برطانیہ کی برونل یونیورسٹی میں کی جانے والی تحقیق کے مطابق فیس بک پر کی جانے پوسٹنگ کی بنیاد پر اندازہ لگایا جاسکتا ہے کہ لوگ کس قسم کی شخصیت کے مالک ہیں۔

عموماً فیس بک کی پوسٹ، پوسٹ کرنے والے کے بارے میں بتاتی ہے کہ آیا وہ شخص خود پسند ہے، جلد رائے تبدیل کرنے والا ہے، کشادہ دل و دماغ کا مالک ہے، مفاہمت پرست ہے، فرض شناس ہے یا دماغی طور پر پریشان اور الجھا ہوا ہے۔

---

آئیے دیکھتے ہیں کہ آپ کی فیس بک پوسٹ آپ کے بارے میں کیا بتاتی ہے؟

اگر آپ فیس بک پر اپنی کامیابیوں، کھانے پینے اور ورزش کے بارے میں پوسٹ کرتے ہیں اور آپ کا بنیادی مقصد اپنی پوسٹ پر زیادہ سے زیادہ لائیکس حاصل کرنا ہوتا ہے، تو آپ خود پسند ہیں، یعنی آپ خود ہی اپنے مداح ہیں اور صرف اپنے آپ کو اولیت دیتے ہیں۔

اگر آپ فیس بک پر سیاسی اور دانشورانہ موضوعات پر اظہار خیال کرتے ہیں تو اس کا مطلب ہے کہ آپ کشادہ دل اور کھلے ذہن کے مالک ہیں اور آپ کے اندر تخلیقی صلاحیتیں موجود ہیں۔

فرض شناس افراد اپنی زندگی کے تمام معاملات میں نہایت ذمہ دار ہوتے ہیں لہٰذا وہ سوشل میڈیا کا استعمال ذرا کم کرتے ہیں۔ اگر وہ کبھی کبھار فیس بک پر کوئی پوسٹ کریں تو وہ ان کے اہل خانہ خصوصاً ان کے بچوں کے بارے میں ہوتی ہے۔

وہ افراد جن میں اعتماد کی کمی ہوتی ہے وہ زیادہ تر اپنے والدین یا خاندان کے دیگر بڑوں کی تصاویر یا ان کے بارے میں مکالمے پوسٹ کرتے ہیں۔

---

پروفائل پکچر سے شخصیت کا اظہار

کیا آپ جانتے ہیں کہ آپ کی پروفائل پکچر بھی آپ کی شخصیت کی عکاس ہوتی ہے۔

آئیں دیکھیں کہ آپ کی پروفائل پکچر آپ کے بارے میں کیا بتاتی ہے۔

اگر آپ اپنی پروفائل پکچر میں کسی خاص شے کے ساتھ کھڑے ہیں، یا تصویر میں آپ نے مزاحیہ شکل بنائی ہوئی ہے تو اس کا مطلب ہے کہ آپ کشادہ دل و دماغ کے مالک ہیں اور تبدیلیوں کا خوش دلی سے استقبال کرتے ہیں۔

اگر آپ کی پروفائل پکچر ایسی ہے جس میں آپ ہنستے مسکراتے یا دوستوں کے ساتھ کسی خاص موقعے سے لطف اندوز ہوتے دکھائی دے رہے ہیں تو اس کا مطلب ہے کہ آپ مفاہمت پرست ہیں اور چیزوں کو شدت کے ساتھ محسوس نہیں کرتے۔

دماغی طور پر پریشان اور الجھے ہوئے افراد ایسی پروفائل پکچر لگاتے ہیں جس میں کسی عجیب و غریب شے کے باعث ان کا چہرہ چھپا ہوا ہوتا ہے۔ اگر ان کا چہرہ پوری طرح دکھائی بھی دے رہا ہو تب بھی وہ جان بوجھ کر ایسے تاثرات بناتے ہیں جس سے ان کا چہرہ بگڑا ہوا دکھائی دے۔

فرض شناس اور ذمہ دار افراد باقاعدہ تیاری کے ساتھ کھینچی گئی تصویر کو اپنی پروفائل پکچر بناتے ہیں جس میں کوئی نقص نہ ہو۔ اس قسم کی تصاویر عموماً تعلیمی یا دفتری دستاویزات میں لگائی جاتی ہے۔

خود پسند افراد اپنی پروفائل پکچر پر ایسی تصویر لگانا پسند کرتے ہیں جو بہت رنگا رنگ ہو، اور جس میں وہ خوبصورت اور کم عمر نظر آرہے ہوں۔

آپ کی فیس بک پروفائل آپ کے بارے میں کیا بتاتی ہے؟

---

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔