معروف امریکی اداکارہ اور دنیا بھر میں مقبول ڈرامہ سیریز گیم آف تھرونز میں سانسا سٹارک کا کردار ادا کرنے والی سوفی ٹرنر نے غلطی سے اپنی بیٹی کی ویڈیو سوشل میڈیا پر پوسٹ کردی۔
سوفی ٹرنر اور ان کے شوہر امریکی گلوکار جو جونز اپنی 2 سالہ بیٹی ولا جونز کی پرائیوسی کا خیال رکھتے رہے ہیں اور اب تک انہوں نے بچی کی کوئی تصویر سوشل میڈیا پر پوسٹ نہیں کی تھی۔
تاہم حال ہی میں اداکارہ نے بچی کی ایک ویڈیو انسٹاگرام اسٹوری پر شیئر کی جس پر ان کے مداح سمجھے کہ اب انہوں نے بچی کی تصاویر و ویڈیوز سوشل میڈیا پر پوسٹ کرنا شروع کردیے ہیں۔
لیکن تھوڑی ہی دیر میں اداکارہ نے اسٹوری ڈیلیٹ کردی اور اسے غلطی قرار دیا۔
اپنی ایک اور اسٹوری میں سوفی نے لکھا کہ آج صبح انہوں نے غلطی سے اپنی بیٹی کی ویڈیو سوشل میڈیا پر پوسٹ کردی تھی۔ ہم ہمیشہ سے بچوں کی پرائیوسی کا خیال رکھتے رہے ہیں اور یہ غلطی ہمارے اصولوں کے منافی تھی۔
انہوں نے لکھا کہ بچوں کا حق ہے کہ وہ عوامی نظر میں آئے بغیر پرورش پائیں، سیکھیں اور بڑے ہوں۔
اداکارہ نے درخواست کی اگر کسی نے اس ویڈیو کو اپنے پاس محفوظ یا ریکارڈ کرلیا ہے تو وہ بھی اسے ڈیلیٹ کردیں، اور اسے شیئر کرنے سے گریز کریں۔
فنکار جوڑے نے اس سے قبل 2021 میں بھی ایک فوٹوگرافر کو اپنی بیٹی کی تصویر کھینچنے پر اسے تنقید کا نشانہ بنایا تھا اور تصویر شائع نہ کرنے کی درخواست کی تھی۔
