اسلام آباد: وزیراعظم پاکستان شہباز شریف نے کہا ہے کہ سب سے زیادہ سرمایہ بھجوانے والے اوورسیز پاکستانی کو سول ایوارڈ دیا جائےگا۔
تفصیلات کے مطاببق وزیراعظم شہبازشریف کی زیر صدارت اوورسیزپاکستانیوں کے امور پر خصوصی اجلاس ہوا، اس موقع پر ان کا کہنا تھا کہ اوورسیز کیلئے پاکستان میں انکی مہارت کے مطابق سرمایہ کاری کے مواقع دیں گے، اوورسیز پاکستانیوں کی وطن کیلئے محبت، قربانیوں کو سلام پیش کرتے ہیں۔
شہباز شریف نے کہا کہ سمندرپار پاکستانی بیرون ملک پاکستان کے سفیر کا کردارادا کرتے ہیں، سمندرپار پاکستانیوں کی ملک کےلئے بڑی خدمات ہیں۔
سمندرپار پاکستانیوں نے دنیا بھر میں محنت کرکے اپنا اور ملک کیلئے نام کمایا، طب، تعلیم، انجینئرنگ اور کنسلٹنسی میں بطور پروفیشنل محنت کی اور رزق حلال کمایا۔
وزیراعظم نے کہا کہ حکومت نے اوورسیز پاکستانیوں کی خدمات کے اعتراف میں بڑا پیکج دیا ہے، اوورسیز کے مسائل ترجیحی بنیادوں پرحل کریں گے، انھیں مزید سہولتیں دینے کیلئے کوشاں ہیں۔
اوورسیز پاکستانیز کنونشن میں سمندرپار پاکستانیوں کی بڑی تعداد نے شرکت کی، کنونشن میں بھرپورشرکت اوورسیز پاکستانیوں کی حکومتی پالیسیوں پر اعتماد کا مظہر ہے۔
شہباز شریف کو اوورسیز پاکستانیوں کےلئے اعلان کردہ سہولتوں سے متعلق پیشرفت، حکمت عملی پر بریفنگ دی گئی، آرمی چیف جنرل عاصم منیر، نائب وزیراعظم، وفاقی وزرا اور متعلقہ حکام نے اجلاس میں شرکت کی۔
"اوورسیز کنونشن میں نعرے لگے آرمی چیف قدم بڑھائیں ہم آپ کے ساتھ ہیں”
