Tag: سونو سود

بالی ووڈ اداکار سونو سود نے اپنے وارنٹ گرفتاری جاری ہونے پر خاموشی توڑ دی۔

سماجی رابطے کی ویب سائٹ ایکس پر اداکار سونو سود نے لکھا کہ ہمیں یہ واضح کرنے کی ضرورت ہے کہ سوشل میڈیا پلیت فارمز پر گردش کرنے والی خبریں انتہائی سنسنی خیز ہیں۔

انہوں نے لکھا کہ معاملات کو صحیح کرنے کے لیے ہمیں معزز عدالت کی جانب سے کسی تیسرے فریق سے متعلق معاملے میں بطور گواہ طلب کیا گیا جس سے ہماری کوئی وابستگی نہیں۔

اداکار نے کہا کہ ہمارے وکلا 10 فروری کو بیان دیں گے جو اس معاملے میں ہماری عدم شمولیت کو واضح کرتا ہے، ہم نہ تو برانڈ ایمبسیڈر ہیں اور نہ کسی بھی طرح سے وابستہ ہیں، یہ افسوسناک ہے کہ مشہور شخصیات نرم ہدف بن جاتے ہیں، ہم اس معاملے میں سخت کارروائی کریں گے۔

واضح رہے کہ پنجاب کے شہر لدھیانہ کی عدالت نے مبینہ فراڈ کیس میں 51 سالہ اداکار سونو سود کے وارنٹ گرفتاری جاری کیے ہیں۔

بھارتی میڈیا کا کہنا ہے کہ اس کیس میں لودھیانہ سے تعلق رکھنے والے ایک وکیل راجیش کھنہ نے 10 لاکھ روپے  کے فراڈ کا مقدمہ دائر کیا اور الزام لگایا کہ مرکزی ملزم موہت شکلا نے اسے جعلی سرمایہ کاری کرنے کا لالچ دیا۔

لدھیانہ کی عدالت نے اوشیوارا پولیس اسٹیشن، اندھیری ویسٹ، ممبئی کے آفیسر انچارج کو سونو سود کو گرفتار کرنے کا حکم دیا ہے۔

بھارتی میڈیا کا کہنا ہے کہ عدالت نے سونو سود کو گرفتار کرکے عدالت میں پیش کرنے کا حکم دیا ہے اور کیس کی اگلی سماعت 10 فروری تک ملتوی کردی ہے۔

بھارتی اداکار نے بنگلہ دیش میں جاری ہنگاموں کے بعد ہم وطنوں سے اپیل کی ہے کہ وہ پڑوسی ملک سے نکلنے میں بھارتیوں کی مدد کریں۔

بالی ووڈ اداکار سونو سود جو اپنی سوشل سرگرمیوں کی وجہ سے معروف ہیں انھوں نے ٹوئٹر پر ایک پوسٹ کی ہے جس میں بھارتی خاتون کی ویڈیو شیئر کی گئی، اس ویڈیو خاتون نے اپنے درد کا اظہار کرتے ہوئے بتایا کہ بنگلہ دیش میں کئی بھارتیوں کی زندگیوں کو خطرہ ہے۔

خاتون نے ویڈیو میں بھارت واپس آنے کی خواہش کا بھی اظہار کیا، سونو سود نے اپنی ٹوئٹ کے کیپشن میں لکھا کہ ’ہمیں بنگلہ دیش سے اپنے تمام ہم وطن بھارتیوں کو واپس لانے کی پوری کوشش کرنی چاہیے، تاکہ انہیں یہاں بہتر زندگی میسر آسکے۔‘

سونو سود کا مزید کہنا تھا کہ ’یہ صرف ہماری حکومت کی ذمہ داری نہیں ہے جو اپنی پوری کوشش کر رہی ہے بلکہ یہ ہم سب کی بھی ذمہ داری ہے‘، آخر میں انھوں نے بھارتی پرچم کی ایموجی بھی بنائی۔

خیال رہے کہ بنگلہ دیش میں طلبا کے شدید احتجاج کے بعد شیخ حسینہ واجد کی حکومت کا دھڑن تختہ ہوچکا ہے اور وہ بھارت فرار ہوچکی ہیں۔

اس سے قبل بھارتی اداکارہ سونم کپور نے بھی انسٹاگرام اسٹوری میں بنگلہ دیشی عوام سے موجودہ حالات پر ہمدردی کا اظہار کیا تھا۔

سونم کپور نے بنگلہ دیش میں جاری مظاہروں سے متعلق پوسٹ شیئر کی اور لکھا کہ ’یہ انتہائی خوفناک ہے، میرے ساتھ مل کر بنگلہ دیش کے عوام کے لیے دعا کریں۔‘